Fornleifur óskar Gleðilegrar Hátíðar - 2018

Nú þegar þið eruð að hugsa um hátíðarhumar, hamborgarahrygg og annan helberan hégóma sem blessað Jesúsbarnið mátti ekki einu sinni borða, er mér hugsað til blessaðrar þjóðarinnar minnar, þar sem hún í sýndarveruleika norpar yfirgefin í fáránleikanum og fönninni við heimskautsbaug.

Þið eruð öll sleginn af svínslegu orðbragði dæludóna og furðulegu háttalagi þeirra sem sitja á hinu háa Alþingi og á börum vinnustaðar síns. Mér er síst af öllu öfund í huga. Þið hafið náttúrulega ekki kosið ÞETTA greðjugræðgispakk yfir ykkur. Réttast væri að þið fengjuð öll sanngirnisbætur fyrir að lifa undir öllum hörmungum sem á ykkur ríða. En þið megið ekki fara í jólaköttinn út af vitleysunni.

Fornleifur gaukar hér að ykkur uppbyggjandi jólaefni eins og honum er einum lagið. Það er ljósmynd frá jólunum 1943 sem nýlega áskotnaðist Herminjasafni Fornleifs.

Myndin var tekin á Bessastöðum er Sveinn Björnsson var þar ríkisstjóri. Einn daginn bönkuðu upp á hjá honum bandarískir hermenn sem vildu syngja fyrir fyrir hann jólasálma:

"Dear Mr. President, we want to present you with some Christmas carols." 

"Yes, yes", ríkisstjórinn leyfði það umsvifalaust og hann og frú Georgína hlustaði greinilega hugfangin á hermennina syngja um blessuð jólin á ameríkönsku. Hann Bjössi, sonur þeirra, var nú einu sinni líka hermaður. En reyndar var hann í röngum búningi - Bjössi bolla var óvinurinn sem barðist gegn alheimsgyðingnum, kommúnismanum og innflytjendum, líkt og svo margir sem haldnir eru Soros-óþoli (les gyðingahatri) gera þann dag í dag á Íslandi. Segið svo að þetta jólakort eigi ekki erindi til einhvers.

Starfsmenn Fornleifs óskar ykkur öllum gleðilegrar hátíðar og farsældar við að koma dónum og drullusokkum frá völdum, svo ný kynslóð geti tekið völdin frá ykkur aftur og kafsiglt ykkur á annan hátt. T.d. með skrifborðsfargi frá 10. hæð í ljótu húsi í Brussell. Starf BjöSSa ríkisstjórasonar er sko ekki unnið fyrir gýg. Herrafólkið hefur tekið völdin, bæði í Brussell og Washington og syngur sem hæst gamla slagarann Hver sá mömmu myrða Jólasvein, með sveðju sinni í eldhúsinu í gær.

Dátar á Íslandi voru andstætt Íslendingum mjög gefni fyrir að syngja jólasálma úti í hríðarveðri. Þeim var nefnilega sjaldan boðið inn, nema að þeir hétu Rockwell. Ef einhver á vinstri vængnum hefur velt fyrir sér, hvar Heklu-úlpan er upprunnin, skoðið þá vel þessa mynd.

Myndin efst er fréttamynd sem send var út til dagblaða og tímarita í Bandaríkjunum í janúar 1944 og telex-textinn sem fylgdi myndinni hljóðaði svo:

MERRY CHRISTMAS FROM US TO ICELAND

ICELAND -- AS ICELAND TURNS ALL OUT TO WISH

AMERICAN FORCES STATIONED THERE A MERRY XMAS,

THE YANKS DO THE SAME FOR THE FAR-NORTHERNERS.

HERE, AMERICAN SOLDIER-CAROLERS TREAT THE

REGENT OF ICELEND, SVEINN BJORNSSON AND HIS WIFE

GEORGIA TO A HOLIDAY SERENADE OUTSIDE OF THEIR HOME.

Athugasemdir

[Valdimar Samúelsson, 19.12.2018 kl. 15:28]

Fornleifur þú ert algjör snillingur með pennann en það er aldrei hægt að sjá hvoru megin þú ert.

Þetta er eins og með kynstofnanna á Íslalandi.

Hommar og lesbíur og svo NoKyn en einhvað kyn er komið í viðbót við hin. kannski er það hvorugkyn.

Gleðileg jól besti vinur eða eiga ekki allir að vera vinir á jólunum.

PS Kannski voru Kanarnir voru mannlegri en slendingarnir já með essi því það kom líklega engin til Bessastaða árið 1943 en hver skyldi koma núna.Enginn.? 

[Jón Steinar Ragnarsson, 20.12.2018 kl. 01:54]

Gleðileg Jól Fornleifur minn og þakka bráðskemmtilegt og fróðlegt á að venju. Vona að þú látir ekki deigið síga og haldir áfram með sama gústó á nýju ári.

Sendi Vilhjálmi vini þínum sömu kveðjur ásamt hanúkkukveðjum.

Sendi honum kannski sykursæta mynd úr vetrinum á Siglö. :)

[Ragnhildur Kolka, 20.12.2018 kl. 11:02]

Jólakveðjur til þín og þinna. Þú gefur lífinu svo sannarlega lit.