Vitfirringin ríður ekki við einteyming á Íslandi

Birtingarmynd túristahyggjunnar á Íslandi og hræðilegs smekks sumra Íslendinga birtist nú enn og aftur. Nú er það sem einhverjir sauðir eru með á prjónunum útvíkkuð ímynd Fjörukráarinnar hjá Göflurum. Draumfarirnar kallast "víkingaveröld" og hafa yfir 200 bílastæði.

Furðar það fáa að alið sé á þeim plönum í Mosfellsbæ (sjá hér), enda virðist heimska og græðgi hrjá það bæjarfélag alveg sérstaklega. Þó minnið sé nú ansi brátt á Íslandi á síðari árum og helmingur þjóðarinnar sé haldinn einhvers konar Alzheimer-light og meintum brotavilja, getur það verið að menn séu búnir að gleyma hjartaspítalaævintýrinu í Mosfellsbæ? Í því létu yfirvöld í Mosfellsbæ, og þeir allra gráðugustu í læknastétt, lokka sig í draumaheim skapaðan af hollenskum loddara sem svamlaði upp úr einhverju versta fúladíki í Niðurlöndum (sjá hér). Þeir draumar fóru út um holt og þúfur og vinir hollenska loddarans afneita honum í biðröðum.

Nú slær hjarta Mosfellsbæjar aftur með gervigangráði sem virðast líka kitla genin sem stjórna græðgi og heimsku. Á einum melnum eða moldaröldunni í Mosfellsbæ vilja smekklausir peningadýrkendur reisa Viking World til að sýna útgeldingum þann gerviheim sem gráðugir Mosfellsbæjarlerar hrærast í. Þar á að sýna saklausu fólki utan úr löndum hvernig allt var þegar hetjur riðu um héruð.

Haraldur Mosfellsfífl, þorpari og athafnavíkingur.

"Hetjur riðu um héruð"

En hetjur hafa sem kunnugt er aldrei riðið um héruð á Íslandi. Hinar sönnu hetjur lifðu af án hesta í kotum sem þeir áttu ekki og löptu dauðan úr skel. Er ekki nóg að hafa skrímslið í Þjórsárdal, sem menn kalla Þjóðveldisbæ, en sem ætti frekar að heita gúmmí-Stöng. Þar er daglega logið að ferðamönnum um eyðingu Þjórsárdals árið 1104 en menn halda algjörlega kjafti um að í veggjum bæjarins sé steinsteypa og í þakinu nælonmottur (sjá hér). Eiga prett, svindl og phony baloney um íslenska menningu að vera það sem ferðamenn hafa með sér í farteskinu til síns heimalands?

Nær væri að byggja hrunasafn í Mosfellsbæ og gefa því nafnið Iceland Exctreme. Þar væri hægt að setja hausmyndir af helstu svindlurunum á stjaka í "hetju"skálanum: The Hall of Infame, til að sýna gestum á Íslandi hvað vitleysan nær stundum háum hæðum á Íslandi. Í stað 100 metra langs furðuskála í fantasíustíl íslenskra auraapa (sem telja sig hetjur) væri tilvalið að selja viðskiptavinum hrunasafnsins 50 sm langa sperðla á 5000-kall stykkið með grænum norðurljósadrykk; Og ljúga að þeim að þetta séu grjúpán Þjóðveldisaldar sem "hetjurnar" hafi kokrennt og sem svikahrappar hafi síðar á öldum sótt í þyrlum sínum í sjoppur - einhvers konar víkingabúðir.  Nokkrir gráðugir Kínverjar munu vafalaust kaupa slík ósköp nær alveg hrá - eða þangað til að fótum troðið undirsólafólk í Kína rís upp aftur og gerir byltingu og drepur alla feitu ferðamennina sem koma til Íslands. Þá losnum við úr ánauðinni.

Smekkleysa ferðamannaiðnaðarins á Íslandi er að ná nýjum hæðum og nú er Harpan, þetta litríka gróðurhús snobbs og menningarhækla orðið að ókeypis klósetti. Nú geta allir skitið þar án þess að borga.

Hér sturta ég út. Íslandi er ekki við bjargandi. Allt er í sárum undan grillutúrhestastóðinu.

Ég var í gamla landinu nýlega, nýlaus við krabbafjanda sem fannst í mér fyrr á árinu. Það er enn margt yndislegt fólk inn á milli og furðugóðir veitingastaðir. Konurnar er enn fallegar en þær þorði ég ekki að snerta þó ég sé ekki með neina kvikmynd á prjónunum. Alveg sama hvaða grey fá ríkisstjórnarvöldin eftir næstu kosningar, þjóðin mun áfram þurfa að líða undir því að ímyndunarveikar hetjur ríði um héruð og eyða öllu sem verður í vegi þeirra."Víkingar" Íslands eru annálaðir hirðingjar.

Víkingaveröld í Mosfellsdal

Athugasemdir

[Jón Steinar Ragnarsson, 23.10.2017 kl. 18:30]

Þetta má með sanni kalla langhús. Það langsamlega lengsta í sögu landsins og jafnvel heimsins. Að menn akuli finna upp á þessu svona seint er furðulegt. Hvað voru kotbændur forðum að pæla? Langaði þeim ekki í svona löng hús eða fannst þeim það kannski of langsótt?

[FORNLEIFUR, 23.10.2017 kl. 18:34]

Þetta eru bara nútíma-phallos tákn. Ballarholt!

[Ómar Ragnarsson, 23.10.2017 kl. 20:07]

Það er hlálegt að vegna tómlætis Reykvíkinga skuli bærir eins og Keflavík og Mosfellsbær sækja inn í tómarúm og reyna að slá sér upp á þessu sviði. 

Til Reykjavíkur sigldu Ingólfur Arnarson, fyrsti landnámsmaðurinn, og síðar stigu þar á land Fjölmismenn, Jón Sigurðsson og aðrir helstu menn síðari tíma, einnig Kristján níundi, Friðrik áttundi og Kristján tíundi oftar en einu sinni, skáldin Einar Benediktsson, Þórbergur Þórðarson og ekki síst Halldór Laxness með sín Nóbelsverðlaun. 

Ekkert merkilegt hefur nokkurn tíma koma á land í Keflavík, ekki einu sinni svartadauði. 

[Jón Steinar Ragnarsson, 23.10.2017 kl. 20:31]

Þetta má með sanni kalla langhús. Það langsamlega lengsta í sögu landsins og jafnvel heimsins. Að menn akuli finna upp á þessu svona seint er furðulegt. Hvað voru kotbændur forðum að pæla? Langaði þeim ekki í svona löng hús eða fannst þeim það kannski of langsótt? Einar eigið þið, en hann er þó frá elliðavatni, sem var uppi í sveit þá.

[Jón Steinar Ragnarsson, 23.10.2017 kl. 20:33]

Kannski mætti kalla þetta Lókhús fornleifur. :)

[FORNLEIFUR, 23.10.2017 kl. 21:30]

Ómar, Keflavík er stórmerkileg og þar var á heiðinni merk menning í kjölfar síðara stríðs. Þann kúltúr hafa menn leynt og ljóst reynt að jarða. Einhvern daginn munu þeir sjá eftir því. Minnimáttarkennd er einnig vandamál fyrir suma Íslendinga, sem vilja búa til gervihús og gerviveröld til að falla í augun á stærri þjóðum. Menn eiga aldrei að velta því of mikið fyrir sér hvað aðrir halda um mann, nema í hjónabandi.

Jón, lókhús er gott nafn sem líkist locus (stað) á latínu. En þetta víkingaplan í Mosó er hugmynd um afar óáhugaverðan stað í veröld sem aldrei hefur verið til og sem gengur út á það eitt að féflétta ferðamenn með lygum og uppspuna.

[Einar Sveinn Hálfdánarson, 23.10.2017 kl. 21:37]

... góður húmor - svona inni á milli. Sumu mætti sleppa án þess að skaði hlytist að.

[FORNLEIFUR, 23.10.2017 kl. 21:45]

Ef ég væri útlendingur, færi ég ekki til Íslands til að sjá gervivíkinga, nýreist "gömul" hús í Reykjavík, sem líkjast einna helst setti í spaghetti vestra, eða það elsta í Reykjavík - eyðilagt af túristapjátri og sölumennsku. Það er svo margt annað að sjá og upplifa. Náttúran er það mikilvægasta og sá stakkur sem hún hefur sniðið þjóðinni. Hún hefur skapað þá sérstæðu menningu sem hér þróaðist, sem kemur ekkert víkingum, keltum eða öðru minnimáttarkjaftæði við. Hetjurnar á Íslandi eru fátæklingarnir sem lifðu af í erfiðu umhverfi og skiluðu landinu ólöskuðu til komandi kynslóða. Auðmennirnir skiluðu engu, stóð þeirra bitu sums staðar síðustu hrísluna meðan þeir stálu frá samferðamönnum sínum og afkomendur þeirra vilja nú ljúga umheiminn fulla um sögu landsins á svipaðan hátt og þegar kommar reyna að umrita söguna svo hún passi inn í trúarbrögð þeirra.

[FORNLEIFUR, 23.10.2017 kl. 21:48]

Þakka fyrir ábendinguna Einar Sveinn húmorlögga. Mér er dauðans alvara, en hvaða djók fór fyrir tútturnar á þér?