Burrr

Hér kemur loks grein fyrir ykkur sem hafið gaman af bílaleik.

Bílafornleifafræði er samt ekki mín sérgrein. Ég veit sannast sagna mjög lítið um drossíur. Það er þó ekki svo að skilja að ég hafi ekki áhuga á fögrum bílum. Til dæmis keypti ég hér um árið einstakan bækling (haandbog) frá 1922 sem fylgdi Ford bílum í Danmörku og eru menn sífellt að suða í mér um að selja sér hann. Ég er bara einn af þessum körlum sem á bíl til að þurfa ekki að keyra með strætó og sem veit að kaggi eykur ekki kvenhyllina og tryllitæki lokka aðeins að léttkeyptar konur og vafasama drengi. Ást Íslendinga á bílum er óhemjuleg svo ég segi ekki of mikið.

Nú er ég líka í vanda staddur og þarf á hjálp að halda hvað varða braggabifreiðina til hægri á myndinni hér að ofan. Myndin var tekin sumarið 1934. Mér sýnist að bíllinn, sem bar skráningarnúmerið RE543, hafi verið lagt við veginn, sem huganlega er Kleppsvegur, og að þetta sé yfirbyggður Ford T. Þessi alíslenska hönnun hefur nú vart verið gjaldgeng á rúntinum, en hún var langt á undan sínum tíma.

En hvaða furðubíll var þetta á leið austur (eða jafnvel með vélarbilun þar sem enginn bílstjóri er í bílnum), og veit einhver hver smíðaði yfirbygginguna á bílinn?

Opelinn, sem mér sýnist að aki vestur Kleppsveg, var hins vegar eðalkaggi sem fluttur var sérstaklega til Íslands af nasistanum Paul Burkert, svo hann gæti ferðast um landið með stíl. Burkert sem leit út eins og nefbrotinn SS-maður, ferðaðist jafnan í síðum, svörtum leðurfrakka og naut greinilega ákveðinnar kvenhylli á Íslandi eins og um hefur verið rætt hér og hér. En kannski var það kerran hans sem gerði útslagið. Hvernig leit bílstjórinn á Opelnum út, þá er hann átti (giftur maðurinn) í ástarsambani við rauðhærða ungpíu frá Íslandi sem húkkaði helst karla sem heilsuðu um hæl. Eins og þið lesendur mínir getir séð var hann ekki beint glæsilegur og hefur einhver kommúnisti líklega nefbrotið hann. Blæjubíllinn hefur því vafalaust verið honum ágæt framlenging.

Ökumaður bifreiðarinn RE543 átti sýnilega ekki hinn minnsta sjens í Njósna Paul. Íslenskir lúðar í heimameikuðum braggabíl dóu líklega endanlega út eftir stríð og þá var Nasistaópelinn líka á lágu gengi meðal vergjarnra, íslenskra kvenna. Þá komu einu gjaldgengu kaggarnir frá Vesturheimi.

Fornleifur veit þegar heilmikið um Hr. Flick á ferðalagi hans á Íslandi; Til að mynda að Opel Aktiengesellschaft i Rüsselsheim lánaði þýska njósnaranum bifreiðina.

En mikið væri Leifur forni nú glaður, ef einhver gæti frætt hann aðeins betur um braggabílinn RE543. Ekki væri dónalegt að fá að vita í leiðinni hve mikillar kvenhylli eigandinn naut. Kannski lá hann á keleríi á þægilegu aftursætinu, og ekki er ólíklegt að Hr. Flick (Burkert) hafi gefið honum far í bæinn.

Viðbót 4. febrúar 2020.

Bifreiðin með flugvélaklæðningunni er til á ljósmynd sem Ljósmyndadeild Þjóðminjasafnsins varðveitir og sem kemur hún æí safnið frá Safnaramiðstöðinni heitinni. Við bílinn á þeirri ljósmynd stendur Björn Eiríksson (1901-1981); Sjá hér á Sarpi má lesa um þá mynd.

Athugasemdir

[Jón Steinar Ragnarsson, 14.9.2019 kl. 17:07]

Meira að segja númeraplatan er heimatilbúin. 

Voru nasistar ekki að skáta hér um ísland sem væru þeir í buðarrápi að skoða freistandi vöru? Voru þeir ekki líka frumkvöðlar svifflugfélagsins og notuðu sem skálkaskjól?

[Bjarni Gunnlaugur (IP-tala skráð) 14.9.2019 kl. 20:07]

Þetta er farþegarými junkers flugvélar flugfélags Íslands nr. 2. 

Sjá t.d. æfisögu Sigga flug!

[FORNLEIFUR, 15.9.2019 kl. 03:54]

Jú rétt er það Jón Steinar. Þeir voru ekki allir sem þeir voru séðir - frekar en embættismenn þeirra úr ESB í dag, t.d. fyrri skrifstofustjóri ESB í Reykjavík sem laug um menntun sína og fyrri störf. En nú hef ég meiri áhuga á íslenskri bílasmíð árið 1934. Eru bílasmiðir í ættgarði borgastjórans í Reykjavík. Dýrindis bárujárn og hreinræktað braggalag. Mér sýnist jafnvel að bílasmiðurinn hafi notað galvaníserað járn sem notað var í þvottabretti. Hann hefur því hugsanlega einnig verið framsýnn um ástand vega á landinu um ókominn tíma.

[jakob jónsson (IP-tala skráð) 15.9.2019 kl. 10:54]

Þetta er T Ford, sem hugvitssamur eigandi notaði klæðningu af flugvél sem kölluð var Veiðiblallan, til að byggja yfir bílinn. 

[FORNLEIFUR, 15.9.2019 kl. 14:00]

Sæll Jakob, þekkirðu einhverjar ritaðar heimildir um þessa smíði úr klæðningu Veiðibjöllunnar?

[jakob jónsson (IP-tala skráð) 15.9.2019 kl. 14:45]

Í þeirri ágætu bók, Íslenska bílaöldin er mynd af bílnum og sagt hvaðan efniviðurinn í bygginguna er kominn, en lítið meira.

[FORNLEIFUR, 16.9.2019 kl. 05:16]

Er þetta sama ljósmyndin sem er í Íslenska Bílaöldin? Því ég á ekki þá bók. Myndina skánaði ég úr bók eftir Burkert. Mikið væri gaman að fá að vita meira um hvernig flugvél (var hún ekki þýsk?) varð að yfirbyggingu á bíl. Maður sér að hurðaumbúnaðurinn á flugvélinni hefur ekkert verið breytt

[Þorvaldur S (IP-tala skráð) 18.9.2019 kl. 13:45]

https://www.google.com/url?sa=i&rct=j&q=&esrc=s&source=images&cd=&ved=2ahUKEwiZip69wNrkAhWOz4UKHY3vARoQjRx6BAgBEAQ&url=http%3A%2F%2Fsnorrason.is%2Fmain.php%3Fg2_itemId%3D44002&psig=AOvVaw02iHo7zdmx-w3V7L1jYZMo&ust=1568900639994247

[FORNLEIFUR, 29.9.2019 kl. 07:30]

Þakka þér Þorvaldur. Ég var búinn að sjá þessa mynd.