Kjósum Kristján

Þegar ég var í Ísaksskóla (1968) hélt ég að ég myndi fá að kjósa í forsetakosningum. Þegar svo kom í ljós að það var ekki hægt, varð ég vitaskuld afar vonsvikinn. Ég hafði þetta á orði við Svenna vin minn í sandkassanum á róluvellinum okkar í Hvassaleitinu. Hann "kaus" Gunnar Thor eins og flestir í götunni, en ég ætlaði svo sannarlega að kjósa Kristján, meðal annars vegna þess að altalað var, að Gunnar væri bytta, en þó fyrst og fremst vegna þess að Kristján var ÞJÓÐMINJAVÖRÐURINN, og hjá mér var það það sama og vera í guða tölu.

Svo ég skríði nú aftur í sandkassa minninga minna, þá var ég leiður yfir því að geta ekki kosið. Ég vissi ekki alveg hvað það gekk út á, en ég var staðráðinn í því. Ég borgaði meira segja hundraðkall, sem ég átti, í stuðningssjóð Kristjáns Eldjárns, og á enn kvittunina, sem ég ætla að láta innramma við tækifæri. Sýni hana hér sem jarteikn.

Svo þegar Kristján sigraði í kosningunum, fór ég til að hylla hann á tröppum Þjóðminjasafnsins. Þar komst ég upp á tröppur. Þar biðu mín líka vonbrigði. Ég hrasaði á tröppunum og það kom gat á buxurnar mínar. En ég stóð þarna og hyllti forsetann fyrir aftan risavaxinn mann og sá lítið annað enn bakhlutann á honum, sem lyktaði frekar óþægilega. Ég sá ekki einu sinni forsetann.

Ég beit þetta þó í mig ... og loks sumrin 1981 og 1982 komst ég eins nálægt átrúnaðargoði mínu eins og hægt var. Þá var ég byrjaður í námi í fornleifafræði og það hafði Kristján frétt og boðaði mig á fund sinn, tvo sunnudagsmorgna, og talaði um heima og geima og þáði af mér mína fyrstu fræðigrein um fornleifar fyrir Árbók Hins íslenzka Fornleifafélags, félag sem ég hafði gerst félagsmaður í undir "lögaldri". Ég hef því miður ekki verið í félaginu síðan 1995, og veit ekki af hverju, en ætti líklega að ganga í það aftur við tækifæri.

Athugasemdir

[Helga Kristjánsdóttir, 6.12.2011 kl. 21:16]

 Ég studdi hann líka,kom iðulega á kosningaskrifstofu hans í Bræðratungu,eða Hrauntungu,minnir hún hafi verið þar,í Kópavogi. Það var mikill hugur í liði hans.

[Jón Steinar Ragnarsson, 7.12.2011 kl. 13:29]

Yndisleg slidesmynd þetta.

Þú átt örugglega erindi inn í félagið aftur og mættir kannski fá að ráða meiru í að sporna við því rugli sem þessi fræðaþáttur er orðinn hér.

Hvers vegna dastu út úr félaginu? Er það ekki rannsóknarefni?

[Sigurður Þór Guðjónsson, 7.12.2011 kl. 20:35]

Þetta voru fyrstu kosningarnar sem ég átti rétt á að kjósa og auðvitað kaus ég Kristján sem mér finnst enn í dag hinn eini og sanni forseti. En ég er líka ansi forn í lund og öllu æði.