Klaustrið og Gunnar

Óska ber menningarsetrinu að Skriðuklaustri í Fljótsdal, ja öllum Íslendingum, til hamingju með nýja fornminjasvæðið sem opnað verður á 500 ára vígsluárstíð klaustursins sem er eftir nokkra daga. 

Varla hefur það farið framhjá nokkrum, að miklar fornleifarannsóknir hafa farið fram að Skriðuklaustri og ekki hefur heldur verið sparað á reikningi yfirlýsingagleðinnar. Um tíma mátti skilja, að Skriðuklaustur hefði verið hospítal fyrir ínuitakonur frá Grænlandi, (í þá tíð er íslenska heilbrigðiskerfið var annálað), og jafnvel konu með "fílamannseinkenni", sem var kallaður Paget sjúkdómur (sem sumir halda í óráði að hafi hrjáð Egil Skallagrímsson). Það er auðvitað allt bölvuð vitleysa, eins og var t.d. líka tilfellið með franskan pening sem fannst á Skriðuklaustri og örvarodd sem sagður var af lásboga og margt fleira. 

Fyrir utan hinn netta fornmenjagarð, sem nú er búið að hanna á Skriðuklaustri, og sem er til sóma, hafa fornleifarannsóknirnar þar haft ákveðið skemmtanagildi fyrir þjóðina í gúrkutíð undanfarinna sumra. Ekki er þó öllum atriðunum lokið. Nú vantar grand fínalið, þar sem fremstu embættiskonur landsins leggja blessun sína með nærveru sinni.

 

Þessi ekki ófína teikning af hugsýn manna af því hvernig klaustrið hafi litið út, er hreint út sagt kjánaleg. Ekki hef ég séð neitt í fornleifunum eða í sparsömu myndefni aldanna á eftir sem bent getur til kirkju eins og þeirrar sem er sett fram í þessari hugslettu. Þetta er hugmynd sem ég býst við að komi út í bók um rannsóknirnar, sem ég hlakka til að sjá. Kannski er búið að leiðrétta eitthvað að hinum glannalegum yfirlýsingum sem hafa skemmt allslausum fornleifafræðingum eins og mér hinn síðari ár.

Gunnar Gunnarsson

Ég tel  persónulega nokkuð víst, að kirkja á Skriðuklaustri hafi aldrei litið svona út. Ég er reyndar jafnviss um það og að Gunnar Gunnarsson rithöfundur, sem að sjálfsögðu er heiðraður á bæversku sveitasetri sínu á Héraði, var brennandi og ósvífinn nasisti, þótt því sé ævinlega staðfastlega neitað og engar heimildir að finna um slíkt á heimasíðu Skriðuklausturs eða í fórum íslenskra menningarvita sem hafa ritað sögu hans í greinum eða bókum.

Eins og ég hef leyft mér að leiðrétta alvarlegar meinlokur sem upp hafa komið í Skriðuklaustursrannsóknum, leyfi ég mér að nefna eina eða tvær heimildir um hve atkvæðamikill Gunnar Gunnarsson var, og mikilsmetinn félagi, í nasistasamkundunni Nordische Gesellschaft. Sem dæmi má nefna, aðallega þar sem þeir sem mest hafa skrifað um Gunnar hafa misst af því , að veturinn 1936-37 hélt félagið 75 fundi og jafnmörg erindi voru flutt á þeim. Þriðjungur allra erindanna, eða 25 talsins, voru flutt af engum öðrum en Gunnari Gunnarssyni, bændasyninum frá draumsýnarlandinu Íslandi. Félag, sem m.a. gaf út tölublaðið Rasse, notaði skáld frá Íslandi sem aðalsprautuna á samkomum sínum. Þess má geta að Heinrich Himmler sat í stjórn Nordische Gesellschaft.

Fornleifafræðingar teikna gjarna prófíla af viðfangsefnum sínum. Íslendingar eru hins vegar enn ekki búnir að sjá hinn sanna prófíl Gunnars Gunnarssonar, þrátt fyrir doðrant Jóns Yngva Jóhannssonar um Gunnar (2011). Hann kemst að þeirri niðurstöðu að Gunnar Gunnarsson hafi ekki verið nasisti.

Meðan nasistar brenndu bækur á torgum, héldu þeir bókasýningu, (les áróðurssýningu), í Kaupmannahöfn í september 1937. Þar komu allir þeir sem mætur höfðu á nasismanum og þeim helstu var boðið  í þýska sendiráðið í Kaupmannahöfn, þar á meðal Gunnari Gunnarssyni,  "bóndasyni", enda Gunnar vel styrktur af þessu sendiráði 3. Ríkisins. Þetta kom fram í tímaritinu Norden, sem nasistar gáfu út.

Gunnar horfir til veðurs 1938. Hann var hvorki vísari né víðsýnni en það, að hann sá friðsamlega vinda blása frá Þýskalandi.

 

Gunnar Gunnarsson bankaði upp á hjá Adolf Hitler í Berlín í byrjun árs 1940 og fékk einkafund. Sömuleiðis óskaði  hann sama ár eftir því að lesa upp úr verkum sínu fyrir þýska hermenn. Hann ætlaði karlgarmurinn í samkeppni við Marlene Diedrich um hylli.  En samt geta menn verið að neita því að hann hafi verið nasisti. Hvað þarf til? Halda menn að aðeins þeir sem hafi starfað í útrýmingarbúðum nasista hafi verið nasistar?

Himmler og Rosenberg yfirmenn Gunnars í Nordische Gesellschaft

Samstarfsmenn Gunnars í Nordische Gesellschaft gerðu útrýmingarbúðirnar að veruleika. Gunnar ritaði einum þeirra, Alfred Rosenberg, forstöðumanni Nordische Gesellschaft eftir 1933, bréf árið 1938, þar sem hann lýsir ánægju sinni yfir innlimum nasista á Austurríki. Gunnar skrifaði:

"Hræsni hinna gömlu Friðarpostula veldur mjer meiri hugaræsingu, en hitt, hvernig Þýskaland fór nú að ráði sínu."

Þetta hefur Rosenberg örugglega þótt vænt að heyra, en hann var hengdur i fyrir stríðsglæpi  árið 1946. Svo furðar það fræðimenn af yngri kynslóðinni á Íslandi, að setulið bandamann á Íslandi hafi rannsakað húsakynni Gunnars Gunnarssonar og heimsótt hann á Skriðu.

Hvern er verið að reyna að plata, eða vill fólk láta plata sig? Af hverju geta rithöfundar eins og Böðvar Guðmundsson og Einar Már Guðmundsson ekki séð nasistann í Gunnari Gunnarssyni. Af hverju er hann stikkfrí. Aðrar þjóðir dæmdu vægðarlaust listamenn þá sem höfðu gert hosur sínar grænar gagnvart 3. ríkinu. Á Íslandi fengu menn sem dufluðu við nasismann stórriddarakross með stjörnu.

Gunnar sagði þetta í viðtali við á Gads Danske Magasin árið 1938:

„Ég er ekki stjórnmálamaður, en minn stuðningur við Þýskaland varð til á þann hátt, að mér fannst að það væri vansæmandi að meðhöndla mikilhæfa þjóð eins og Þjóðverja á þann hátt sem gert var í Versailles og Genéve. Ég hef verið nálægur og horft á Þjóðverja í þeirra ýtrustu neyð, þar sem allur fjöldi fólksins hálfsvalt og hafði varla klæði til að hylja með nekt sína. Og ég hef séð Þjóðverja rísa upp undir hinni nýju forystu með aðdáunarverðum krafti og öðlast frelsi, það frelsi sem við Norðurlandabúar vorum fyrstir til að syngja lof. Auðvitað eru þættir þróunarinnar, sem ég hefði óskað öðruvísi, en - það er svo auðvelt að dæma og fordæma [...] Við Norðurlandabúar teljum okkur skylt að framfylgja réttlætinu, en það verður að vera hlutlaust. Við hefðum t.d. ekki átt að taka sæti í Alþjóðasambandinu sem fullgildir aðilar, meðan hinn stóri nágranni okkar í suðri átti einungis rétt á helmingsþátttöku, menningarþjóð sem hefur gefið okkur svo mikilvæg andleg verðmæti í tímanna rás [...] Ég trúi í raun og veru á friðarvilja Þjóðverja ..."

Þetta sýnir okkur kannski bara að Gunnar var vitlaus og einfaldur bóndason? Það held ég ekki að Gunnar Gunnarsson hafi verið.

Er Gunnar hafði verið á einum af fyrirlestraferðum sínum í Þýskalandi 1940, þar sem hann trauð upp í að minnsta kosti 40 borgum og bæjum, náði dagblaðið Berlingske Tidende tali af honum. Gunnar greindi frá viðdvöl sinni hjá Hitler:

„Já, ég ræddi persónulega við ríkiskanslarann. Hitler ræðir mjög blátt áfram og eðlilega við gesti sína, rétt eins og þar röbbuðu saman góðir kunningjar. Og umræðuefnið eru sömu hlutir og atburðir og - kringumstæður - sem koma okkur öllum við. Hann minntist á hinar miklu byggingarframkvæmdir um allt ríkið sem nú lágu niðri vegna stríðsins, og hann sagði, að auðvitað hefði hann aldrei óskað stríðs sem mundi raska hinni miklu ráðgerð hans um uppbyggingu Þýskalands."

Fyrr á 20. öldinni hafði Gunnar reyndar einnig heillast af Stalín, hinum stóra böðlinum, sem hann hitti sem blaðamaður í Moskvuborg árið 1927.

Veður einhver í villu um, hvers konar karl Gunnar Gunnarsson var? Nei, hann var ekkert edjót! Hann var blindur nasisti.

Þessi feiti, ljóti morðingi, Hinrich Lohse, kom með Gunnari Gunnarsyni af fundinum með Hitler 20. mars árið 1940:

Der isländische Dichter Gunnar Gunnarson wurde im März 1940 vom Führer und Reichskanzler empfangen. Gunnarson und der Leiter der Nordischen Gesellschaft, Gauleiter [Hinrich] Lohse, verlassen die Reichskanzlei (geleitet von einem Offizier der Leibstandarte SS Adolf Hitler);

Ljósmynd mun vera til af þessum merka viðburði. Hinrich Lohse bar ábyrgð á morðum á gyðingum í Lettlandi, bæði á þarlendum gyðingum og öðrum. Alveg er ég viss um að svona upplýsingar séu ekki tiltækar á Gunnarsstofu á Skriðuklaustri.

Athugasemdir

[Jón Valur Jensson, 16.8.2012 kl. 21:50]

Hörð ályktun hjá þér, dottore!

Auðblekktur hefur Gunnar Gunnarsson bersýnilega verið -- enn ein áminningin um, að afburðamönnum (slíkur var hann, rétt eins og Hamsun) ber aldrei að trúa og treysta blint. En að hann hafi verið harðsvíraður nazisti -- og aðhyllzt þar með racistahugmyndir þeirra, viðurstyggilegt Gyðingahatur, ofsóknir og útrýmingarherferð og þá hugmynd að Þjóðverjar hefðu rétt til að valta yfir allar sínar nágrannaþjóðir -- hygg ég að sé bæði ósannanlegt og í ósamræmi við veruleikann.

Það grófasta, sem ég hef séð frá honum í nazistíska átt, er í raun þessi ummæli hans um hertöku Austurríkis, sem var vitaskuld svívirðileg, enda aðdragandinn glæpsamlegur af Þriðja ríkisins hálfu. En fróðlegt væri að sjá samhengi þeirra ummæla, þ.e. meira úr þeim (ég á ekki bók Yngva).

Þú talar hér í bloggi á hinni vefsíðunni um "blinda ást Gunnars Gunnarssonar á nasismanum," en ætli það sé ekki rétt að tala um ást hans á Þjóðverjum/Germönum og hlálega blindni gagnvart nazista-valdhöfunum, ekki sízt vegna "friðunar" (í krafti einræðis) og virkjunar atvinnulífsins, raunar að miklu leyti vegna hervæðingar.

Svo held ég að þú segir ekki allt hér, sem segja þarf um fund hans og Hitlers.

Ciao.

[Jón Valur Jensson, 16.8.2012 kl. 21:52]

Oder : Mit freundlichem Gruß !

[FORNLEIFUR, 16.8.2012 kl. 22:44]

Hér er heimildin sem þú spyrð um, og er hún ekki fengin hjá Yngva. Sumt af þessu hef ég fengið úr nýlegri danskri kandídatsritgerð um Nordische Gesellschaft.

Ef eitthvað meira er til um fund Gunnars við Hitler, þætti mér, og vonandi forstöðumönnum Skriðuklausturs sem ekki greina frá neinu slíku www.skriðuklaustur.is, vænt um að heyra það.

Arrivederci a (per) Lei, signore Giovanni

Miðvikudagur 27. Apríl 1938.

MORGUNBLAÐIÐ

Gunnar Gunnarsson skrifar um sameiningu Þýskalands og Austurríkis í brjefi til „Nordische Gesellschaft" í Lübeck, kemst Gunnar Gunnarsson skáld,  svo  að orði: Leyfið  mjer fyrst  að  láta í   ljós  gleði  mína  yfir hinum mikla viðburði,  sameiningu    Austurríkis    við    Þýskaland. Þjer vitið, að jeg hefi um langt skeið  litið  á þessa sameiningu, sem sjálfsagða. Nú get jeg óskað yður hjartanlega til hamingju   með   það,   að   þetta gerðist jafn fljótt og raun varð á — og að það gerðist á friðsamlegan hátt. Hjer voru menn dálítið vandræðalegir og skildu þetta ekki! Menn höfðu í fullri alvöru   trúað    því,    að    þýskir menn  í   Austurríki,   sem  vildu hverfa   heim    til    Þýskalands, væru   aðeins   lítill   minnihluti. —   Getur   maður   vænst   skilnings af mönnum, sem ekki vita betur?  Mikið veður var gert út af „ofbeldinu", sem austurrísku  þjóðinni  hafi  verið sýnt, og órjettinum, sem henni hafi verið gerður. En ekki var talað um ofbeldi og órjettlæti, þegar Austurríki var á sínum tíma hindrað  í  því, að sameinast Þýskalandi. Hræsni hinná'gömlu „friðarpostula" veldur mjer meiri hugaræsingu,  en hitt, hvernig Þýskaland fór nú að ráði sínu".Sjá einnig hér http://timarit.is/view_page_init.jsp?pageId=1235827

[Vilhjálmur Eyþórsson, 16.8.2012 kl. 22:46]

Ég veða að taka undir með Jóni Val. Gunnar var áreiðanlega ekki hlynntur gyðingamorðum og öðrum ódæðsverkum nasista. Um innlimun Austurríkis er það að segja, að alveg yfirgnæfandi stuðningur var við hana meðal alls almennings í Austurríki (að gyðingum frátöldum, að sjálfsögðu), enda er Austurríki í raun aðeins eitt af gömlu þýsku ríkjunum, sem vegna stjórnmála, sögu og af ýmsum öðrum ástæðum var ekki sameinað öðrum hlutum Þýskalands 1870-71.

[FORNLEIFUR, 16.8.2012 kl. 23:13]

Vilhjálmur, Gunnar las örugglega verk Rosenbergs og greinar Himmlers, svo honum má hafa verið ljós skoðun þeirra á gyðingum, og ekki andmælti Gunnar henni svo ég viti til.

Eins og skoðun sumra Austurríkismanna er í dag, sýnist manni því miður að margir þeirra sakni meira landa síns, Hitler, en gyðinganna sem þeir myrtu í sameiningu. 

Var faðir þinn nokkuð í Nordische Gesellschaft? Hér er heimild sem nefnir hann http://homepages.uni-tuebingen.de/gerd.simon/ChrSchweizer2.pdf heimild 19390504, bls. 14.

[Vilhjálmur Eyþórsson, 16.8.2012 kl. 23:30]

Eins og pabbi sagði oft: „Sannur aríi er grannvaxinn eins og Göring, hávaxinn eins og Göring og ljóshærður eins og Hitler“. Hann vildi aldrei koma nálægt nasistum eða nasimsma yfirleitt og ömurlegur rógur að bera slíkt upp á hann. Hann var hins vegar, svipað og Gunnar Gunnarsson alls ekki óvinveittur Þjóðverjum sem slíkum óháð öllu nasistahjali.

[Vilhjálmur Eyþórsson, 16.8.2012 kl. 23:31]

Ég meinti að sjálfsögðu Hávaxinn eins og Göbbels.

[Jón Valur Jensson, 17.8.2012 kl. 02:24]

Göring var nú ekki beinlínis grannvaxinn á efri árum!

(Það átti miklu fremur við um væskilinn Hitler, sjá neðar. En var hann ljóshærður???!)

[FORNLEIFUR, 17.8.2012 kl. 06:59]

Sjáið frekari upplýsingar um foringjann sem fylgdi Gunnari Gunnarssyni til Hitler árið 1940, sem ég hef bætt við grein mína hér að ofan.

Fornleifafræðingar grafa víða, enda hefur sá sem þetta skrifar unnið í nokkur ár fyrir Simon Wiesenthal Center í Jerúsalem.

[Jón Valur Jensson, 17.8.2012 kl. 11:47]

Gott hjá þér, dr. Vilhjálmur.

[Gunnar Th. Gunnarsson, 17.8.2012 kl. 12:48]

Ég tek líka undir með Jóni Val, full gróft hjá þér að tala um hann sem blindan nasista.

Ég hnaut um nýyrði hjá þér, a.m.k. man ég ekki eftir að hafa séð það áður; "hugsletta". Flott orð

[Gunnar Th. Gunnarsson, 17.8.2012 kl. 12:50]

Laxnes var hins vegar blindur kommúnisti lengi framan af og hálf óhugnanlegt hversu lengi hann afneitaði því ekki.

[FORNLEIFUR, 17.8.2012 kl. 13:17]

Jú, Gunnar, ég held að nafni þinn hafi verið frekar blindur í trúnni.

Hugsletta er að því ég held ég ekki nýtt orð. En ég tek þó heiðurinn fyrir það ef enginn vill eiga hann. Ég fæ nefnilega oft hugslettur.

Laxness er allt önnur saga, en auðvitað afneita menn öllum feilnótum sem þeir hafa slegið með verstu böðum heims. Þetta var óheppilegt fyrir þá báða, greinda og frábæra listamenn. En þeir höfðu veilu þegar kom að trúnni á mátt og megin mannsins í útópíunum.

[Ingimundur Kjarval (IP-tala skráð) 19.8.2012 kl. 21:54]

Ekki vissi ég að Gunnar var í fyrirlestrarferð í Þýskalandi og talaði við Hitler árið 1940 eftir að stríðið byrjaði, vissi að hann hafði hitt Hitler fyrir stríð.

[FORNLEIFUR, 20.8.2012 kl. 10:41]

Ingimundur, þeir sem eiga að segja okkur sögu Gunnars, á stofnun sem er rekin fyrir peninga skattgreiðenda, hafa nú ekki verið að ota þessum upplýsingum að okkur. Það sem menn vilja ekki heyra, uppgötva menn ekki.

Bókmenntafræðingurinn sem ritaði ævisögu Gunnars, er heldur ekki sagnfræðingur. Hann kann líklega ekki að fara með svona heimildir, og hefur líklega ekkert verið að ómaka sig við að leita að þeim ef hann hefur verið sama sinnis og Böðvar Guðmundsson, Einar Már Guðmundsson (og auðvitað Skyum Nielsen)

[Jón Valur Jensson, 20.8.2012 kl. 18:22]

Eruð þið þá að segja, að Gunnar Gunnarsson hafi hitt Hitler TVISVAR að máli?

[Vilhjálmur Örn Vilhjálmsson, 20.8.2012 kl. 23:04]

Ekki hef ég sagt það! En kannski væri vert að rannsaka það. Gunnar hitti líka Himmler og Alfred Rosenberg, enda voru þeir yfirmenn Nordische Gesellschaft.  Honum þótti vænt um nasismann honum Gunnari.

[Skúli Björn Gunnarsson (IP-tala skráð) 21.8.2012 kl. 10:47]

Þakka þér fyrir hamingjuóskirnar varðandi minjasvæðið hér á Skriðuklaustri og vertu ætíð velkominn hér á staðinn til að fræðast um klaustrið og Gunnar Gunnarsson. Við gætum meira að segja sagt þér eitt og annað um Þýskalandstengsl Gunnars þó að seint læri sá sem alfróður er. Hér hefur aldrei verið farið í grafgötur með að Gunnar hafi hitt Hitler eftir að styrjöldin hófst og farið margar ferðir til Þýskalands á tíma Þriðja ríkisins. Hvort það gerir hann að nasista verða menn að gera upp við sig sjálfir. Við bæði segjum frá þessu í leiðsögn okkar og síðan hanga hér uppi veggspjöld um þetta og inni á heimasíðunni eru meira að segja upplýsingar um Þýskalandstengslin.

http://skriduklaustur.is/~skridukl/index.php?option=com_content&view=article&id=72%3Agunnar-og-tyskaland&catid=36%3Alifshlaupie&Itemid=62&lang=is

Ég skil eiginlega ekki hvernig það hefur farið framhjá jafn glöggskyggnum manni og þér, Fornleifur, að hér ríkir ekki sú þöggun og þögn sem þú vilt vera láta.

En endilega heimsæktu okkur í Fljótsdalinn við tækifæri og ég skal bjóða þér upp á kaffibolla og kökusneið meðan við köfum ofan í líf og verk Gunnars Gunnarssonar.

Skúli Björn Gunnarsson

forstöðumaður Gunnarsstofnunar á Skriðuklaustri

[Jón Valur Jensson, 21.8.2012 kl. 23:54]

Gott hjá Skúla Birni !

[FORNLEIFUR, 22.8.2012 kl. 08:44]

Sæll Skúli Björn, ég hef vissuleg séð upplýsingar ykkar um Gunnar og mér finnast þær ekki nægilegar. Þið eruð t.d. ekki með myndina af því er Gunnar kemur af fundinum með Hitler 20. mars 1940, eða lýsingu á því hvað Gunnari fannst um þann fund. Hægt væri að bæta úr því.

Ýmsar aðrar myndir eru þarna áhugaverðar á síðunni, t.d. þar sem Gunnar situr með konu og manni. Hún er sögð heita "Sammelroth" á myndinni, en hún hét reyndar Ellen Schwarz-Semmelroth og var svæsinn nasisti, ritstjóri NS Frauenwarte, kvennablaði með áróðursefni nasismans, m.a. um kynþáttastefnu. Kannski hefur frú Gunnarsson fengið þetta blað og lesið í stað þess að sökkva sér í Familens Journal eða Hjemmetheima í Danmörku? Eiginmaður Semmelroth var heldur ekki af verra taginu, Dieter Schwarz, sem gaf út bækur eins og , þessa og þessa sem Jóni Vali ætti sértaklega að líka.

Myndin af "Gunnari með aðdáendum sínum" er frá því eftir stríð.

Svo má vera ljóst að "Dr. Müller" á mynd 5 og 6 er ekki einn og sami maðurinn. Áhugasamir lesendur gætu hugsanlega spurt, hverjir þeir Wronski, dr. Müller og Skovsen (Skousen?) voru, og hvað Gunnar var að bauka með þeim? Eða kannski er ég einn Íslendinga um að vilja vita það?

Blunck sem situr með Gunnari og Frau Semmelroth var hins vegar vel þekktur í samtíð sinni og mælti á 4. áratugnum gegn stefnu nasista gegn gyðingum sem þjónað höfðu (dyggilega) í herjum þjóðverja í Fyrri heimsstyrjöld. Annars var hann mikill nasisti, þó ekki flokksbundinn Sjá hér.

En Gunnar hitti miklu fleira og valdameira fólk í Þýskalandi á mörgum ferðum sínum þangað. Við getum rætt það yfir kaffibollanum og stríðstertu, þegar ég kemst til Íslands næst. Ég hef nú ekki verið mikið austur á Héraði nýlega, og held jafnvel að ég hafi verið þar síðast kringum 1990. Svo tími er til kominn. En ég sel ekki eins vel og Gunnar, svo langt gæti orðið þangað til ég fæ ferðatækifæri.

Og hver veit, kannski tek ég Jón Val Jensson með mér í vísitasíu þá, svo hann geti stenkt vígðu vatni á klaustrið.

[FORNLEIFUR, 22.8.2012 kl. 09:35]

Og enn eitt atriði fyrir kaffið á Skriðu: Eutiner Dichterkreis, sem Gunnar tilheyrði, var samkvæmt nýrri rannsókn að: dieser eine Vereinigung war, die sich „bewusst den Zielen der NS-Regierung“ untergeordnet habe und „in Hinsicht auf seine Ursprünge, Selbstdarstellung, Erzeugnisse und Angehörigen als nationalsozialistisch zu bezeichnen“ ist.

Þú kemst ekkert undan því, Jón Valur. Skálið Gunnar Gunnarsson var nasisti.

[Jón Valur Jensson, 22.8.2012 kl. 12:00]

Ég verð að svara þér seinna, en þú hefur ekki sannfært mig ennþá, doktor! Verð a.m.k. fyrst að líta á þetta, þegar tækifærið gefst til. Hef heldur ekki tíma núna til að ath. hvaða bækur þetta eru sem þú fullyrðir að mér ættu að líka!

[FORNLEIFUR, 22.8.2012 kl. 14:05]

Þegar þú hefur tíma, Jón, sérðu að eiginmaður konunnar sem situr með Gunnari á ljósmynd Gunnarsstofnunar skrifaði ómerkilegt rit um hve vondir kaþólikkar, gyðingar og frímúrarar voru. Eitt rita sinn kallaði hann Die Grosse Lüge des politischen Katholizismus. Þú sérð vonandi, hvers eðlis Eutiner Dichterkreis var.

[Jón Valur Jensson, 22.8.2012 kl. 20:05]

Ég hef nú lesið þessa Wikipediu-grein í heild um Eutiner-skáldahópinn, þ. á m. það sem þar er sagt um róttækar ályktanir kanadíska fræðimannsins Lawrence D. Stokes um hann, en ennþá sé ég enga sönnun fyrir því, að Gunnar hafi verið nazisti, enda er það hvergi fullyrt þar beinlínis um hann, þótt sumir félagsmannanna hafi jafnframt verið félagar í nazistaflokknum. Við þurfum grjótharðar sannanir, doktor!

[Vilhjálmur Örn Vilhjálmsson, 23.8.2012 kl. 06:12]

Þú veist sem sagt betur en L.D. Stokes, sem er sérfræðingur í Eutiner-hópnum.

Þú villt greinilega aðrar skilgreiningar á því að vera nasisti og meðhlaupasveinn þeirra en flestir aðrir hafa. Kemur það ekki á óvart, og dæmi ég þar út frá trúarstefnu þinni. Kaþólikkar í Póllandi eru enn að dreifa gyðingahatri. Kaþólikkar hjálpuðu stríðaglæpamönnum að fela sig og kaþólikkar frömdu ófyrirgefanlega glæpi gegn mannkyninu og gyðingum í aldaraðir. Mórall sumra kaþólikka er mér óskiljanlegur.

En mórall margra Íslendinga er líka einkennilegur. Á Íslandi í dag er alls kyns gyðingahatur. Menn lepja upp slepjuna úr Passíusálmunum og vinstrimenn eru fullur af hatri í garð Ísraelsríkis og þar á meðal góðir kaþólikkar. Vinstri grænir og Samfylkingarmenn lesa Passíusálmana í kirkjum og eru stikkfrí í trúleysinu til að geta lesið ósómann. Íslendingar vildu ekki trúa sekt stríðsglæpamanns sem bjó á Íslandi og dó þar árið 1992. Íslenski Rauði Krossinn tók það ekki í mál að hjálpa öðrum í stríðshrjáðri Evrópu en Íslendingum, sumum þeirra nasistum sem unnið höfðu í fangabúðum nasista. Á Íslandi var svo mikið útlendingahatur að gyðingar sem fluttu til landsins þorðu ekki að segja frá uppruna sínum; fengu fölsuð fæðingarvottorð til að börn þeirra þyrftu ekki að þjást. 

Vandamálið er, að Íslendingar telja sig betri en aðra... Þess vegna telur t.d. Einar Már Guðmundsson ástæðu til að segja Dönum frá því að Gunnar Gunnarsson hafi ekki verið nasisti, án þess að geta fært fyrir því nokkur rök. En sumir á Íslandi töldu líka að Stalín hefði verið guð.  

[Jón Valur Jensson, 23.8.2012 kl. 17:44]

Ef L.D. Stokes fullyrðir einhvers staðar sérstaklega um Gunnar -- og með rökum eða heimildum -- að hann hafi verið nazisti, þá skal ekki standa á mér að samþykkja þá fullyrðingu hans. En ekki hefur þú tilfært slíkan vitnisburð frá Stokes, Vilhjálmur, og engar skýrar sannanir sé ég ennþá fyrir þessari áherzlu þinni.

Og fráleitt er af þér að blanda kaþólsku minni inn í þetta, eins og þú gerir þó hér. Enga samúð hef ég með gömlu Gyðingahatri sumra Pólverja -- veit vel, að Gyðingahatur var þar landlægt meðal sumra, en sjálfur er ég mikill meðhaldsmaður Gyðinga og Ísraela, eins og þú átt að vita. Skrifaðu því ekki þvert þér um upplýstan hug þinn í því efni, vinur.

Ég fer hér ekki út í söguleg atriði, sem þú setur fram með alhæfingum, og ekki kemur mér neitt við andúð vinstri róttæklinga hér á Ísrael; ég hef jafnlítið álit á þeim og þú.

En ranglega hefurðu að mínu mati túlkað Passíusálmana, þeir eru ekki andgyðinglegir frekar en Jóhannesarguðspjall, sem er skrifað af Gyðingi.

Vel má vera, að Einar Már Guðmundsson hafi engin rök fyrir því, að Gunnar Gunnarsson hafi ekki verið nazisti, en það gerir GG samt ekki sjálfkrafa að nazista. Til að telja hann hafa verið það þurfum við RÖK og ótvíræðar HEIMILDIR. Er það ekki í takt við þínar vísindaaðferðir, doktor minn?

[Jón Valur Jensson, 23.8.2012 kl. 17:48]

Ég myndi hrósa því sem meiri háttar fræðafundi, ef þú kæmir fram með ný gögn í þessu máli, sem leiða myndu sannleikann í ljós, hver sem hann væri, jafnvel þótt mér væri enginn fögnuður í hug að vita (hugsanlega) að G.G. hefði verið ótíndur nazisti.

[Jón Steinar Ragnarsson, 2.9.2012 kl. 05:50]

Eitt er að menn hafi hrifist af útópíum á frumskeiði þeirra og vissulega gerðu það margir með Nasismann. Þá vissi enginn til hvers hann leiddi, hvað þá 1938.  Ekki er hægt að fjalla í ljósi sögunnar sem ekki var fyrirséð þá. Annað er svo hvort Gunnari snerist hugur í aðdáun sinni þegar hinar myrku staðreyndir urðu opinberar.  Er eitthvað til sem sýnir að Gunnari hafi snúist hugur síðar? Ef ekki, þá var hann líklegast Nasisti eins og eldheitir Stalínistar á Íslandi kvikuðu aldrei frá lofsöng sínum um þann morðhund. Ef hinsvegar svo var, þá er líklegast að hann hafi einfaldlega verið blindur og auðtrúa bóndastrákur sem hélt að Evrópa og þýskaland sæi enda á aldalöngum hremmingum.

Mér dettur oft í hug ESB sinnar samtímans í svona samanburði. Hvar skyldu þeir enda í ljósi sögunnar þegar feita frúin syngur?  Eru þeir kannski bara samskonar brjóstumkennanleir einfeldningar? Ég held það.

Ég sé engan grunn til þess að ætla að Gunnar hafi hatað Gyðinga eða viljað kalla dauða yfir þá milljónir annarra sakleysingja.  

Við skulum sjá hvað kemur út úr kaffisamsætinu á Klaustri Villi. Þiggðu það boð.  

[Jón Steinar Ragnarsson, 2.9.2012 kl. 05:55]

Hvað áttu annars syndir feðranna að erfast í margar kynslóðir samkvæmt trú þinni? Sjö sinnum sjö eða sjö sinnum sjötíuogsjö? Man það ekki, en þetta virðist þó vera ríkjandi þema í þankaganginum varðandi þennan harmleik. Ég hef allavega séð þig sekann um hann.

Let it go.

[Jón Valur Jensson, 2.9.2012 kl. 06:12]

Athyglisvert innlegg frá Jóni Steinari --- en ekki næ ég þessari feitu frú syngjandi!

[Jón Valur Jensson, 2.9.2012 kl. 06:13]

Þarna var ég að svara fyrra innleggi Jóns Steinars, hafði þá ekki séð það síðara (og síðra!).