Mjöll komin á áttræðisaldurinn

Frú Mjöll Snæsdóttir, fil.kand., hér í bæ (ef þið eruð í Reykjavík) er sjötug í dag. Þetta gerist fyrr eða síðar fyrir flesta. Ég naut þess árin 1981 og 1982 að fá að vinna stund úr sumrum hjá gömlu pervertunni á Hólnum (Stóru-Borg). Allir vita að enginn varð samur maður eftir að hafa reynt hólinn.

Í þá tíð var vandfengið að komast í uppgröft fyrir unga stúdenta í fornleifafræði. Kristján Eldjárn fann fyrir mig pláss hjá Mjöll. Er eg henni ævinlega þakklátur fyrir vistina.

Þetta ljóta viðurnefni, gamla pervertan, sem þið hnutuð líklega um í fyrstu málsgreininni, fann ég ekki upp. Það kom til af því að Mjöll var hafsjór af þjóðlegum bröndurum, dónalegum. Þá reitti hún af sér í nestistjaldinu á Stóru-Borg. Það veitti þreyttum vinnudýrum hennar mikla ánægju og andlega upplyftingu. Að loknum brandara, héldu sumir vart vatni og aðrir hneggjuðu út á sandinn. Þá flaug þetta viðurnefni eitt sinn út úr velhressum kvenstúdent og hélst lengi síðan.

Ég hef skrifað örlítið um ævintýrin á Stóru-Borg hér á Fornleifi (Sjá hér, hér, hér og hér), en bíð enn eftir stóru verki frá Mjöll um vinnu okkar margra á hólnum góða.

Til hamingju með sjötugsammælið Mjöll. Lifðu heil.

Myndin efst sýnir Orra Vésteinsson sagnfræðing, sem úr mútum kominn gerðist fornleifafræðiprófessor, og Mjöll að mæla eitt af mörgum gólfum á Stóru-Borg; en á bak við þau gengur léttklæddur maður og hlær af einum af dónalegheitunum úr tjaldinu. Mér sýnist að lóa fljúgi yfir honum ... nei þetta er ryk sællra minninga.

Athugasemdir

[Ingibjörg Ingadóttir (IP-tala skráð) 13.2.2020 kl. 13:52]

Vilhjálmur, af hverju kallarðu Mjöll skólasystur mína frú? Mér vitanlega hefur hún aldrei gifst.

[FORNLEIFUR, 13.2.2020 kl. 15:15]

Þegar konur eru komnar vel yfir sextugt er óhætt að kalla þær frúr, án þess að þær hafi gifst. Ég veit ekki betur en að drengir um fermingu fái bréf sem eru stíluð á Hr. (Herra). Ég þoli ekki þann ójöfnuð þegar stráklingar geta verið herrar og konur eru frökenar og einhverjar annars flokks fraukur alla ævi ef þær giftast ekki karlpungi. Menn eru herrar áður en og eftir að þeir kvænast.

Svo get ég ekki fyrir nokkra muni kallað Mjöll fröken. Ég heimta jafnrétti og þori bæði get og vill það. Mjöll sagði okkur starfsmönnum á Stóru-Borg, að hún hefði verið "viðloðandi" mann um tíma, og var sá flugvélavirki í Lúxemborg. Ekki veit ég til þess að þau hafi gengið í hjónaband; en hver veit??

[Thorvaldur Sigurdsson (IP-tala skráð) 1.3.2020 kl. 16:44]

Er þetta ekki félagi Einar Schovelín þarna á bak við?

[FORNLEIFUR, 8.3.2020 kl. 16:27]

Jú Einar Jónsson, líklegast nákvæmasti maður rannsóknarinnar. Þegar hann teiknaði var allt pottþétt. Þess vegna fékk ég hann í vinnu hjá mér á Stöng.