Winston og þjóðin

Þegar Winston Churchill kom til Reykjavíkur í ágúst 1941 voru menn ekki með neitt uppistand vegna hryðjuverkahættu. Churchill hefur örugglega líkað það og þessi þorpsbragur í Reykjavík. Myndin er tekin fyrir utan Alþingishúsið. Þá, líkt og 40 sinnum síðar, var verið að grafa upp götuna. Allt var svo afslappað og fallegt í þá daga. Takið eftir hermanninum með sígarettuna til hægri á myndinni.

Ég var að velta því fyrir mér, hverjir drengirnir á myndinni, sem vart geta stýrt sér af gleði, væru. Ég ræddi við góðan vin um málið. Ég ímynda mér að drengurinn með myndavélina sé Denni (Steingrímur Hermannsson), og mér finnst ég kannast við svipinn á  vel klædda piltinum við hlið hans, sem virðist vera með náttúrulegar strípur í hárinu, sem spjátrungar borga mikið fyrir að fá í hárið á okkar tímum. Drengurinn sem líklega er fæddur 1929 eða ´30 er klæddur eins og Tinni. Ég var nær alveg viss um að hann hafi síðar verið á framboðslista Sjálfstæðisflokksins (þ.e.a.s. drengurinn, en ekki Tinni), en svo hallaðist ég meira að því að þetta væri kannski sonur Emils Jónssonar. Tillaga kom um að þetta væri Gunnar G. Schram, en hann var miklu breiðleitari.

Allar upplýsingar um fólk á myndinni, fyrir utan Sir Winston kallinn, væru vel þegnar.

Athugasemdir

[Jón Steinar Ragnarsson, 27.3.2015 kl. 10:57]

Ég var ekki viðstaddur, en mér sýnist Churchill vera vestast í Austurstræti, nánar tiltekið við hallærisplanið. Tinni og co standa við Steindórsplanið.

[Vilhjálmur Örn Vilhjálmsson, 27.3.2015 kl. 11:10]

Fyrir framan Alþingishúsið sagði Fornleifur. Best að andmæla ekki karlinum. Fer í geðið á'onum.

[Sigurður Þór Guðjónsson, 27.3.2015 kl. 11:37]

Léttvægar en samt gullvægar upplýsingar: Þennan dag var glaðasólskin og hitinn fór í 18 stig á þaki landssímahússins sem sést þarna til hægri þar sem Veðurstogan var á þessum tíma. Hefði orðið annar blær á atburðinum ef hefði verið rigning og rok og 8 stiga hiti!  

[FORNLEIFUR, 27.3.2015 kl. 11:49]

Ég treysti þessu Sigurður Þór.

[FORNLEIFUR, 27.3.2015 kl. 14:11]

Ég læt mér augnablik detta í hug, að þarna sé kominn Örn eða Haukur Clausen, líklega frekar Örn, en er samt ekki viss. Gasellubræðurnir eins og þeir voru síðar kallaðir. Einhverjar athugasemdir???

[Jón Steinar Ragnarsson, 28.3.2015 kl. 01:40]

Það er rétt hjá þér. Hélt í fljótu bragði að þetta væri Geysishúsið þarna í bakgrunni.

Það er annars augljost af gatnagerðinni að henni hefur lítið farið fram allan þennan tima. Blaður Bull Ekkertsson er kannski að reyna að halda í upprunalega ásýnd borgarinnar. Þeir eru svo retró þessar elskur.

[FORNLEIFUR, 28.3.2015 kl. 06:18]

Þeir fáu sem á myndinni sjást og sem enn lifa, muna líklega marga holuna. Aðeins lengra til vesturs var hægt að grafa aðeins dýpra og koma niður á Ingólf Arnarson og co.

Hermennirnir sem þarna voru árið 1941 hafa líklega haldið að Íslendingar ætluðu sér í skotgrafahernað.

[Vilhjálmur Örn Vilhjálmsson, 28.3.2015 kl. 07:58]

Frægur bloggari hafi samband við Fornleif og taldi víst að einn hermannanna á myndinni væri faðir Boy Georges. Þar sem Fornleifur veit ekki hver Boy George er, kvitta ég fyrir og samþykki líkindin.

[FORNLEIFUR, 28.3.2015 kl. 12:03]

Svo eru til menn sem halda því fram í alvöru að Ari Fróði hafi haft 200 ára munnlega geymd á takteinum... Íslendingum hefur svo sannarlega farið aftur fyrst enginn getur sagt manni hver maður sem fæddur um 1928, er á ljósmynd.