Faðir Árna var gyðingur. Er það nú orðið eitthvað leyndarmál?

Í gær var fluttur áhugaverður þáttur á RÚV (hlustið hér). Ég hafði mikla ánægju af að hlusta á þáttinn. En eitt furðaði mig og fannst vanta í frásögnina.

Þegar þáttagerðamaðurinn, Viktoría Hermannsdóttir fór fyrst út með leit sína að syni Roderick Donald Balsams, skrifaði ég athugasemd á FB hennar og í Iceland Review (Sjá athugasemd mína þar). Athugasemd mín á FB Viktoríu í september er hins vegar horfin.

Athugasemd mín hjá Viktoríu var einvörðungu sú, að ég sendi henni dánartilkynningu varðandi Balsam , þar sem fram kemur að hann var gyðingur - sem í raun skiptir þó minnstu máli. Ég man að Viktoría "lækaði" sendinguna.

En af hverju hvarf þessi upplýsing sem ég setti á FB Regínu sem og við þessa frétt http://www.ruv.is/frett/halfbrodirinn-hugsanlega-fundinn, þar sem ég gerði líka athugasemd sem nú er farin en eftir stendur þetta:

Jú, þetta var vissulega góður þáttur samt sem áður, en stórfurðulegt að uppruni manns, ætt hans og störf hans séu algjörlega þöguð í hel í útvarpsþætti um leit að syni þessa manns.

Stórfurðulegt. Ég óska Árna Jóni Árnasyni, hinum týnda syni, alls hins besta með nýfundinni fjölskyldu sinni. Af hverju Viktoría fjarlægði athugasemdir þeirra sem hún leitaði aðstoðar hjá (þjóðinni) mun líklega verða leyndarmál Viktoríu.

Athugasemdir

[FORNLEIFUR, 27.12.2017 kl. 11:39]

 Á FB sinni hefur Viktoría nú skýrt hlutina og telur gagnstætt mér að uppruni Rods Balsams skipti ekki neinu. Ég er þó á því að hann geri það, og að þar sé m.a. komin skýring á einrænni náttúru hans, því í herjum Bandaríkjanna var gyðinghatur lengi vel viðloðandi.

Tek svo enn einu sinni fram að ég naut þáttarins og fyrri þátta Viktoríu um ástandsbörnin, en tel að uppruni Balsams hafi verið meginkjarninn til að skýra margt að því sem fram kom í þættinum.