Fljúgandi Furðuhlutir

Fyrir rúmum 50 árum síðan sýndi RÚV þáttaröð breska, sem kallaðist UFO - eða Fljúgandi Furðuhlutir á Íslensku.

Þessir þættir vöktu afar mikla lukku hjá drengjum og jafnvel stúlkum líka. Íturvaxnar starfskonur Varnarliðs Breska heimsveldisins gegn Fljúgandi Furðuhlutum í náinni framtíð (1980) heillaði einnig fullvaxta karlpening sem þroskast hafði aðeins meira í neðri hlíðum en 10-11 ára skólastrákar. Karlpeningurinn í Varnarliði Breska Heimsveldisins gegn FF var hins vegar frekar kvenlegur og höfðaði því mjög til flestra íslenskra kvenna, sem vilja að karlarnir líkist þeim í einu og öllu, séu í sama launaþrepi þó þær séu með minni menntun, og séu helst ekki hærðir á bringunni. Þetta var því á allan hátt mjög vinsæl sjónvarsþáttaröð á show sem og á landi.

FB-síða ein sem kallast THE VERY BEST OF BRITISH AND IRISH TV  FILM AND FILM minntist í gær þessarar þáttaraðar sem framleidd var á árunum 1968-70. Ég var fljótur að klína mér í fyrsta komment snemma í morgun. Orð mín voru túlkuð sem orð spámanns hafa greinilega eflt kynæði Breta mjög, ef dæma má fjölda athugasemda við blásaklausri athugasemdinni frá mér um að konan á ljósmyndinni hér fyrir ofan væri með varalitahaldara á belti sínu. Menn fóru að skrifa um "Kameltær"?? og aðra álíka vitleysu.

Hér getur gamalt fólk, sem og ungt, farið inn og séð alla þættina frá 1970. Poppið áður en sýningin hefst - og berið fram tilheyrandi, svalandi drykki eins og Miranda, Canada Dry og Fresca, ásamt Lindu súkkulaði, og reynið að skapa appelsínugulan tíðarandann í nóvember 1970 í stofum ykkar, þegar þessi þáttaröð birtist á skjám landsmanna.

Þættirnir áttu að gerast árið 1980. -- Ja, vissulega eru Bretar oft kjánalega bjartsýnir, en spámenn hafa þeir aldrei verið. Við sáum nefnilega ekki geimverur fyrr en miklu síðar með Trump, Boris Johnson, Putin og Volodomyijr. Thatcher og HHG voru hins vegar, og eru, blóðsugur. Ekki má rugla saman þessum tveimur tegundum utanfrákomandi lífvera, sem geeeta valdið uuusla, líkt og Örnólfur Thorlacius sagði ávallt um framandi dýr á þessum árum í Nýjustu Tækni og Vísindum.

Í skólanum mínum fengum við strákarnir að búa til kafbátinn fræga með þotunni fremst, sem leikur eitt af stærstu hlutverkum í þáttaröðinni. Auðun heitinn Einarsson smíðakennari, sem nefndur hefur verið til sögunnar hér á Fornleifi, leyfði áhugasömum að búa til kafbátinn og þotuna. Stúlkurnar fengu aftur á móti að klæðast þrengri flíkum en einatt áður. Það fór þeim bara vel, ef þær höfðu vaxtalagið til þess. Hengilbeinur áttu auðvitað ekki sjéns.