Covid-19 setur á sumt fólk ljóta helgrímu

Kórónufaraldurinn virðist kalla fram það besta í sumu fólki, en því miður draga það versta fram í öðrum. Sumir segja svo sem ekki neitt og ræða aðeins sjálfið, og enn aðrir sýna engar tilfinningar. Það síðastnefnda getur jafnvel verið óhugnanlegra en sum hatursræðan sem þrífst í kófi og óvissunni kringum þennan veirufjanda sem hrjáir sálina í okkur öllum um þessar mundir.

Pestir og gyðingahatur

Löngum hefur einum þjóðflokki verið kennt um flestar pestir, og það er gyðingum. Syndhafurinn með blóraböggulinn er dreginn fram við slík tækifæri svo lítilmótlegar sálir geti upphafið sjálfar sig. Gyðingar verða oft fyrir barðinu í alls kyns umræðu. Það er einnig tilfellið nú - líka á Íslandi.

Menn eins og Egill Helgason, sem hér um árið notaði öll tækifæri til að klína einhverju í gyðinga, hefur alls ekki gert neitt slíkt eftir að veiran fór á stjá á Íslandi. Það voru þeir tímar að honum var ekki sjálfrátt, t.d. þegar hann kallaði fyrirtækið Mossach-Fonseca í Panama oft og iðulega Mossad-Fonseca árið 2016 (sjá hér). Hvað vakti fyrir Agli? 

Þaulkunnugir menn vita að ég er óvenju árrisull og í morgun sat ég á klósettinu og skoðaði skoðanir FB-vina minna, sem eru allir hið besta fólk, upp til hópa. Það furðaði mig nokkuð að sjá, að gamall skólafélagi minn, Einar Gröndal, var með skitukast á heilbrigðisráðherra Ísraels, sem er einn af þessum svörtu herrum sem trúa á beinstýringu að ofan. Einsi Gröndal hafði fallið fyrir lygafrétt um manninn og birti hana - og trúir á eins og nýslegnum túskildingi. Best að vera ekki að vífilengja það sem ég las á klóinu; hér getið þið lesið það - og það smitar ekki, en er slæmt þó ég hafi sprittað það tvisvar.

Hatursnætur hjá Gísla Gunnarssyni

Í miðri heimspestinni gera menn sér ýmislegt til dægradvalar og huggunar. Flest er það uppbyggilegt og menn bera virðingu fyrir fórnarlömbum og ættingjum þeirra. En því miður virðist Covid-19 hafa mjög annarleg áhrif á einsaka mann þó svo að þeir séu ekki smitaðir.

Nokkrir íslenskir karlar hafa lengi safnast saman, stundum 5 og stundum fleiri en 10, og hanga næturlangt á FB síðu fyrrverandi prófessors við HÍ. Það hafa þeir gert lengi. Þeir smita ekki hvorn annan með Covid-19 veirunni enda eru þeir allir smitaðir fyrir af öðrum ólæknandi vírus sem ekkert virðist vinna á.  Þegar þúsundir manna deyja í Kína, Ítalíu og á Spáni er þessum mönnum  mest hugsað til gæluverkefnis sem sameinar þá á mismunandi hátt. Þeir telja sig vera helstu stuðningsmenn Palestínuaraba á Íslandi. Næturgestir Gísla Gunnarsson telja enga líða meira en Palestínumenn. Einatt flýgur gyðingahatur á síðu Gísla.

"Þjóðverjar voru að hugsa um fæðuöflun þegar útrýmingarnar byrjuðu"

Fyrrverandi formaður félags múslíma á Íslandi fer með staðlausa stafi um helförina gegn gyðingum í tengslum við umræðu um fanga í Ísrael og Covid-19. Einn næturgesta Gísla skrifaði eftirfarandi sögufölsun sem athugasemd hjá Gísla Gunnarssyni í umræðu um Covid-19 veiruna sem fór fram fyrr í vikunni á FB Gísla:

"Þjóðverjar voru að hugsa um fæðuöflun þegar útrýmingarnar byrjuðu - fyrst nokkrar milljónir rússneskra stríðsfanga svo gyðingar, Sígaunar, fattlaðir og svo hófust skipulegar útrýmingar á gyðingum þegar annað var búið." (sjá afrit af FB Gísla hér, með umsögn Sverris Agnarssonar). 

Ástæðan fyrir þessari meira eða minna röngu yfirlýsingu um "fæðuöflun" þjóðverja, var næturumræða um COVID-19 hjá Gísla Gunnarssyni.

Þó að sá, sem skrifar þessa bannsettu sögufölsun sé Íslendingur að nafni Ibrahim Sverrir Agnarsson (fyrrum formaður Félags múslíma á Íslandi), ætla ég ekki að bregða út af skoðun minni á íslenskum múslímum og þátttöku þeirra í gyðingahatri sem kemur fram í grein minni í bókinni Antisemitism in the North (sjá bls. 78-79 hér).

Því miður hefur mér oft sýnst að hinn gamli hippi Sverrir Agnarsson, er ungur og ævintýragjarn gerðist hestasveinn og geitahirði morðingjans Ghaddafis, sé greinilega mjög illa að sér í sögu og sér í lagi í sögu múslíma (sjá hér). Vonandi er það eina ástæðan fyrir þessum ógeðfelldu skrifum hans. Annars gerir hann sig sekan um lúmska hatursræðu og heimildafölsun.

Áreiðanleika Sverris er örlítið ábótavant eins og alþjóð má vera kunnugt um. Árið 2017 var Sverri dæmdur skilorðsbundnum dómi og miklar sektir fyrir gróft skattalagabrot (sjá hér). Nú notar hann næturnar 1001 til að fremja önnur brot með Gísla Gunnarssyni sem veitir honum pláss til þess. Vísvitandi fölsun á sögu helfararinnar er ein margra tegunda gyðingahaturs, en gyðingahatur er einnig lögbrot á Íslandi.

Hver er eiginlega drifkrafturinn í næturvinnu Gísla Gunnarssonar fyrir hrjáðar þjóðir?

Hin furðulega söguuppstilling Ibrahims S. Agnarssonar vall út úr honum eftir að Gísli Gunnarsson hafði birt ógeðfellda áróðursgrein úr vefriti sem kallast Middleeastmonitor, sem ekki er frægast fyrir sannsögli eða sanngirni. Þar birtist eina af mörgum myndum þeirrar bylgju sem nú tröllríður löndum múslíma, þar sem gyðingum, Ísrael og Bandaríkjunum er kennt um kórónavírusinn.

Gísli Gunnarsson er mjög lunkinn við að skaffa slíkar greinar handa áhangendum sínum og svo virðist sem heimildarýni sagnfræðinnar sé horfinn út í veður og vind hjá öldungnum og æsingur múgsins fái að ráða FB-martröðinni. Ekki vantaði heldur öfgafullar athugasemdirnar þann 20 mars sl. er Gísli birti fyrrgreinda áróðursgrein (sjá hér). Því er haldið fram að COVID-19 veiran sé runnin undan rifjum gyðinga og að veiran hafi jafnvel verið búin sérstaklega til af Ísraelsmönnum til að losna við ákveðnar þjóðir, en einna helst Palestínumenn.

Gísli gerir sjaldan athugasemdir við næturvini sína sem bæta enn meir óskapnaði við það rugl sem Gísli hefur fundið. Aftur á móti lokar Gísli og læsir á menn sem í vinsemd benda honum með rökum að hann sé að dreifa lygum og áróðri, og að hann espi menn upp til andgyðinglega athugasemda eins og þeirrar sögufölsunar sem t.d. Ibrahim Sverrir setur fram.

Hér gauka ég einnig að lesendum efni, þar sem fyrir utan fréttina frá Gaza má sjá og og heyra mikið safn hatursræðu í heimi múslíma í tengslum við kórónaveiruna og aðrar pestir. Þar er gyðingum kennt um kórónaveiruna og ýmsar pestir á einn eða annan hátt. Fjölmargir múslímar sem sest hafa að í Evrópu á seinni árum eru því miður farnir að viðra sömu rökin.

Sumt af því sem Gísli Gunnarsson dundar sér við á nóttinni á FB sinni er lýst vel af Felix Klein formanni ráðs þýskra yfirvalda sem berst gegn gyðingahatri (sjá hér). Klein segir að hatursræða í kjölfar Covid-19 faraldursins sé fyrst og fremst beint gyðingum.

Gísli Gunnarsson er því greinilega með á nótunum. En út frá fyrri misstökum Gísla og augljóslegri vanþekkingu hans á sögu gyðinga sem hann gerði sig að "sérfræðingi" í, að þeim óspurðum og fór mikinn á Vísindavef HÍ, er ekki ólíklegt að hann vaði enn einu sinni í villu, þótt honum þyki málstaður sinn góður. Meðalið hjálpar því miður ekki alltaf.  Ef menn muna ekki hvað gerðist í fyrra þegar "gyðingafræði" Gísla voru vegin og léttvæg fundin, má lesa um þau í þessari grein (bls. 89-90) í þessari bók. Svo langar mig að benda Gísla Gunnarssyni á þessa grein, sem Gísli telur ugglaust að sé áróður. Greinin inniheldur þó engar lygar líkt og það sem sá gamli tyggur hrátt upp úr döllum illræmdra áróðursrita á netinu.

Málverkið efst er eftir laghentan, ítalskan kitsch-málara og öfgaþjóðerniskaþólikka sem tilheyrir sömu samtökunum og kaþólskur prestur á Íslandi (sem greint var frá hér). Listamanninum þótti það viðeigandi að nota náðargáfu sína til að mála gamalt minni gyðingahatara í miðju kórónukófinu í heimalandi sínu. Ef til eru Ítalir sem halda að hörmungar þeirra nú séu gyðingum að kenna, er vitaskuld ekkert furðulegt við það að nokkrir Íslendingar blandi veirum í stuðning sinn við "vinnuna" við gæluverkefnin, sem fer fram um miðjar nætur þegar aðrar sálir sofa saklausum svefni. En það er samt sjúkt. Það ætti að vera orðið mönnum eins og Gísla Gunnarssyni eða Sverri Agnarssyni kunnugt, að þeir styðja Palestínuþjóðina akkúrat ekki neitt með öllum hamaganginum í sér um miðjar nætur. Það væri, held ég, hollara fyrir þá karlana að sofa um nætur.