Hótel Hörmung í Lækjargötu

Kallað hefur veið til samkeppni um hótelbyggingu sem á að gnæfa yfir Lækjargötunni. Vinningshafinn hefur skapað gráan og ljótan kassa. Þetta er með því ljótasta sem maður hefur séð í mörg ár.

Í bílageymslunni eða á hórubarnum Læknum í kjallaranum verður fornleifadyngja, þar sem haugafullir Japanar og Þjóðverjar geta dásamað snældusnúða og ryðgaðan nagla Landnáms-Ingós í kassa úr skotheldu gleri eða plasti, og síðan tekið landnámslagið í nefið.

Byggingin sem hefur verið valin fyrir Hótel Snældu er algjör hörmung og líkist mest skotbyrgi úr síðari heimsstyrjöld. Hin ljósa ímynd Lækjargötunnar verður algjörlega eyðilögð með þessu óeðli, jafnvel þótt menn ýti á glow-knappinn í photoshop á hugsýn arkitektafjandanna sem unnu keppnina.

Þetta monster, sem ætlunin er að reisa í Lækjargötu, verður ljótt minnismerki um "minjavernd" á Íslandi. Skömm og hörmung. Þetta verður að stöðva ef hægt er. Hvar er Simmi húsaverndari nú? Kannski er hann hluthafi?

Sjáið hér sum viðbrögðin á FB minni við hótelgarminum sem menn dreymir um til að mala evrur með.

Athugasemdir

[Gunnar Heiðarsson, 6.7.2015 kl. 20:17]

Miðað við stærðarhlutföll á myndinni virðist vera frekar lágt til lofts á efri hæðum hússins. Mætti ætla að þetta hótel sé hannað fyrir dverga, eða kannski austur-asíubúa.

[Ómar Ragnarsson, 6.7.2015 kl. 20:53]

"Eiga að verða fáir eða margir á fundinum?" spurðu ljósmyndarar gömlu flokksblaðanna. Með því að hafa gamla húsið á horninu nær, er beitt blekkingu um stærð þessa skrímslis. 

[FORNLEIFUR, 6.7.2015 kl. 21:44]

Ég er sammála Ómari og Gunnari. Það er margt við þessa mynd að athuga. Þetta hús má einfaldlega ekki byggja.

[Kristján Sveinsson (IP-tala skráð) 6.7.2015 kl. 21:59]

Ja, það er ekkert með það, verður bara að finna teikningu eftir Guðjón svo hlífa megi oss við nútímanum. Annars held ég að yrði þessi grái kassi klæddur bárujárni (sem er forljótasta byggingarefni þessa heims og annars) muni lattéfroðulepjandi fagna honum innvirðulega enda verður hann þá í smáhreysastíl með kotungsívafi og ugglaust þóknanlegur.

[FORNLEIFUR, 7.7.2015 kl. 05:40]

Bárujárnið er skjöldur Íslands og sómi á margan hátt. En mikið má nú ofgera þegar temaður og espresso-heimsspekingur eins og þú, Kristján, fagnar fasískum sementskúbisma. Þetta er ugglaust eftir að skyggja dagana langa á allt í kringum sig og auka sölu á geðhvarfalyfjum í Reykjavík. Þú þarft að fá þér aukalampa í vinnunni. Menn munu hoppa í tjörnina og hengja sig, eftir að hafa labbað framhjá þessum drunga. Meðaleinkunnir í MR munu falla og fjögur tungl munu birtast á himni og þingeyskir loftbelgir hefjast á loft.

Stílfræðilega er byggingin bara ljót. Lækjargata er "ljós gata", síðan að menn lokuðu hinni ilmandi slóð. Hún má ekki við frekari röskunum.

Fleiri fornleifar munu hins vegar finnast í grunninum, t.d. hinn rétti bær Ingólfs, sem hefur vitaskuld búið við læk eins og allir Skandínavar. Það verður ekki hægt að komast í hvíta hluta Landnámslagsins á Lækjarbarnum fyrr en í fyrsta lagi árið 2025. Hóteleigendur munu fara á hausinn áður en fornleifarannsóknum líkur.

Svo þarf ekki að sækja í smiðju kópíistans Guðjóns, sem var aðeins meðalarkitekt. Til eru ágætar hótelteikningar eftir Alfred Jensen, bróður Thors Jensens. Burstabær hans, stækkaður upp í 5 hæðir, með torf á þakinu - og kartöflugarð, myndi vekja heimsathygli. Sjá hér.