9. getraun Fornleifs

Ha krakkar, nú er vor í lofti, eins og Vigdís forseti sagði oft, og því tilvalið að hafa getraun:

Hvað er það sem sést á myndinni?

Hve gamalt er það?

Hvaðan er það ættað?

Hvar er það nú?

Athugasemdir

[Jón Steinar Ragnarsson, 26.10.2013 kl. 18:04]

Ekki getur það verið svo gamalt með alla þessa exotísku ávexti, perur, plómur og apríkósur.

Líklega er þetta í Kaupinhavn þar sem ég sé að sonur þinn speglast þarna í glerinu. Get mér til að það sé ættað frá íslandi og sé einhverskonar viðhafnarklæði, jafnvel kirkjulegt af hégómanum að dæma.

Eigum við að segja lok nítjándu aldar. Gæti þó verið Hollenskt af gulu rósinni að dæma eða allavega undir áhrifum þaðan.

[FORNLEIFUR, 26.10.2013 kl. 18:14]

Getspakur ertu Jón. Sonur minn speglaðist í þessu 9 ára og er hann í jakka frá 69 gráðum. Það er eini vefnaðurinn og þjóðlegri getur hann ekki verið. Þetta er í Kóngsins Kaupmannahöfn. Íslenzkur er gripurinn ekki og öldin er alröng. Hollendingar áttu líka svona ...

[Jón Steinar Ragnarsson, 26.10.2013 kl. 18:26]

Jæja...einhverstaðar verður að byrja....

Þetta er þá sennilega öskjulok kringlott eða sporöskjulaga af myndbyggingunni að dæma. Norskir máluðu svona krúsidúllur á tré. Rússar raunar líka, sem og hollendingar, enda hefur þetta verið ofsa heitt á sínum tima. Alþýðulist er þetta þó allavega. Eigum við að segja lok átjándu. Norskt.

[FORNLEIFUR, 26.10.2013 kl. 18:29]

Njét og Nejda, ekki lok og lagið er rangt og efnið sömuleiðis. Vissulega var þetta heitt á sínum tíma en hann er líka rangur hjá þér. En þetta var líka dýrt...á þeim tíma sem það var gert, og ekki síður í dag.

[FORNLEIFUR, 26.10.2013 kl. 18:30]

Nú ætla ég að borða flanið og tek pásu.

[Jón Steinar Ragnarsson, 26.10.2013 kl. 18:57]

Þá segi ég lika pass í bili. Þetta er þó líklega skál eða fat úr leir eða postulíni,jafnvel metal. Danskt. 20. Öldin öndverð.

Norska rósamálningin er ekki svona raffíneruð. Hún var heit í lok 19. Einu dýru gripirnir sem mér dettur í hug á þessu tímabili eru eggin hans Fabergé, en þetta er tæplega eitt af þeim, né stæling.

Erfitt að átta sig á því hvort þetta er kúpt eða íhvolft en einhverskonar bjögun er þarna sem gefur það til kynna, nema að það sé myndavélin sem skrumskælir. Munstrið hefur miðju og umgjörð sem leiddi mig í að sjá þetta sem einhverskonar hringlaga hlut.

Er bara að hugsa upphátt og reyna að rekja eitthvað nánar útúr þér. ;)

Ekki laust við að maður sjái páfugla þarna líka, svo kannski er þetta eitthvað konunglegt.

[Jón Steinar Ragnarsson, 26.10.2013 kl. 18:58]

Þetta kallar maður að skjóta á hluti með haglabyssu. :D

[FORNLEIFUR, 26.10.2013 kl. 19:29]

Þetta er marflatt, ekki danskt og ekki 20. öldin. En þó þú sjáir hlutina hringlaga, þá eru þarna páfagaukar í aldingarði. En Fabergé var ekki fæddur þegar þetta varð til.

[Jón Steinar Ragnarsson, 26.10.2013 kl. 20:31]

Kannski eru klókari tilvísanir þarna. Kannski er strákurinn hint? Er þetta hluti af málverki eftir Rubens frá byrjun sautjándu aldar. Ca. 1630. Pæling....

[Jón Steinar Ragnarsson, 26.10.2013 kl. 20:37]

Þá er þetta belgískt frá byrjun 17. Aldar.

[FORNLEIFUR, 26.10.2013 kl. 21:42]

Ég hef ekkert átt við myndina. Sonur minn horfði niður á þetta verk og speglaðist í því. Þetta er hvorki Rubens, Rúbens né belgískt, en þú ert kominn nær í tímanum.

Þú getur sofið á þessu!

[Jón Steinar Ragnarsson, 26.10.2013 kl. 23:29]

En hvað ef maður getur ekki sofið fyrir þessu?

[FORNLEIFUR, 27.10.2013 kl. 04:41]

Nú er komið í óefni. Til er maður á Íslandi sefur ekki út af fornleifum. Bara ef það væri þjóðminjavörður. En þeir sem valta yfir fornminjar og náttúruna sofa greinilega vært.

[FORNLEIFUR, 27.10.2013 kl. 04:45]

Það er ennþá verið að framleiða gripi eins og þennan sem myndin er af, m.a. á Indlandi, en í byrjun 18 aldar var svona gripur konungagjöf og kostaði um 24000 ríkisdali. Nú vona ég að þú sofir eins og steinn, Jón.

[Helga Kristjánsdóttir, 28.10.2013 kl. 01:19]

(Brot-fanlaus) blævængur.

[FORNLEIFUR, 28.10.2013 kl. 07:51]

Nei, Helga, þetta er úr harðara efni og miklu stærra en blævængur

[Gísli Fridrik Gislason (IP-tala skráð) 28.10.2013 kl. 19:36]

Það væri betai ef myndin væri stærri. Er þetta ekki ættað úr steinaríkinu? Intarsia úr steini. Kannski á Rosenborg. Hluti af borði sem við sjáum.

[FORNLEIFUR, 28.10.2013 kl. 23:31]

Gísli, þú hittir naglann á höfuðið. Þetta er pietra dura borð í Rosenborgarhöll  í Kaupmannahöfn, og kannski væri best fyrst þú varst svona klár, að þú fengir að gefa okkur dagsetninguna og hvaða konungur átti þetta og hvar borðið var búið til. 

Gísli Friðrik Gíslason, sem ég veit engin deili á, og biðst afsökunar á því, leysti þessa gátu þrátt fyrir litla mynd. Ég mun á næstu dögum sýna ykkur stærri mynd af borðinu.

Þakka Jóni Steinari , sem ég vona að hafi getað sofið þrátt fyrir heilabrotin, og Helgu fyrir þátttökuna. 

[Gisli Friðrik Gislason (IP-tala skráð) 29.10.2013 kl. 16:04]

Eins og þú veist þá erum við að tala um Kristján 4 (1588-1648). Borðið er frá Flórens. Á ég að senda þér myndgátu við tækifæri?

kv.

[FORNLEIFUR, 30.10.2013 kl. 06:50]

Nei, Gísli, ekki er Það Kristján 4. enda margt fleira í Rósenborgarhöll en frá hans tíma. Friðrik 3 átti þetta borð, sem þó hefur verið gert í Fierenze, þar sem helstu verkstæðin voru.

Það var flott hjá þér að uppgötva þetta. Þetta var nokkuð erfið getraun.

Sendu mér endilega myndagetraun, sem ég mætti kannski birta, og þá gætir þú stjórnað leiknum.

[Ragnhildur Kolka, 30.10.2013 kl. 12:52]

Flott er það.

[Gisli Fridrik Gislason (IP-tala skráð) 31.10.2013 kl. 06:02]

Ertu nú viss meistari? Þeir selja minjagripi á ísskápinn á Rosenborg og þar er borðið kennt við C.4.

http://dkks.dk/magneter/

[FORNLEIFUR, 31.10.2013 kl. 09:08]

Meistarinn er aldrei viss, og þetta var góð spurning. Við nánari athugun kemur í ljós að listfræðingar vilja hafa þetta borð Kristjáns 4. og telja fótinn með fangamarki Friðriks sonar hans vera seinni viðbót. Ég fæ þó hvergi séð, að fyrir því sé nokkur fótur. Mótívið er mjög líkt því sem maður sér á öðrum borðum frá Fierenze um miðja 17. öldina, en talið er þetta borð hafi verið í Friðriksborgarhöll, en þaðan kom það fyrst á 19. öld til Rósenborgar. En í þeim heimildum sem ég hef fyrir framan mig er ekki með vissu hægt að segja að þetta borð hafi verið keypt af Kristjáni 4. og engar heimildir eru til um eldra borð undir þessari steinplötu.