Út um stéttar ...

Árbít mínum nú í morgun lauk ekki fyrir en klukkan hálf ellefu. Ég vakna venjulega snemma og borða líka árla, en í dag ákvað ég að fasta í nokkrar klukkustundir.

Ég fór í verslun til að kaupa nauðsynjar og ætlaði að kaupa mér helgarblaðið Weekendavisen, en rak þá augun í Information, sem ég les alla jafna ekki og hef ekki gert í áraraðir. Ég hef einfaldlega ekki efni á því. Blaðið kostar 40 DKK í lausasölu, sem er hið argasta kapítalíska okur og svínarí.

Aðeins ein ástæða var fyrir því að ég keypti hið gamla kommablað Information í morgun. Íslandskort prýddi forsíðuna. Ekki þarf nú meira til að fanga athygli Mörlandans, þótt forframaður sé!

Ég trúði vart mínum eigin augum, því eitthvað um móðurlandið finnur maður vart á virkum degi, nema í fyrsta lagi á bls. 4.,  en venjulega alls ekki, nema kannski í tónlistaraukum prentuðu blaðanna - eða þegar eitthvað gýs og skíturinn í bankageiranum vellur yfir.

En eins og siður minn og erfðagóss hefur fyrir skipað, rekst ég ávallt fljótt á villur annarra, þó ég sjái sjaldnast mínar eigin. 

Forsíðumyndin í Information var auglýsing fyrir grein eftir hinn ágæta Erik Skyum-Nielsen, sem ég kannast við og hef eitt sinn hjálpað við að finna villur í bók. Vitnað er í ljóðlínur eftir Þorstein Erlingsson á "íslensku". Því miður vill svo illa til að tvær, heilar villur er í þessum tveimur línum úr ljóðinu. Skoðið myndina og finnið þær.

Grein Skyum-Nielsens, sem fjallar um Snorra Eddu er með ágætum, en eitthvað hefur runnið út í sandinn með stafsetninguna á íslensku. Allt er ekki ritað alt eins og sumir gerðu á tímum Þorsteins. Í er ekki skrifað i.

Smámunir, líkt og Ísland er. En hafa ber það sem réttara reynist eins og við Íslendingar segjum - en höldum víst sjaldnast sjálfir. Þorsteinn Erlingsson orti einnig þetta:

Því fátt er frá Dönum sem gæfan oss gaf,
og glöggt er það enn hvað þeir vilja.
Það blóð sem þeir þjóð vorri út sugu af,
það orkar ei tíðin að hylja:
svo tókst þeim að meiða’ hana meðan hún svaf
og mjög vel að hnupla og dylja;
og greiðlega rit vor þeir ginntu um haf –
það gengur allt lakar að skilja.

Tak ská´ du ha´! Þetta á nú ekki við um Erik Skyum-Nielsen. En ég er farinn að verða leiður á sumum öðrum dönsku þýðendunum sem þykjast hafa tök á íslensku. Það er nokkuð langt á milli þeirra sem það hafa.

Athugasemdir

[Sæmundur G. Halldórsson , 4.1.2019 kl. 19:58]

Eins og þú segir sjálfur var "allt" skrifað "alt" á þeim tíma sem Þorsteinn Erlingsson ritaði sín ljóð. Skólastafsetning dagsins í dag er ekki endilega hin eina rétta. Hitt er verra að gleyma broddstafinum á í! Annars er stafsetning einungis samkomulag manna á hverjum tíma. En mikið er gott að við skulum enn njóta Erik Skyum-Nielsen og brennandi áhuga hans á íslenskri tungu og menningu!

[Helga Kristjánsdóttir, 5.1.2019 kl. 03:59]

Getur verið að Nóbelskáldið hafi talið ranga stafsetningu ekki neina höfuðsynd svo lengi sem innihald stílsins skilar meiningunni fullkomlega?
 Dauf minning um það!

[Vilhjálmur Örn Vilhjálmsson, 5.1.2019 kl. 05:57]

Skyum-Nielsen ritaði mér í gær úr fríi sínu, sem ég er líklega búinn að eyðileggja, og sagði að villurnar væru ekki frá honum komnar! Sammála þér Sæmundr um ágæti Skyum-Nielsen. Hann ber af sem þýðandi íslenskra verka í Danmörku.

Nóbelskáldið og vandamál hans með stafsetningu og annað eru ekki til umræðu hér, Helga. Maður þorir ekkert að segja um hann nú orðið. Nema að hann líkti gyðingahatri við hundahatur og skrifaði bæði orðin hárétt.

[Helga Kristjánsdóttir, 6.1.2019 kl. 01:27]

Það þarf heldur ekki mikið til að fanga áhugalitla um efnið til að frekjast með;bara til að setja upp gamalt módel í stofu með fólki að rabba við um há nótt.

[Vilhjálmur Örn Vilhjálmsson, 6.1.2019 kl. 06:39]

Nú fylgi ég þér ekki alveg Helga, hvað ertu að skrifa um?