Back to the 70s

...og færist nú sagan aftur á 20. öld. Nýlega var ég staddur í móðurhúsum á Íslandi. Fór ég þar að skoða gömul myndaalbúm sem móðir mín hefur tekið saman að mikilli alúð í gegnum árin og verður seint þakkað nóg fyrir það. Ég skannaði m.a. þessa mynd, sem sýnir mjög efnilegan bekk í Hlíðaskóla í byrjun 8. áratugarins. Ég held að þetta sé 8. bekkur og kennarinn okkar var engin önnur en Edda Snorradóttir, sem var frábær kennari á allan hátt, mikill skörungur, drengur góður sem kunni sitt fag... einnig margfræg fyrir góðan smekk í leðurbuxum.

Ritstjóri Fornleifs er í efstu röð alveg eins og meðlimur í englakór. Þetta var að því er ég best man enginn englabekkur. Við vorum voða óþekk og leiðinleg og svo lyktaði stofan af blöndu af táfýlu, 8x4 og svitalyktinni af Gústa - og mjólkinni sem súrnaði í skápnum í nokkra mánuði þangað til enskukennari okkar fann orsök ólyktarinnar af okkur og fékk í kjölfarið taugaáfall og varð að hætta. Ég skammast mín mjög fyrir allt sem þar gerðist, þótt ég hafi ekki tekið þátt í Mission Sour Milk.

Skömm er frá því að segja, að ég hef ekki séð nema örfáa úr þessum fríða hópi vænlegra ungmenna í áratugi. Ég veit hvað varð um suma en ekki alla, og sumum nöfnum hef ég alveg gleymt. Ég er tengdur tveimur á FB. Tveir, sem mér eru kunnugt um, eru því miður látnir og við verðum öll eldri.

Nokkrir urðu handverksmenn t.d. lögfræðingar og einn tannlæknir. Þrír læknar, sem ég veit um, og líklega fleiri því ég veit ekki hvað allar skólasysturnar urðu þegar þær urðu stórar og enn fríðari en þær voru á þessum auma aldri.

Önnur örlög: Ein í bekknum varð líffræðingur, einn fornleifafræðingur og Jón heitinn Egill varð veðurfræðiprófessor. Ekki má gleyma flugvélaverkfræðingnum Jens og heimsmeistaranum Jóni Lofti og sameindagúrúnum Einari Gröndal. Allir góðir þjóðfélagsþegnar.

Vona ég að flestum hafi vegnast vel og er ég búinn að melda mig í The Legend Edda Snorradóttir á Facebook. Vonast til að sjá fleiri ykkar þar. Silla Gröndal er þegar mætt sé ég! Við vorum mjög heppin með kennara í 8. ES í Hlíðaskóla, og má nefna snillinga eins og Árna Pé, Hrólf Kjartansson og Baldur Sveinsson. Blessuð sé minning þeirra heiðursmanna.

Athugasemdir

[Jón Steinar Ragnarsson, 6.11.2017 kl. 05:26]

Dralonpeysurnar nylonskyrturnar að gera sig. Líklega eru þykkbotna blöðruskór og tramparar í röðum frammi á gangi.

Fæ kláða þegar ég hugsa um öll gerviefnin.

[Jón Steinar Ragnarsson, 6.11.2017 kl. 05:30]

Sit sjálfur að við að gera upp á þriðja hundrað mynda í fótósjoppunni. Sumt ríflega hundrað ára og illa farið. Verðugt verkefni að skrá þá sem eru á myndunum, meðan einhver er enn á lífi til að bera á þá kennsl. við vorum ekki nema fimmtíu þúsund á þessum tíma, eða svo, svo það er ekki úr mörgum að velja. :)

[Jón Steinar Ragnarsson, 6.11.2017 kl. 05:31]

Þegar bekkjarmyndin er tekin, voru Íslendingar ekki fleiri en 150-60 þúsund.

[FORNLEIFUR, 6.11.2017 kl. 07:21]

Hver hefur fjölgað sér svo mikið? Voru virkilega ekki fleiri Íslendingar árið 1973 en 160.000? Þetta er líka eftir dralon og nælon-tímabilið. Skyrtan mín var að minnsta kosti 100% bómull (því ég þoldi ekki gerviefni) og peysan var úr ull fra Marks & Spencer /SÍS.

[Jón Steinar Ragnarsson, 6.11.2017 kl. 11:24]

175.000 vorum við 1960, samkvæmt mínum upplýsingum. Höfum fjölgað okkur nær tvöfalt síðn þá. Menn liggja ekki kyrrir hér, enda þörf að halda á sér hita. :)

[FORNLEIFUR, 6.11.2017 kl. 12:18]

Upp og niður, fram og aftur og ýmsar aðrar æfingar... Við erum heimsmeistarar!!