Vel kemur oss nú refillinn inn góði

Nú komu svo sannarlega gleðitíðindi fyrir okkur sem saumum mikið í og að.

Með einu klikki er hægt að fara suður í Normandí til að fá refill á fræðin með því að skoða Bayeaux-refilinn í smæstu smáatriðum.

Ég man þá tíð er ég keypti refilinn í 10 cm. hárri bók, sem var hins vegar 30 sm. breið, þar sem refillinn var allur samanbrotinn. Það þótti framför um 1980. Refillinn er í raun um 70 metrar að lengd, en í bókinni var hann nokkrir metrar.

Skoðið nú refilinn hér.

Þið sjáið svo efst að þær skemmtu sér stúlkurnar sem saumuðu refilinn, hvort sem það var nú á Englandi eða í klaustrinu Saint Florent de Saumur í Leirudal. Við skulum ekki spinna meira um það hér - en er þetta ekki Sir Roy af Chippendale í eigin persónu? Er nokkuð þessu líkt á Njálureflinum á Hvolsvelli?

Vilhjálmur fer til Bægisár/Bæjar (fr. Bayeaux/lat. Bagias)?

Athugasemdir

[FORNLEIFUR, 21.2.2021 kl. 07:08]

Þetta efni verður ekki kynnt á Facebook. Pempíur og meðlimir á því meinlætaklaustri þola ekkert lendarkonfekt.

[Upprétti Apinn, 22.2.2021 kl. 20:35]

Ég man að ég last einhverstaðar að starfsbræður þínir teldu að refillinn hafi verið lengri og að það vanti endirinn á hasarblaðasögunni.

[FORNLEIFUR, 23.2.2021 kl. 16:24]

Jú vissulega er hann dulítið snubbóttur í endann, apinn minn. Þrennt kemur til greina.

1) Ritskoðun

2) Stytting vegna þess að nunnurnar hafa fríkað út í strípalingum.

3) Léreftið var uppurið og Ódó (sem mun hafa pantað verkið) þurfti að fá refilinn tafarlaust. Frumsýningargestir geta ekkert beðið.