4. getraun Fornleifs

Hvað sýnir þessi mynd? Hvar og hvenær birtist hún upphaflega? Þetta er einfalt og létt. Myndina er hægt að stækka með því að klikka á hana tvisvar til þrisvar sinnum.

Athugasemdir

[Guðmundur Magnússon, 22.1.2012 kl. 20:47]

Er þetta ekki ferðabók Blefkens?

[FORNLEIFUR, 23.1.2012 kl. 10:55]

Sæll Guðmundur, 

Rétt er það að hluta til. Þessi mynd birtist fyrst á korti í útgáfu á bók Blefkens. Upphaflega var "Íslandslýsing" Blefkens gefin út árið 1607 á latínu: ISLANDIA Sive Populorum & mirabilium quæ in ea Insula reperiuntur Accvratior Descriptio : Cui de Gronlandia sub finem quædam adjecta. Árið eftir kom hún á hollensku og bar þá heitið heitið Sheeps-Togt Ysland en Groenlands gedaan door Dithamr Blefkenius in´t Jaar 1563 (hollenska útgáfan er því miður ekki til á Landsbókasafni/Þjóðarbókhlöðu en ég þekki mann sem er svo heppinn að eiga hana og í þeirri útgáfu er margfræg mynd af Heklu úti við strönd og af mannni sem baðar út höndum við eldtungurnar á toppi fjallsins).

En hvað sýnir myndin (á myndin hér að ofan að sýna), og úr hvaða útgáfu af Blefken er hún?

[FORNLEIFUR, 28.1.2012 kl. 08:14]

Sæll aftur Guðmundur, 

Mér sýnist að enginn viti þetta, þó svo að formaður Fornleifasjóðs hafi verið heitur. 

Jæja þá: þetta er úr útgáfu Blefkens frá 1706 og myndin á kortinu  telja menn að sé tilraun kortagerðamannsins að sýna Baska. Ekki veit ég hvort baskneskir sjómenn í raunveruleikanum borið hettur með eyrum, en rollurnar eru mjög líkar íslenskum rollum. Fyrir ofan myndina, við eyju sem ekki er til, stendur Anno 1613 by Biscayers beseylt. Kortið er því með upplýsingar frá því löngu eftir ferð Blefkens.

Hollendingar, sem gert hafa þetta kort, þekktu vel til Baska, enda réðu þeir Baska á fyrstu hvalveiðiskip sín. Fyrstu hvalveiðileiðangrar Baska til Vestfjarða er taldir hafa veriðárið 1613 (og vonandi ekki vegna áletrunar á hollensku korti útgefnu árið 1706). Baskar héldu áfram þeim veiðum fram til ársins 1615. Þá var framið fjöldamorð á þeim fyrir vestan, Spánverjavígin. Sjá frekar hér.

[Guðmundur Magnússon, 28.1.2012 kl. 21:02]

Ég þekkti því miður bara myndina. Takk fyrir viðbótarfróðleikinn. (Og 2010 lét ég af formennsku í stjórn fornleifasjóðs, enda skipunartími minn þá útrunninn).