Vindlar Jóns Forseta

Guðmundur Magnússon sagnfræðingur, blaðamaður og fyrrverandi löglega settur þjóðminjavörður hefur mikinn áhuga á mikilmennum. Ef það var ekki Gorbatsjov eða Thorsarar, heilir, hálfir eða skornir, þá hefur Jón Sigurðsson lengi verið honum mikið áhugaefni.

Á FB sinni leitaði Guðmundur um daginn upplýsinga um vindla sem munu hafa verið seldir á Íslandi á 3. áratug 20. aldar. Voru þetta vindlar sem kenndir voru við Jón Sigurðsson eða báru nafn hans.

Sendisveinn Fornleifssafns hefur mikinn áhuga á vindlum. Hann er bókstaflega fæddur með vindlareik í æðum, sonur vindlainnflytjenda (sem flutti inn Willem II), kominn af vindlarúllurum og skyldur tóbaksplantekrustjórum sem voru, er  þeir kréperuðu úr pestum á plantekrunum, fluttir til Hollands saltaðir í tunnum, svo hægt væri að grafa þá í vígðri mold. Sendillinn hjá Leifi hinum forna reykir þó ekki vindla frekar en Guðmundur Magnússon.

Sendisveini Fornleifs datt í hug að mynd af "uppdigtuðum" þjóðhöfðingja sem prýddi vindla frá hollensku vindlaverksmiðjunni Mignot & de Block í Eindhoven í Hollandi (sjá efst), sem kallaðir voru REGAL, hefðu verið kallaðir Jóns Sigurðssonar vindlar á Íslandi. Sendisveininn setti upp myndir af REGAL-kössum og vindlamerkjum hugmynd sinni til fulltingis á FB Guðmundar Magnússonar.

En nei, Guðmundur greindi þá frá því, hvernig þessir vindlar voru notaðir í stjórnmálabaráttunni fyrir kosningar árið 1926, og setti neðanstæða úrklippu úr Mogganum máli sínu til stuðnings.

Hjálp!

Fornleifur biður nú alþjóð aðstoðar við að finna kassa undan Jónavindlum Sigurðssonar, eða vindlana sjálfa og vindlamerkið.

Ef einhver býr svo vel að hafa geymt vindla, vindlamerki eða óopnaðan kassa síðan 1926-28, eru verðlaun í boði. Fornleifur sendir eintak af "Súkkulaði Siggu" til þeirra tveggja fyrstu sem geta upplýst og sannað að þeir eigi vindlakassa eða vindla með nafni og ásjónu Jóns Sigurðssonar Jóns forseta frá fyrirtækinu Mignot & de Block. Vindlar eða kassar verða að vera frá 3. áratug 20. aldar.

Þess má geta að hún Sigga, sem tveir eigendur Jónavindlaminja (ekki þó öskunnar) fá í verðlaun, ef þeir eiga kassa af Jóni Forseta eða bara vindilinn með merki, reykti eins og strompur síðar á lífsleiðinni - en vissulega ekki Jóns Sigurðssonar vindla. Sigga reykti velrúllaðar Jónur og vildi ekkert annað.

Úr auglýsingu í Alþýðublaðinu 18 júní 1930. Jón er ávallt nefndur með Regal. Er það tilviljun?

Athugasemdir

[Haukur Árnason, 1.9.2022 kl. 23:26]

Ég hef reykt Bjarna frá Vogi. Bara nokkuð góðir. En Jóns vindlana hef eg ekki heyrt um.

[FORNLEIFUR, 2.9.2022 kl. 06:21]

Kærar þakki Haukur, Bjarna frá Vogi vindlana þekkja margir sem eru orðnir fullorðnir, en aldrei hef ég heyrt um Jóns vindla Sigurðssona fyrr en ég sá að Guðmundur Magnússon var að leita að þeim. Maður vonar á einhver eigi enn skrúfur eða ástarbréf í Jóns Sigurðssonar kössum. En hálfpartinn grunar mann að Moggamenn hafi útbúið "fake news" með Regal kassa árið 1926.  

[Kristján Sveinsson (IP-tala skráð) 2.9.2022 kl. 09:05]

Jón Sigurðsson, sígar, var til sölu hjá Tóbaksverslun Íslands h.f. 1927, talinn þar fyrstur í langri vindlaröð, sbr.: https://timarit.is/page/4088972?iabr=on#page/n12/mode/2up/search/t%C3%B3baksverslun

Svo ekki var það bara í kosningaorrahríð sem fýrað var Jónum.

[FORNLEIFUR, 2.9.2022 kl. 10:20]

Kristján, hvernig má vera að enginn sígar, kassi eða vindlamerki hafi varðveist þegar höfð er í huga sú dýrkun og dá sem á Jóni var? Ég sé í auglýsingunni, að Regal eru nefndir á eftir Jónsvindlum og árið 1930 er Regal nefndur á eftir Jóni í auglýsingu í Alþýðublaðinu. Ég hef sett bút úr auglýsingunni í Alþýðublaðinu neðst í greinina (sjá ofar).

[FORNLEIFUR, 2.9.2022 kl. 11:06]

Hér https://eindhovenfotos.nl/1/Mignot.html finna lesendur kvikmynd frá 1958 þar sem tóbakið er lofað. Var myndin gerð í boði Mignot & de Block í Eindhoven, sem framleiddu Regal vindla. Enginn sést þó Jónsvindill í kvikmynd þessari.

[Jón Steinar Ragnarsson, 2.9.2022 kl. 13:04]

Þetta hljómar nú eins og pólitísk sannleikshagræðing sem oft vill verða þegar málefni skortir fyrir kosningar. Spunavélar voru líka notaðar samhliða prentvélum í þá daga sem nú.

Gaman að sjá súkkulaðistelpuna sem helsar mér hér á hverjum morgni. Þægilegasta sambúð sem ég hef átt.

[Jón Steinar Ragnarsson, 2.9.2022 kl. 13:07]

Jón var annars anti Regal, svo tenging spunameistarans er ansi hæpin.