Sómi landsins og skjöldur var í Danmörku í dag

Nú varð það loks úr, að Forseti Íslands fékk skjöld þann sem hann hefur beðið eftir að fá síðan hann var sæmdur hinni dönsku Fílaorðu af Margréti Danadrottningu árið 2017. Ýmislegt hefur orðið til þess að það dróst, m.a. kórónan á okkur öllum og margt annað. En klukkan 11 í morgun var skjöldurinn afhjúpaður.

Fornleifur er, eins og allir vita, mikill forsetadýrkandi og drottningarsinni, en aðeins þegar þær verur eru viti bornar og mannlegar. Hann skrifaði í leiðindum á Cóvid-tímum um skildi þá sem íslenskir forsetar höfðu fengið í kjölfar þess að á þá var hengdur danskur albínófíll (Sjá hér og einnig hér). Getgátur Fornleifs í fyrri greininni um skjöld Guðna reyndust því miður ekki réttar.

Fornleifur fyrstur með fréttirnar

Fornleifur er oft fyrstur með fréttirnar og sendi í dag ljósmyndara sinn út í kúamykjusveit á Sjálanditil að reyna að ná mynd af Guðna Forseta og skildinum hans. Ljósmyndadeild Fornleifssafns hefur ráðið mjög góðan ljósmyndara, sem líka er ökufantur. Mjög seinn á ferðinni skaust á Skódanum sínum til Friðriksborgarhallar til að ná forsetanum og öðrum fyrirmönnum á filmu.

Haukfrán augu forsetans sáu ljósmyndaragarminn á Fornleifi (myndin efst sýnir akkúrat , þegar Guðni fékk pata af ljósmyndaragarminum). Forsetinn gekk beint til ljósmyndarans og heilsaði á hann með handabandi sterklegu, og lét þau orð falla að hann læsi nú oft Fornleif, en væri ekki endilega alltaf sammála honum. Ljósmyndarinn varð hálf munnlama við þann dóm, og vegna skyndilegrar snobblömunar vildi hann hafa sagt að Fornleifur væri nú ekki heldur alltaf sammála því sem hann skrifaði sjálfur - en hefði það samt allt sem réttast.

Fornleifur er heldur ekki alltaf sammála því sem forsetinn segir, t.d. nú síðast í lakkríssúkkulaðimálinu - svo það kemur út á eitt hvað forsetanum sýnist.

Ljósmyndagarmurinn er nú að koma út úr myrkraherberginu með ferskar myndir af Guðna og skildinum hans í höllinni.

Á skildinum stendur, DOM: GUÐNI TH. JÓHANNESSON PRAESES REIPUBL: ISLANDIE DIE XXIV JAN: AN: MMXVII eða Herra Guðni Th. Jóhannesson, forseti lýðveldisins Íslands. Þann 24. janúar árið 2017.

Á borða yfir opinni bók, sem rauður Þórshamar svífur yfir stendur:

TIBI IPSI ESTO FIDELIS 

sem eru að líkindum Sókratísk ummæli, og má þýða yfir á íslensku á þennan hátt: Vertu sjálfum þér trúr (eða samkvæmur), sem er líka ágæt íslensk lífsregla.

Þórshamarinn yfir bókinni er svo líklega tilvísun í sagnfræðina eða Thorlacius nafnið. Að hamarinn er rauður, skal látið ótúlkað hér á Moggabloggi.

Á neðra helmingi skjaldarins er silfrað haf, væntanlega Atlantsálarnir og í því birtist kanadíska Hlynslaufið rauða, og vísar það vafalaust til Alizu konu Guðna, sem hann sótti sér og þjóðinni, til heilla yfir álana.

Í hinu silfraða hafi dóla líka 5 lítil akkeri og þar eru ugglaust komin börn þeirra hjóna, sem eru fimm að tölu. Svartgljáandi bakgrunnurinn er kannski íslenski lakkrísinn sem Guðna er svo hugleikinn að hann berst með kjafti og klóm fyrir rétti hans á alþjóðavettvangi.

Fornleifur gefur skildinum ágætis einkunn, því hér kemur loks forseti, sem kemur því að, að forsetafrúin (eða maðurinn) gegnir einnig mikilvægu hlutverki fyrir embættið: Ber er á baki kvenlaus karl. Þannig á það að vera.

Annað, sem fréttnæmt mætti þykja, er, að íslenski sendiherran kom allt, allt, alltof seint í skjaldarafhjúpunina í Friðriksborgarhöll. Ég sem hélt að hún ætti hraðskreiðan sportbíl.

... og að einhver afgangur varð af smákökum, snittum og kampavíninu. Hér sjást orðumeistarar eða starfsmenn Þjóðsögusafnsins í Friðriksborgarhöll bera fat af kökum og smá kampavínssull frá höllinni. Verði þeim líka að góðu.