Faðirin at Trabant er deyður

Já, faðir Trabantsins er allur, ef trúa má færeyska netmiðlinum Portal. Werner Lang dó sl. mánudag á heimili sínu í Zwickau, 91 að aldri. Þessi tíðindi las ég þegar ég var að leita að fréttum um hvernig Krataprinsessan danska, Thorning Smith, ætlar að svíkja Færeyjar í makríldeilunni.

Þessi eðalalþýðuvagn var á tímabilinu 1957 til 1991 framleiddur í yfir 3 milljónum eintökum í Zwickau og slatti þeirra endaði ævi sína á Íslandi.

Ekki átti ég Trabant, en ók um tíma Wartburg skutbíl, kommísaraútgáfu með lituðum rúðum og sérlega góðu gerviefni í klæðningu og miklu af krómi. Móðir mér gaf mér loks þennan bíl sinn, vel notaðan. Hann þjónaði lengi vel sem bifreið fornleifarannsóknanna í Þjórsárdal og bar nafnið Brúnó, sem vísaði til litar bílsins, sem var karamellubrúnn.

Sonur minn var mjög veikur fyrir Trabant þegar við fórum nýverið á DDR-safnið í Berlín, en merkilegri þótti honum þó flokksgæðinga-Volvoinn sem þar var líka til sýnis. Nokkrum dögum síðar heyrði ég af umhverfisvænum ljósbláum Volvo Steingríms J. og sá þá að sænskt öryggi og velferð tryllir verkalýðsforingja og byltingarseggi meira en alþýðudrossíur.

Trabant er og verður hluti af sögu Íslands, þótt hér hafi Fornleifur farið hættulega nærri nútímanum.

Sonur minn setur sig í stellingar bílstjóra Honneckers

 

Steingrímur mætir hjá ÓRG á sænskum Palmeobile - Palmoline

Athugasemdir

[Aðalbjörn Leifsson (IP-tala skráð) 20.6.2013 kl. 08:28]

Benz og BMW voru líka frá Þýskalandi, eðalvagnar eins og Trabantinn og Wartburgerinn.

[FORNLEIFUR, 20.6.2013 kl. 08:46]

Þeir mega eiga það Þjóðverjar, að þeir kunna að búa til bíla, en mættu allir vera eins ódýrir og Trabantinn.

[Þorvaldur S (IP-tala skráð) 20.6.2013 kl. 10:20]

Bara af því þú vilt hafa það sem sannara reynist; volvóinn Steingríms er grænn.  Jamm.

Og með Geirharð:  Hann hljópst frá ábyrgðum og kvennafari til síns fyrra heimalands og er látinn fyrir nokkrum árum.  Er sá franski ekki tilvalinn að verða eftirrennari hans?

[Vilhjálmur Örn Vilhjálmsson, 20.6.2013 kl. 12:08]

Þú ert litblindur Þorvaldur. Bíllinn er ljósblár (kannski með dropa af rauðgrænu), grasið bak við Steingrím er grænt og hann sjálfur er orðinn harla grár eftir síðustu fjögur ár. Blaðakonan á myndinni er hins vegar íhald.

Mér er sagt að Depardieu hafi fengið að vita, að sama regla skuli ganga yfir alla og verður hann því ekki Geirharður í bráð, þó svo að hann kaupi heilan hval af Kristjáni Loftssyni.

[Þorvaldur S (IP-tala skráð) 20.6.2013 kl. 13:01]

Og ég sem stóðst litblinduprófið bæði hjá Flugmálastjórn og Siglingastofnun.  Þessar stofnanir verða greinilega að endurskoða hjá sér verkferlana!  Og svo hefi ég setið í þessum bíl og rætt litinn við eigandann og okkur kom saman um grænkuna.  Það kemur reyndar ekkert á óvart að sitthvað skolist til á þessum síðustu og verstu tímum.  Ég sé núna að blaðakonan er í sama lit og bíllinn og úr því hún er íhald hlýtur hann að vera blár líka.