Hvert í hálogandi

Þessi ósköp er svo dómsdagsmynd skjálftavaktar Fornleifs fyrir helgina.

Ég átti erindi við Þjóðminjasafnið í dag, en enginn svaraði í símann. Það er auðvitað svo mikið að gera á stofnun sem hefur verið megruð (leaned) niður í yfirsetukonu og hreingerningarfólk.

Enn einn af greiðviknu starfsmönnunum, fyrir utan Þjóðminjavörð, er nú líka hætt. Komin á aldur eins og það heitir, svo hún getur ekki reddað mér lengur. Nú, án árangurs fyrir allt erfiðið, var mér hugsað til ánægjulegrar heimssóknar minnar í safnið haustið 2019, þar sem ég vann með hollenskum kollega í nokkra daga. Mér leist vel á húsakynnin og andann á stofnuninni, þótt flestir starfsmenn væru við hausthreingerningar við Suðurgötuna.

Þá fór ég að velta fyrir mér staðsetningu geymslu- og vinnuhúsnæðis safnsins. Það er í miðju sögulegu hrauni. Þegar allt fór að hristast fyrir nokkrum vikum síðan, hélt ég áfram með þráhyggjuhugsunina um þennan stað við hliðina á Icelandair söluveri og gríðarstórri heilsuræktarstöð. Þarna í fegurri hluta lagerbyggðarinnar á Gaflinum, er mikilvægasti þjóðararfurinn geymdur, og kannski beint ofan á sprungu eða í hættu vegna hraunflæðis úr t.d. Brennisteinsfjöllum, sem átt hafa það til að renna eftir landnám, hvenær sem það nú var.

Nú er það svo, að sagt er að atómsprengjur geti aldrei grandað Ráðhúsinu í Reykjavík. En ætli nokkur vilji  sprengja það.  House of Icelandic mun víst einnig vera "reddí" í "kvað sem vera"; Jafnvel þotu sem flogið yrði lóðrétt og beint niður í það allra heilagasta í húsinu. Það kæmi ekki skráma á Flateyjarbók. Ekki seinna vænna þegar handritaarfurinn er í flóðahættu í klóakkerfi Háskóla Íslands, og þar skall hurð nærri hælum. Klósettpappír fannst gær inni í Grágásarhandriti í fólíóstærð. En kannski var þetta nú eldhúsrullan sem Stefán heitinn Karlsson týndi eitt sinn?

En enginn hugsar neitt um mikilvægasta þjóðararfinn sem er á lager suður í Hafnarfjarðarhrauni. Hann gæti runnið undir hraun, bráðnað ofan í sprungu og þjóðararfinum þar með komið endanlega fyrir kattarnef, þótt köttum sér ekkert um að kenna.

Vill ekki einhver, og það hátt í kerfinu, t.d. fornminjaráðherra, segja mér hvað áætlun Þjóðminjasafnið hefur, þegar hraun fara kannski að fljóta ofan í hinn fína Hafnarfjörð, ryðjandi fornleifum og menningararfi #1 á undan sér?

Athugasemdir

[FORNLEIFUR, 20.3.2021 kl. 06:01]

Jæja "spálíkönin" reyndust rétt hér hjá eldgosavakt Fornleifs. Réttari en glámskyggn glerkúlan sem Benedikt Ófeigsson jarðeðlisfræðingur leit í fyrir kvöldfréttir Sjónvarps, og eftir að spálíkan Fornleifs hafði verið gefið út. https://www.ruv.is/frett/2021/03/19/a-sidur-von-a-eldgosi?itm_source=parsely-api

Farið varlega, segir íslenska völvan, sem dönsku blöðin notuðu oft um áramót hér um árið til að spá um atburði komandi árs. Hún gekk gjarnan líka undir nafninu, den islandske vulva. Þetta var í þá tíð er Danir hlógu enn að bröndurum sínum og sáu mun á þeim og veruleikanum.