Omnia Islandica est sicut liquiritiae texit scelerisque

Forseti Íslands fær nú á mánudag, 12.9.2022, skjöld sinn hengdan upp í Friðriksborgarhöll á Sjálandi. Skjöldinn fær hann í framhaldi af því að hann fékk Fílaorðu með kórónu árið 2017. Allir sem fá fílinn verða að bera skjöld (sjá meira um fílaskildi forsetanna hér).

Fílabling á brjóstið á manni, sem hagar sér eins og ólmur elefantur í glervörubúð, er reyndar mjög vel við hæfi.

Nýlega mærði Guðni menn frá löndum þar sem gyðingamorðingjar eru í gríð og erg hylltir sem frelsishetjur og svo nokkru síðar var hann orðinn talsmaður sukklakkríss á Íslandi. Já,forsetinn hefur gerst æðsti dómari fyrir lakkrísframleiðslu heimsins.

Í mjög þóttafullri yfirlýsingu, sem ekki sæmir forseta þjóðar - nema ef hann heitir Trump eða Prump, sagði Guðni um daginn, að Danir ættu frekar að hjúpa svínasteik og smurt brauð í súkkulaði og hélt því fram að Danir hefðu stolið súkkulaðihjúpuðum lakkrís frá okkar aumu þjóð í Ballarhafi.

Þessi tilfinningarþrungna yfirlýsing kom í kjölfar þess að lakkrísframleiðandi af vafasömum aðalsættum í Danmörku hélt því fram í andartaks ofmetnaði auglýsingaheimsins, að hann hefði fundið upp þá miklu list að hjúpa lakkrís súkkulaði. 

En nú er lakkgrísdrengurinn Johan Bülow frá Borgundarhólmi búinn að gefa sig og hefur boðið Forseta Íslands í lakkrísverksmiðjuna til að ná sáttum við íslenska þjóð og forystusauð hennar. 

Lakkrísforsetinn og Bülow lakkrísframleiðandi eru báðir á villigötum.

Ritstjóri Fornleifs fékk sem ungur lakkrís hjúpaðan í súkkulaði og einnig lakkríshlaup hjúpað í súkkulaði. Það var í Hollandi. Ég kallaði þessa bita lakkrískúka og var ávíttur fyrir það eins og allt annað. Betri þótti mér sykraður engifer hjúpaður í súkkulaði og anishlaup með þunnri súkkulaðiskel úr hágæða 50% súkkulaði framleiddu úr kakó frá Súrínam.

Það hefur lengi verið hluti af þjóðernisstolti og jafnvel ólýsanlegum og kjánalegum rembingi, líkt og með súkkulaðilakkrísinn á Íslandi, að þjóðir eigni sér ákveðna rétti eða matvöru. 

Deilan um uppruna "frönsku kartaflnanna" er enn ekki leyst. Flæmingjar í Belgíu halda enn að þeir eigi heiðurinn, en líklegast eiga Spánverjar hann, því þeir komu með kartöfluna til Niðurlanda, er þeir stjórnuðu þeim um tíma. Grikkir hafa farið hamförum út af Fetaostinum. Sá ostur er að öllum líkindum bein áhrif frá Tyrklandi (Ottómannaríkinu) sem stjórnaði Grikklandi í langan tíma, en sjálft orðið Feta er málsifjalega skylt orðinu Fita á íslensku. Kannski ættu Íslendingar líka og krefjast réttar síns á Fetunni, nú þegar þeir eru búnir að gefa heiminum Skyrið gratís á silfurfati. Skyr er orðið Regtrademark í Þýskalandi og Danmörku.

Skotar gætu alveg átt það til að súkkulaðihjúpa Haggis, eins þeir djúpsteikja iðnaðarsúkkulaði -  Þeir halda einnig að brennt vín sem þeir kalla Whiskey sé gelískt til allra síðasta dropa, en orðið er norrænt og skylt Væske (vökva) á dönsku og vaski (að vaska sig) á Íslensku.

Tómatsósan er hvorki ensk né bandarísk, og orðin Katchup/Ketchap eru fengið af láni frá Indónesíu af Hollendingum, sem skiluðu indónesíska orðinu fyrir sósu til BNA. Canapé-forréttir Frakka eru ekki franskir fyrir fimm aura, heldur fyrst og fremst rússneskir að uppruna... Menn deila svo  enn um majónesið, sem margar þjóðir telja sig eiga. Íslendingar héldu lengi vel að einhver Gunnar væri Gvöðfaðir þeirrar kransæðasmurolíu. Frakkar eignuðu sér majóið um tíma, en drullumallið var reyndar búið til í Rómarveldinu. Aftur á móti voru það Rússar eða gyðingar sem líklega kynntu það fyrir Frökkum. Í Sovétríkjunum sálugu var majo hápunktur matarmenningar. Of sáust starfsmenn sovéska sendiráðsins í Kaupmannahöfn kaupa sér í túbu af majó í Irma-búðunum, sem þeir pressuðu beint í munninn og skoluðu gumsinu niður með hinum vota vodka.

 

Nú er fyrrum "hollenskt" fyrirtæki, Venco að nafni og mjög fornt, sem fyrir löngu er komið í eigu sænsku Cloetta samsteypunnar - sem reyndar var upphaflega "danskt" fyrirtæki sem stofnað var af ítölskumælandi bræðrum frá Sviss árið 1862 - farið að framleiða heil 10 afbrigði af lakrísfylltum súkkulaðikúlum, svipuðum þeim sem Bülow framleiðir ---- eeen á miklu lægra og jafnvel viðráðanlegra verði en kúlur "uppfinningarmannsins" Johan Bülows sem byrjaði sína framleiðslu er hann var nýfarinn að ganga árið 2007.

Bülowspörðin eru svo dýr, að halda mætti að Sankti Zelenskij hafi fengið að prufusleikja allar kúlurnar áður en þær voru settar í umbúðir. Ja, einhvern veginn smitast vitleysan.

Nú sýnist mér það liggja í augum uppi, að VENCO/Cloetta þurfi þegar að fá leyfi hjá hjúpt sokknum lakkrísforsetanum á Álftanesi á Krummalakkrísskuðinu í Norðurballarhafi, þar sem eitt helsta þjóðarstoltið er 4. flokks lakkrís sem dýft hefur verið í léleg súkkulaði? 

Lakkríslýðveldið Ísland

Maður verður alvarlega að velta því fyrir sér, hvort eitthvað mikið sé að í lýðræðisríki, þar sem forseti, sem þegar hann er ekki að mæra ráðamenn frá löndum sem falsa sögu sína til að réttlæta hatur á minnihlutum í landi sínu (sjá hér), kastar sér út í milliríkjadeilur um lakkríssúkkulaði. 

Fornleif grunar, að Guðni verði að éta lakkrískonfektið ofan í sig. Allt hangikjötið á Bessastöðum um jólin verður hjúpað súkkulaði og brúnu kartöflurnar (sem reyndar eru hvorki íslenskar, danskar, né franskar) verða í þykkri sósu af suðuramerísku súkkulaði með lakkrískurli stráðu yfir.

Íslenska ruglið LENGI LIFI og kandískóngurinn á Bessastöðum líka. Við hrópum í heift og full af andagift eins og Karíus og Baktus gerðu áður en þeim var skolað út í hafsauga með veskju: Meira gott, meira gott  - Jens, VEÐ HEIMTUM ÍSLENSKAN SÚKKULAÐILAKKgRÍS! Danir geta bara étið sín litningabreyttu sukksvín. Í þau hefur verið bætt erfðasyndum úr mannskepnunni.

En athugið: Sannleikurinn er ávallt bestur berrassaður án brúnkukrems, hjúps eða hvers konar glassúrsaðra litningasvika.

Staðreyndin er einu sinni sú, að Íslendingar hafa aldrei fundið neitt upp, ekki einu sinni vitleysuna. --- Afsakið lesendur góðir landhelgisklippurnar voru reyndar alíslensk hugmynd.

Nýjustu fréttir frá Kaupmannahöfn

Fornleifur hefur fengið af því nasaþefinn, að einkennisorðin á fílablingsskildi Guðna forseta, sem afhjúpaður verður nk. mánudag, beri þessa áletrun:

Omnia Islandica est sicut liquiritiae

texit scelerisque

sem útleggja má á eftirfarandi hátt: Allt íslenskt er eins og súkkulaðihjúpaður lakkrís. Skjöldurinn ber mynd af brúnum og svörtum gríslingi í brúnun forarpytti, sem strýktur hefur verið hrínandi með hrísi. Undir stendur skamm skammtöfunin: G [uðni],[Lakk) RÍS.

Verði ykkur að góðu. Guðni heilsar frá okkur blandfólkinu í höllinni og rúllar síríously góða lakkrísjónu með Margréti áður en hún fer í útför Betu frænku.

Fíll Guðna er vitaskuld með veglegan rana á milli bakfótanna. Vel á við að hann sé rauður. Takið eftir hinum þjóðlega lakkrísbakgrunni. Girnilegt...

Athugasemdir

[FORNLEIFUR, 10.9.2022 kl. 16:13]

Myndin efst er af sendli Fornleifs ungum, áður en hann fór í meðferð vegna ofáts á sirious lengjum og lakkrís úr lélegu hráefni og eintómri 4. flokks sterkju frá steppum Úkraínu.