Ég ætla að mála allan heiminn, elsku mamma

Eftir að MyHeritage.com gerði fólki kleift að lita gamlar svarthvítar ljósmyndir, hefur verið mikið að gera á síðunni. Ég prófaði apparatið á tvær gamlar ljósmyndir Matthíasar Þórðarsonar þjóðminjavarðar sem hann tók í Selárdalskirkju árið 1913. Myndirnar eru varðveittar í Þjóðminjasafni.

Myndirnar tvær voru frábærar í sínum upphaflega fjölbreytileika grámyglunnar, sem getur verið afar fallegur. Hér sýni ég ykkur hvað leiktæki það sem MyHeritage hefur upp á að bjóða getur gert. Það er gaman af þessu föndri, sem þið getið reynt á myndir ykkar sjálfra. Ég held hins vegar fast í upphaflegu litina. Líklegast er hægt að gera það sama á góðum ljósmyndaforritum. En ég á ekkert slíkt og fitla sjaldan við myndir, nema til að gefa þeim smá skerpu.

Ég hef skrifað um forna ljósahjálma á Íslandi í nokkrum greinum sem menn geta fundið neðarlega á hægri spássíu bloggsins Fornleifs, Fyrsta greinin heitir Fiat Lux.

Ljósahjálmurinn sem hékk í Selárdalskirkju er einstakur í heiminum. Hjálmurinn hangir nú einhvers staðar bakdyramegin á Þjóminjasafninu og er ekki sýndur almenningi, enda var hann tekinn úr kirkjunni í óþökk sumra heimamanna fyrir vestan. En við getum líklegast öll verið sammála um að hjálmurinn á best heima á Þjóðminjasafninu. Það ræði ég því ekki frekar.

Athugasemdir

[Halldór Egill Guðnason, 22.4.2020 kl. 00:59]

 Ekki er hægt að neita því, að litasamsetningin á þessum tveimur myndum er  harla góð og kemur sennilega vel heim og saman við rakaskemmdir, myglu og annað, sem sennilega hefur hrjáð innviði og gripi óupphitaðrar Selárdalskirkju, þegar myndirnar voru teknar. Hvort eigi að fitla eitthvað við ´´orginalana´´er hinsvegar alltaf spursmál. 

 Uppeldisfaðir föður míns tók mikið af ljósmyndum á fyrri hluta síðustu aldar, sem hann síðan ´´litgerði´´ með því að mála ofan í þær. M.a. eina fræga Heklumynd, ásamt ótal myndum af föður mínum kornungum, ketti hans og dúfu.

 Þakka pistilinn.

 Góðar stundir, með kveðju að sunnan.

[Upprétti Apinn, 22.4.2020 kl. 19:44]

Ljóshjálmurinn lítur út fyrir að vera skúlptúr af Yggdrasil.  Ockelbo rúnasteinninn hefur margt sameiginlegt.

[Upprétti Apinn, 18.5.2020 kl. 08:52]

Arnolfini hefur keypt ljóshjálminn í sömu verslun og Arnolfini. https://westernarthistorybysuzy.wordpress.com/2016/07/17/painting-review-the-arnolfini-portrait/