Hver var listmálarinn SÞ?

Fyrr á árinu spurði ég fjasbókarvini, hvort þeir vissu, hver hefði málað málverkið hér að ofan. Lítið var um svör.

Með vilja greindi ég ekki frá sögu málverksins, eða hvað það sýndi. Nú skal leyst frá skjóðunni í von um að einhver kveiki á perunni hvað varðar listamanninn.

Listaverkið er alíslenskt og er málað af SÞ. SÞ leigði kjallarakompu af afa og ömmu á Hringbraut á 4. áratugnum. SÞ málaði þarna vetrarmynd, útsýnið út í garðinn fyrir framan Hringbraut 76 í Verkó (Verkamannabústöðunum) sem nú er búið að steindrepa eftir viðgerðir sem fóru þar fram. Reynitrén, sem er enn hríslur á málverki SÞ, voru felld, steinveggurinn fyrir fram var mölvaður mélinu smærra, sem tók sinn tíma því steypan og bindingar í Verkó eru með ólíkindum góðar. Við viðgerðirnar voru einnig drepnar rósir afa og ömmu, sem þóttu svo fallegar, að greint var frá í dagblöðum. Sömuleiðis var myrt sjaldgæf klifurplanta sem faðir minn hafði með sér frá Hollandi og sem Ingólfur Davíðsson grasafræðingur mun hafa skrifað um. Á Íslandi er arkitektúr alt, en umhverfið er ekki svo mikilvægt og er því fórnað á altari arkitektadýrkunar.

Afi og amma gáfu mér þetta málverk, og hékk það síðar í frábærri íbúð sem ég og kona mín vorum með á leigu á Neshaganum á síðasta áratug 20. aldar. Nú er ég að íhuga nýjan ramma og viðeigandi stað á veggnum heima hjá mér í Danmörku.

Afi, Vilhelm Kristinsson (ekki fréttamaður), sem ég hef skrifað mikið um á blogginu, vegna þess að hann reyndist mér svo vel, sagði mér frá málaranum sem bjó í kompunni, á 4. áratugnum. Afa þótti málverkið svo fallegt, að hann keypti það af SÞ - eða tók það upp í leiguna. SÞ bjó í kompunni áður en gyðingurinn Hans Mann Jakobsson bjó þar eftir að hann missti annað auga sitt. Afa þótti málverkið svo fallegt, að hann keypti það af SÞ. Hans Mann Jakobssyni var hjálpað af afa og Þorsteini Steffensen (ekki leikara) sem bjó á hæðinni fyrir neðan afa og ömmu, ásamt indæliskonu sinni Guðrúnu, sem keðjureykti örlitla pípu með afar fúlu tóbaki. Í minningunni man ég mest eftir tóbakslyktinni, sem blandaðist við ilminn af signum fiski og öðru þjóðlegu ómeti. Guðrún var afar barngóð kerling og skemmtileg, og ég sat oft með ömmu í eldhúsinu hennar. 

En ég man ef til vill betur eftir síendurteknu ati sem hún stóð í við drykkjumann, sem ódrukkinn var þó hinn vænsti maður, sem bjó til vinstri á 1. hæðinni. Er hann var fullur var hann öðrum íbúum til mikils ama, en þó ekki eins og kona hans sem átti við önnur vandamál að stríða en drykkju. Þannig getur fátæktin leikið menn grátt, ef þið vissuð það ekki. Sá vínhneigði, Gunnar V.J., var óskilgetinn sýslumannsson, lærður járnsmiður, sem vann í saltfiski úti í "ættararfleifð" minni Örfirisey. En hugsanlega er hann minna þekktur sem afi kaupmannsins Jóns Geralds Sullenbergers sem kom nýlega við sögu á Íslandi, þegar hann vildi gefa verkamönnum og öðrum betri kjör í verslun sinni en einokunarklíkurnar gefa. Gunnar, afi Jóns Geralds Sullenbergers, sem afi sagði mér að hefði veið nasisti, braust inn á skrifstofu Kommúnista í Reykjavík ásamt nokkuð yngri Hauki Morthens og flýðu þeir í kjölfarið til Kaupmannahafnar. Nú, ekki meira um það. Best er að mála ekki of margar minningar.

Myndin eftir SÞ sýnir útsýnið úr kjallara fátækra Reykvíkinga á 4. áratugnum, og enn var ekki búið að reisa tvíbýlishúsin beint á móti við Hringbrautina. Það sem ég heillaðist af sem ungur var frábær hæfni málarans með pensilinn. Ég hef tekið ljósmyndina þannig að dýptin í pensilsförnum sjáist sem best. Hún minnir á vissan hátt á sumar myndir van Gogh, hvorki meira né minna.

Margir sem hafa séð myndina, án þess að vita nokkuð um hana, eru fullvissir um að franskur meistari hafi verið að verki. En þetta var "bara hann SÞ", sem ég veit því miður enn engin deili á. Getur einhver hjálpað mér með upplýsingar um SÞ?