Er Minjastofnun Íslands spilavíti ?

 

Nýlega var sett á laggirnar ný stofnun á Íslandi. Minjastofnun Íslands, sem sett er saman úr Fornleifavernd Ríkisins og Húsavernd Ríkisins. Í morgun sá ég auglýsta stöðu arkitekts við stofnunina, sem ég skoðaði, og athugaði þá hvort Minjastofnun var komin með nýja heimasíðu. Mig langaði að athuga hvort fyrrum forstöðumaður Húsaverndar Ríkisins hefði sagt upp störfum, en hann er arkitekt og einn þeirra sem sótti um stöðu forstöðumanns Minjastofnunar, en fékk ekki.

Stofnunin er komin með vísi að heimasíðu undir www.fornleifavernd.is, allbreytta frá þeirri fyrri. Ég leitaði einnig að upplýsingum um Stöng í Þjórsárdal og verkefni sem Fornleifavernd sáluga efndi til um Stöng í fyrra. Jú upplýsingarnar voru þar, en meira til mér til mikillar undrunar. Þegar ég leitaði að Stöng. Komu greinilega upp upplýsingar um póker, Kasíno og rúllettu á pólsku og ensku.

Þetta þótti mér afar furðulegt og hrindi í Minjastofnun og bað ritarann þar að leita að Stöng í Þjórsárdal á heimasíðunni og sá hún þá hvers kyns var. Lét hún Kristínu Sigurðardóttur yfirmann stofnunarinnar hafa mig í símann og hún varð vitaskuld líka undrandi, því póker og vefspilavíti held ég að sé ekki skemmtun sem dr. Kristín stundar, svo ég viti.  Kannski smá rúllettu? Nei, ekki held ég það.

Mér og öðrum, sem ég ef sýnt þetta, þykir nokkuð ljóst, að annað hvort er sá sem er að byggja upp þessa heimasíðu Minjastofnunar spilafíkill með mikla pólskukunnáttu, eða að einhver hefur brotist inn á heimasíðu stofnunarinnar og verpt þar einhverjum fúlum eggjum.

Þetta verður auðvitað að rannsaka, þótt það verði ekki beint fornleifarannsókn. En ég gef lesendum mínum hér tækifæri á að sjá þessa „nýju þjónustu" á pólsku sem mætti halda að Minjastofnun sé farin að veita. Kannski væri póker ágæt leið til að fjármagna þessa nýju stofnun? Menn þurfa auðvitað á einhvern hátt að fjármagna 700.000.000 króna verkefnið á Stöng.

Skoðið skjámyndirnar betur  með því að klikka á myndirnar

Athugasemdir

[FORNLEIFUR, 31.1.2013 kl. 14:02]

Nú eftir hádegi hvarf leitarmöguleikinn af heimasíðu Minjaverndar. Eitthvað hefur verið að. Er ekki slík síða búin til af fyrirtæki sem kann sitt fag?

[FORNLEIFUR, 31.1.2013 kl. 16:20]

Það er enn hægt að leita á síð Minjastofnunar og finna vafasamar pólskar síður, en leitarglugginn hefur verið fjarlægður.

[Ragnhildur Kolka, 1.2.2013 kl. 00:39]

Ég þakka þér Vilhjálmur fyrir þessar upplýsingar. Þótt ég sé ekki vel að mér í póker, og ætli mér ekki að vitkast meir í þeim efnum, virðist sem ég eigi ekki annarra kosta völ en skrá mig í pólskunám hið snarasta. Ég var nefnilega svo óheppin að húseign mín varð hluti þessara 2500 verkefna sem Minjavernd fékk í vöggugjöf um áramótin.  Uforvarende, eins og maður segir, því ekki hvarflaði að ráðuneytinu eða húsavernd að upplýsa eigendur að frá og með áramótum ráða þeir engu um viðhald og breytingar á húsum sínum. Það mun þó koma sér vel að ná forskoti í samskiptum við yfirvaldið að kunna eitthvað hrafl í pólsku.

[FORNLEIFUR, 1.2.2013 kl. 06:44]

Það virðist allt vera vanhugsað sem að þessari stofnun lýtur. Fornleifavernd, sú stofnun sem forstöðumaður Minjastofnunar kemur frá, ber ábyrgð á að skrípóverkefnið Þorláksbúð í Skálholti var reist, og nú á að reisa suðurevrópska byggingu með flötu þaki yfir Stöng í Þjórsárdal, þar sem rannsóknum er langt frá því að vera lokið. Allt er þetta gert í nafni "túrisma". 700.000.000 (þið lesið rétt 700. milljónir króna) áttu endurbætur á Stöng að kosta samkvæmt Kristínu Sigurðardóttur, en í gær voru gefnar 20 milljónir til verkefnisins. Eyrnamerktir fyrir ferðamennskuátök - túrisma.

En, er það ferðamennska eða fornleifar sem Minjastofnun á að varðveita og efla?

2500 ný friðuð hús er svo annað 700.000.000 króna verkefni. EN SLÍKIR PENINGAR ERU EKKI TIL á Íslandi.  Þeir eru settir í annað. Þetta eru ævintýri vinstribáknsins og einhvers nasíónalrómantísks erfðagóss þess fólks sem á að vinna að þessum málum.

Peningarnir eru til, en þeir eru notaðir  til að borga ICESAVE skuldir glæpamanna svo íslenska skýjaverkefnaelítan komist í ESB. 175.000.000 kr. voru sendar á síðasta ári til Palestínu beint í vasa spillingarpólitíkusa!. Þá peninga hefði svo sannarlega verið hægt að nota í menningararfinn og t.d. til að greiða fyrir heimasíðu Minjastofnunar Íslands svo hún sé ekki á pókepólsku.

[FORNLEIFUR, 2.2.2013 kl. 05:54]

Gaman væri að fá haldbæra skýringu á þessu pólska menningarátaki Minjastofnunar. Eða þarf kannski að leita skýringa í Menntamálaráðuneytinu?