Wir sind wieder da! Ómenningarleg dönsk jól 2015.

20151216_120959.jpg

"Danir eru Þjóðverjar sem tala skrítna þýsku" hefur maður svo sem heyrt Þjóðverja segja um Dani. Það þykir Dönum vitaskuld ekki gott að heyra nágranna sína segja, enda er þetta ekki alls endis satt.

Um það bil 85% Dana eru hins vegar eins konar Þjóðverjar á heljarþröm sem tala forna gerð þýsku og margir bera einnig þýsk ættarnöfn eins og Maack, Schram, Cortes og Bernhöft svo eitthvað vel þekkt sé nefnt. Vart er um að villast.

20151216_121040.jpg

Þetta er mjög greinilegt fyrir þessi jól í Kaupmannahöfn, sem líklega eru þau ómenningalegustu sem ég man eftir. Nú er aftur hafin þýsk innrás sem kemur upp um þýskt eðli og uppruna Dana, og hvað þeir eru auðhlýðnir undir þýskan herradóm og frekju.

Heilu Hollí-rassa-hía-hó þorpin hafa risið á þekktustu torgum Kaupmannahafnar, t.d. Kultorvet, Højbro-Plads og Kongens Nytorv. Íbúar þar eru allir frá Þýskalandi og híbýlin í þýskum stíl, og eru álíka kræsileg og blanda af heiðarkofanum frá Schwartzwald og þýskum útrýmingarbragga í Auschwitz. Kofarnir í Kaupmannahöfn eru allir með opna búð á einni hliðinni og þar selur fátækt fólk frá Austur-Evrópu alls kyns þýskt jólasukk og svínarí, og það þrisvar sinnum dýrara en í Þýskalandi.

Það hefur svo sem lengi verið vitað, að Danmörk liggur spennt innan þýska Polka-beltisins og þessi smekkleysa sniðugra sölumanna höfðar greinilega til margra Dana, sem þykir þetta bara "hyggeligt". Genin segja greinilega til sín.

20151216_130655b_1274488.jpg

En "Hver sin smag" eins" og Danir segja, og apa eftir Þjóðverjum. Og svo rennur Herr  Stockhausen í hlað beint undir verndara Kaupmannahafnar, Absalon biskup, sem getur ekki lengur öxi sína hreyft. Stockhausen kemur með birgðirnar í Þýskubúðir í Kaupmannahöfn og hlær síðan alla leiðina í bankann. Danir eru enn og aftur snuðaðir af frændum sínum í suðri. Þeir kaupa "jólagleðina" frá Stórevrópu á þreföldu því verði sem Þjóðverjar borga fyrir hana. Það er ekki bara Fräulein Merkel sem er mara á henni Evrópu um þessar mundir. En nú skil ég af hverju danska ríkisstjórnin vill hirða alla demantana af flóttafólki frá Sýrlandi. "Julen varer længe, koster mange penge", eins og gamall danskur jólasöngur upplýsir.


« Síðasta færsla | Næsta færsla »

Athugasemdir

1 Smámynd: Jónatan Karlsson

Fyrir rúmum þrjátíu árum síðan leit ég inn á veitingahúsið "Nyhavn 17" í Kaupmannahöfn og settist við borð hjá þremur eldri mönnum sem greinilega voru að halda upp á eitthvað.

Eg hef líkt og þú áhuga á hernáminu í Danmörku og kommst fljótlega að því að þessir fremur virðulegu herrar voru reyndar fyrrverandi meðlimir dönsku hersveitarinnar sem að áeggjan þings og kóngs börðust við hlið þýskra bræðra sinna gegn bolsévikum á austur vígstöðvunum.

Einn þessara manna var eitthvað skyldur Maríu Markan og spurði mig hvort ég þekkti hana og gat ég glatt hann með því að einungis fáum dögum fyrr hafði mér hlotnast sá heiður að sitja til borðs með henni, auk Stefáns Íslandi í jóla kaffisamsæti á dvalarheimilinu Droplaugarstöðum.

Danir og Þjóðverjar áttu annars í nánu og ágætu samstarfi alveg til örlagavetrarins 42-43, þegar stríðslukkan snerist til hins verra og voru því stríðshetjurnar úr "Frikorps Danmark" umsvifalaust sendir í harðneskjulegar stríðsfangabúðir í hernumdu Þýskalandi þegar þeir sem sluppu lifandi úr þeim hildarleik sneru heim.

Jónatan Karlsson, 20.12.2015 kl. 09:14

2 Smámynd: FORNLEIFUR

Jónatan,þú veður í villu. Frikorps Danmark meðlimir voru engar hetjur. Nú hef ég í tæpa þrjá mánuði setið og lesið dómana yfir þeim hér í Kaupmannahöfn. Þeir voru flestir litlir karlar, sama hvaða þjóðfélagsstétt þeir komu úr. Margir voru smákrimmar og nokkrir nauðgarar áður en þeir komust í hersveitina. Margir voru tækifærissinnar og enn fleiri stigu hreinlega ekki í vitið.Sömuleiðis kom það mér á óvart hve ragir þeir voru og veiklaðir líkamlega og stundum andlega.

Margir þeirra frömdu stríðsglæpi, t.d. í Bobruisk í Hvítarússlandi Veturinn 1942-43. Þrír slíkir eru enn á lífi.

Þú hefur lesið þér rangt til. Þeir SS-liðar sem dæmdir voru í Danmörku sátu flestir sína dóma í Danmörku og voru náðaðir löngu áður en þeir höfðu setið allan dóminn. Þeir sem framið höfðu alvarlegri glæpi og viðurkenndu það, og voru teknir af Bretum eða Bandaríkjamönnum, voru teknir af lífi manna SS-liða frekar en upplýsingum um að þeir sömu hefðu tekið þátt í að drepa gyðinga. Einn maður sem sjálfur sagði frá því að hann hefði tekið þátt í morðum á gyðingum í fangabúðum var ekki dæmdur fyrir það. Dönskum yfirvöldum var sama um gyðinga og mátu ekki eins líf t.d. gyðinga og líf Dana sem danskir SS-liðar myrtu. Dönsk yfirvöld vildu sem fæst vandamál hafa með þessa gallagripi, sem danskir Freikorpsmenn voru flestir. Það skilur maður á vissan hátt, en fæstir þeirra sem frömdu verstu glæpina fengu dóma sem við hæfi. Litlir karlar, sem lítið gerðu af sér, gátu hins vegar fengið lengri dóma en morðingjar, t.d. vegna þess að þeir stálu reiðhjóli. Einn íslenskur meðlimur Schalburg-sveitarinnar sem síðar eftir sinn dóm gerðist leigubílsstjóri í Reykjavík gat þakkað þjófnaði í ráðhúsi á Sjálandi hve lengi hann sat inni, en ekki óþokkahætti og siðblindu á öðrum sviðum.

Þakka þér fyrir upplýsingarnar um nasistana sem þú hittir í Nyhavn fyrir rúmum 30 árum. Kannski er mögulegt að finna hver þessi "ættingi" Maríu Markans var. Margir Freikorps Danmark meðlimir voru líka drykkjumenn fyrir og eftir stríð og margir þeirra frömdu glæpi í Nyhavn, dráp, uppljóstranir og annað. Einn sem þar framdi glæp, lagðist einnig á 12 ára stúlkubarn. Þetta voru öðlingar.

Margir Freikorps Danmark liðar voru síðar fluttir eða melduðu sig sjálfa í Division Wiking og frömdu glæpi þar.

Ef þér þykja þetta vera hetjur, er kannski eitthvað að. Láttu líta á það.

FORNLEIFUR, 20.12.2015 kl. 11:37

3 Smámynd: Jónatan Karlsson

Þessir þrír fyrrverandi vopnabræður virtust vera allt annað en drykkjumenn og reyndar fremur viðkunnalegir náungar. 

Þú veist það að fyrir 1943 voru svokallaðir andspyrnumenn kallaðir terroristar og ekki fyrr en á síðustu dögum stríðsins sem annar hver Dani þóttist hafa tekið þátt í andspyrnunni.

Annars eru stríð yfirfull af grimmd og ógeði á báða bóga, þó er sagt að sigurvegararnir skrifi söguna, en það ættir þú reyndar öðrum fremur að vita.

Eftir því sem ég kemst næst, þá kom þýska hernámsliðið t.a.m. fram af meiri kurteisi og aga gagnvart innfæddum Dönum, heldur en það breska og enn fremur það bandaríska gagnvart Íslendingum og sér í lagi kvenfólkinu. Þú ættir kannski að líta á það. 

Jónatan Karlsson, 20.12.2015 kl. 16:55

4 Smámynd: FORNLEIFUR

Þjóðverjar myrtu Dani í stríðinu og færðu þá í fanga- og útrýmingarbúðir. Svo samlíking þín við Breta og Bandaríkjamenn á Íslandi á engan rétt á sér. Mikill fjöldi kvenna í Danmörku var í ástandinu. Ófá börnin urðu til vegna sambands Þjóðverja við danskar konur. Lítill munur á því og "ástandinu" á Íslandi. Kurteisin sem þú talar um - það fór nú harla lítið fyrir henni. Það voru til "feltmadrasser" (dýnur) í Danmörku líkt og á Íslandi og sumir karlar misnota slíkar konur. Það getur ekki kallast kurteisi.

Grimmd síðari heimsstyrjaldar er einvörðungu hægt að skrifa á reikning nasismans og Þjóðverja, bandamanna þeirra og meðreiðarsveina. Annað er sögufölsun.

FORNLEIFUR, 20.12.2015 kl. 23:18

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband