Forfeðurnir geifla sig

Núna yfir í smá mannfræði, sem hefur legið örlítið á hakanum hér á Fornleifi.

Það hljómar svei mér ekki vel að "deepfeika" afa sinn í Hollandi. Það hef ég hins vegar gert, og biðst afsökunar ef það fer fyrir brjóstin á einhverjum. Hann verður mér vart reiður, karlinn. Afi minn var greinilega mjög smáfríður. Ekki hef ég erft mikið af því eftir að genum hans var blandað við gott íslensk tröllakyn og víkinga. Þaðan fékk ég svo tekið sé dæmi helvítis Skagafjarðarskallann.

Ég hef líka djúpfeikað (deepfaked) einn langafa minna í Hollandi, sem var faðir þess á efri myndinni (hér hef ég skrifað um þá áður).

Þetta er álíka og að lesa blöðin í Diagon Alley í Harry Potter bókunum.

Ég á því miður aðeins tvívíðar minningar um þá feðga. Því er þessi djúpfágun á þeim ef til vill harla góð leið til að sjá þá aðeins betur. Næstum því á við að fara á góðan miðilsfund.

Langafi minn mun hafa verið frekar strangur, en hér fæ ég á hann bros í lokin og glimt i øjet eins og Danir segja. Það gæti vel verið "feik". En pabba var hlýtt til afa síns og minntist þess hve skegg afa hans stakk hann er kallinn faðmaði hann.

Amma mín, tengdadóttir karlsins með tyrkneska yfirvaraskeggið, var aftur á móti lítið fyrir karlinn gefin. Hún líkti honum við langhund. Ekki það að hann var hávaxinn að sígeltandi, því það var hann sannarlega ekki; en hann gekk ávallt með háan svartan hatt til að fá smá upphækkun. Þessi samlíkingin hennar ömmu minnar kom til vegna þess að henni þótti hann eins og langhundur í framan. En samt fékk hún sér stóran langhund í ellinni, sem dró bringuna eftir gangstéttinni. Hundurinn var uppgjafahundur frá öðrum gamlingjum. Blessuð gamla konan réði afar illa við hundsskömmina, sem dró hana óviljuga hingað og þangað um Haga (den Haag). Að lokum varð hún því að láta hann af hendi er hún veiktist einu sinni og var lögð inn á spítala.

Verst er að ég man ekki nafnið á hundinum. Kannski hefur hann heitið Willem eins og allir karlarnir í ætt pabba hétu að fyrsta eða öðru nafni. Þeir hétu í hausinn á díkjakonungi sem var víst góður við þá.

Faðir minn heitinn kom aftur á móti frekar ankannalega út úr djúpfeikuninni.

Vegna hárprýðinnar (sem var rauð og mikil) hefur forritið, sem útbýr algebrugretturnar á forfeðrum manns (Rauð aðvörun: forritið er hannað í Ísrael fyrir mormóna í BNA), látið hann kinka kolli heldur kveifarlega fyrir minn smekk. Ja, hvað finnst ykkur?

Mér finnst þetta sannast sagna hálf krípí, eins og krakkarnir segja, að sjá föður minn láta svona. Ég held barasta að forritið hafi klikkað mjög illilega á karli föður mínum og augun eru eins og í Bambí. Ég er ekki alveg viss um að móðir mín þekki manninn sinn aftur á þessari geiflu. Hræddur um ekki.

Svo við skoðum Y-DNA fenótýpuna hér í lokin: Aukin lífsgæði ollu því greinilega, að dvergvaxinn langafi minn (miðmaðurinn) og afi (á efstu mynd), sem báðir fæddust á 19. öld, gátu af sér föður minn sem varð 1.82 metra að hæð og náði fjórfaldri þyngd á Íslandi miðað við fallþyngd við komuna til Íslands. Ég hækkaði aðeins meira, þótt íslenskir forfeður hefðu ekki við háir í loftinu. Sonur minn Rúben, á nú metið, þó ekki sé danskur ættgarður hans sérlega hávaxinn heldur. Ekki þarf að geifla soninn, því hann er í "tölvufjarnámi" á síðasta ári í menntaskóla. Hvar endar þetta? Verður ættin orðin víðsýn og komin yfir tvo metra í lok aldarinnar ef fram heldur sem horfir? Hér að lokum ritstjóri Fornleifs á yngri árum.

Athugasemdir

[Jón Steinar Ragnarsson, 10.3.2021 kl. 06:26]

Hvað heitir þetta forrit?

[FORNLEIFUR, 10.3.2021 kl. 07:50]

Sæll Jón Steinar, Ég vil ekki auglýsa fyrir fyrirtækið, sem reynir að lokka til sín kúnna á þessu forriti, en um það er fjallað hér https://www.bbc.com/news/technology-56210053

Þetta verður vafalaust komið út á fleiri staði eftir nokkra mánuði og þá ókeypis.

mbk,

Vilhjálmur Örn

[FORNLEIFUR, 10.3.2021 kl. 07:52]

Ég kroppaði svo myndina og bjó til gif. Þá auglýsir maður ekki fyrir fyrirtækið í Utah.

[FORNLEIFUR, 10.3.2021 kl. 08:00]

Sástu annars greinina um SS-Úlfinn hér á undan:

https://fornleifur.blog.is/blog/fornleifur/entry/2261925/

[Jón Steinar Ragnarsson, 10.3.2021 kl. 10:10]

Já, ég sá hana og hafði engu við að bæta. Flestir þessara manna eru dauðir nú ef ekki allir.

[Jón Steinar Ragnarsson, 10.3.2021 kl. 11:39]

Búinn að prófa þetta. Árangurinn misgóður en sumt mjög gott og "creepy" í marga staði. Eins og þú reyndar segir líka.

[FORNLEIFUR, 20.3.2021 kl. 07:40]

Settu mynd af sjálfum þér inn í reiknilíkanið og sjáðu hvað gerist. Líklegast verður eldgos...