Fjárfesting framtíðarinnar ?

Mikið er gaman að frétta af því að íslenskur aurapungur ausi fé sínu í annað en olígarkaíbúð í New York eða rúningamellur á snekkjum við strendur Flórída.

Það kætir mig að lesa að Reynir Grétarsson, sem m.a. hefur auðgast vel í Afganistan og Afríku á lánshæfismati ??  á fátækustu þjóðum heims, kaupi sér gömul Íslandskort og vilji sýna þær almenningi og ferðamönnum. Ugglaust getur slík sýning staðið undir sér og enn frekari kaupum á fornum kortum af Íslandi.

Sjálfur er ég áhugamaður um gömul kort og á reyndar fáein kort sem ég hef erft, keypt eða fengið þegar Þjóðminjasafni henti hlutum á öskuhaugana. Landsbókasafnið á einnig heilmikið safn sem mestmegnis hefur verið gefið því af mönnum sem höfðu mikið á milli handanna, líklega meira en þeir höfðu á milli eyrnanna, því stundum voru kortin fölsuð, jafnvel í ljósritunarvél, eða ekki eins gömul og eigendurnir héldu. Kort voru sömuleiðis oft endurprentuð meira en 100 ár eftir að þau voru rist á koparinn.

Ég gef hér aðeins eitt dæmi, og vona að Reynir Grétarsson falli ekki í sömu gryfju og fyrri auðmenn íslenskir sem söfnuðu kortum. Ef farið er inn á kortasafn Landsbókasafns, Islandskort.is, og náð í Íslandskort Porros frá 1572, koma upp myndir af tveimur kortum (síðum) úr kortabók Tomasso Porcacchis, L´Isole piu famose del Mondo, sem upphaflega var gefin út árið 1572 í Feneyjum. Kortin tvö á Islandskort.is eru hins vegar ekki úr upphaflegri útgáfu bókar Porcacchis frá 1572, heldur úr tveimur endurprentunum af þeirri bók, þar sem íslandskort Girolamos Porros voru endurnotuð.

Ég á reyndar kortið hans Porros frá 1572 (sjá efst). Það keypti ég árið 1975 fyrir aleiguna, sem var lítill sjóður. Ég keypti kortið í den Haag af vini föður míns, Bob Loose, fornbókasala í Paperstraat. Lose fæddist i Königsberg sem nú tilheyrir Rússum (Kaliningrad). Loose lét ávallt föður minn vita ef eitthvað sem varðaði Ísland rak á fjörur hans. Eftir að faðir minn, sem fæddist í Amsterdam, lést, komst Loose í samband við mig, en ég keypti aðeins smáræði af Bob Loose, enda er ég bara fátæk háskólagengin rotta og (of)menntaður aumingi. Þar síðast, er ég var með fjölskylduna í den Haag, frétti ég að Loose væri allur, að versluninni hans hefði verið lokað. Blessuð sé minning hans. Ég minnist þó langra kjaftaþinga föður míns og hans með lítilli gleði.

Bob Loose að stússa í verslunarkytru sinni. Að baki búðarinnar var heilmikið húsnæði, 10 sinnum stærra en verslunin, þar allt var fullt af bókum og öðru.

Reyn­ir Grétarsson segir dýr­asta kortið sitt hafa kostað um 15 millj­ónir króna. Ekkert kort af Íslandi er svo mikils virði og hefur Reynir því látið pretta sig dálaglega ef hann hefur keypt Íslandskort sem var svo rándýrt. Þegar menn kunna ekki aura sinna ráð, hverfur náttúrulega verðskynið. En hugsanlega er Reynir landakortafjárfestir að reyna að hækka tryggingarverðið fyrir opnun sýningarinnar með því að keyra upp verðið í fjölmiðli íslenskra stóreignamanna.

Reynir hyggur einnig á útgáfu kortabókar samkvæmt frétt Morgunblaðsins. Bókina kaupi ég ugglaust, en aðeins á sanngjörnu verði. Þangað til nota ég m.a. tveggja binda verk Haraldar Sigurðssonar, Kortasaga Íslands I-II sem faðir minn gaf mér árið 1978 og Haraldur áritaði fyrir hinn verðandi fornfræðing, sem átti kort Porros, sem ég man að Haraldi kallinum langaði ósköp mikið í og vildi fjálgur kaupa af mér. Kortið var hins vegar ekki falt. Kannski er það orðið 15 milljóna króna virði nú, ha, ha, ha, ha. Dream on Fornleifur. Í hæsta lagi nokkur hundruð dollarar. Menn fjárfesta enn sem komið er miklu betur í lánshæfismati á fátækustu þjóðum heims en í Íslandskortum.

Opnar safn með gömlum Íslandskortum

Athugasemdir

[Reynir Grétarsson (IP-tala skráð) 25.5.2017 kl. 17:23]

 Sæll Fornleifur.  Skemmtileg skrif.  Nokkur atriði.  Ég hef ekki auðgast í fátækustu löndunum, heldur er í stórum mínus, enda markmiðið ekki endilega að græða. Sama á við um mögulegt safn, ekki reikna ég með því að það verði hagnaður af því.  Rétt hjá þér með Porro, þú ert með 1572, þau á Íslandskortum eru yngri.  Góð síða til að sjá þetta er http://www.caribmap.org/porcacchi.php?id=0 Rétt líka að kort af Íslandi einu eru ekki svona dýr, Ortelius kostar innan við milljón. Dýra kortið er heimskort frá Ulm 1482. En gaman að vita af öllum áhugamönnum um efnið.  Vertu í bandi ef þú vilt.  Reynir

[FORNLEIFUR, 25.5.2017 kl. 18:43]

Sæll Reynir, ég furðaði mig líka á þessu með fátækustu löndin. En nú hef ég að sjálfsögðu ekkert fjármálavit, og ætti bara að halda kjafti um allt slíkt. Er Ortelíus þó innan við milljón! Var ekki öruggur Mercator betri kaup. Eitt er söluverð, annað er svo að koma þessu í verð aftur. Tímarnir þurfa að vera til þess. Sumir aurasnjallir menn á Íslandi keyptu sér málverk í fermetratali. Kort eru miklu betri fjárfesting. Hvar er Kjarval-veggfóðrið nú? Menn eru líklega að bíða eftir uppsveiflu.

Til hamingju með Ulm-kortið (Ptolemeus). Ég hef séð eitt litað (1486) til sölu en verð var ekki upplýst, en sé nú að eitt hefur verið selt á 317000 hjá Christie's árið 2014  http://www.christies.com/lotfinder/Lot/ptolemy-claudius-2nd-century-world-map-insculptum-5780582-details.aspx (það er mun dýrara en þitt). En önnur Ulm-kort, bæði frá 1492 og '86 eru miklu ódýrari, svo þarna hefurðu líklega keypt vel miðað við verðið hjá Christie's - sem er óvenjulegt.

Annars finnst mér verðlagið hafa farið hækkandi upp á síðkastið, en maður sér líka sömu kortin til sölu árum saman. Svo kemur þú og kaupir. Ég hlakka til að sjá sýninguna þína og er viss um að ákveðin tegund af ferðamönnum muni sækja grimmt í hana. Þú hóar í mig á [e-mail] þegar þú opnar. Gæti verið að maður yrði á landinu.