Paris, Paris - J´arrive

Bráðlega dvel ég í París, þar sem ég hef ekki sett mínar stóru bífur síðan 1971, er ég var þar á ferð með foreldrum mínum, sem tóku með mig í Evrópureisu.

Reyndar hef ég verið annars staðar í Frakklandi, en hræðslan við vankunnáttu mína í frönsku er líklegast meginástæðan fyrir því að Frakkland hefur orðið útundan á Evrópureisum mínum.

Ég á mjög góðar minningar frá ferðinni árið 1971, sem ég hef lýst áður, og þegar ég var á Íslandi í janúar sl. tók ég mynd af málverki sem ég málaði um 1972/73, eftir minni og svarthvítri Kodak Instamatik ljósmynd úr Parísarferðinni. Þetta var nú ekki meðal minna bestu verka, hálfgerð kremkaka.

Nú mun ég sjá Sacre Coeur kirkjuna á Montmartre aftur, því ég mun búa ca. 100 metra frá kirkjunni. Ég tek þó hvorki liti né pensla með og læt mér nægja ljósmyndir.

Þannig var ritstjóri Fornleifs teiknaður af spænskum listamanni, hálfgerðum nautabana, á Place de Tertre á Montmartre.

Erindi mitt í París er ekki bara frí, gaman og kirkjumyndataka, heldur þátttaka í ráðstefnu um bréfaskriftir fórnalamba helfararinnar á Memorial de la Shoah. Ég hef lengi verið með í bígerð bók með bréfum heillar fjölskyldu sem útrýmt var. Segið frá því síðar, en sýni ykkur hér eitt bréfa þeirra af u.þ.b. 110 sem í bókinni verða birt og rædd.

Athugasemdir

[Vilhjálmur Eyþórsson, 18.2.2020 kl. 22:31]

París er falleg borg og þar er margt að sjá. Maturinn, fötin og margt annað er flott. En einn stórkostlegur gali er á Parísl

Hún er full af Frökkum! Fransmennirnir eru bókstaflega út um allt!

Þess vegna er ég lítið hrifinn af París.

[Halldór Egill Guðnason, 19.2.2020 kl. 00:29]

 Ætlar Fornleifir að liggja á öllu sínu safni merkilegra hluta, einn til loka, eða deila með áhugasömum? Með merkilegri síðum sem maður heimsækir og fróðleiknum góð skil gerð. Fá aðrir að njóta, eða megum við eiga von á fréttum frá París um að hérlendur eftirlaunaþegi hafi hnigið niður á götunni í gær, með sýningu í vasanum?

 Góðar stundir, með kveðju að sunnan.

[FORNLEIFUR, 19.2.2020 kl. 11:54]

Leitt að heyra Vilhjálmur Eyþórsson um þessa hræðilegu reynslu þína. Þetta sama heyrði ég sagt um Íslendinga nýlega.

Halldór kolefnisaldursgreiningarvélin fyrir sunnan er væntanlega biluð. Það er langt í ellilífeyrinn hjá ritstjóra Fornleifs. Fornleifur er hins vegar að minnsta kosti 100 ára. Ætli ég fái lífeyrinn nokkuð fyrst það er búið að snuða mig um aðra slíka  bitlinga. Enn allir geta auðvitað hnigið niður hvenær og hvar sem er, og þá er París líklega ekkert versti staðurinn ef maður gleymir ekki Evrópusjúkrasamlagskortinu sínu.