Baltageymslan á Horni

Það leiðinlegasta og ömurlegasta sem til er, eru Víkingakvikmyndir. Þær gefa nær alltaf ranga og ógeðfellda mynd af "víkingum", nema þetta skot Monty Pythons.

Sumt fólk dáist að ribböldum og morðingjum og vilja að þeir fái uppreist æru nokkrum árum eftir að þeir fremja morð og annan skunda. Áhuginn á Barbara-víkingum eins og þeir eru sýndir í þessum soðmyndum, sem flestar eru nú framleiddar í hinum menningarsnauðu Bna, á skylt við áhugann sem sumar konur sýna fjöldamorðingjum sem þær vilja ólmast giftast. Kafbátaperrinn í Danmörku var ekki fyrr kominn undir lás og slá en að fangavörður í fangelsinu vildi búa með honum. Víkingamyndir eru sem sagt viðfangsefni fyrir sálfræðinga. Ef maður hefur áhuga á þeim, er best að panta sér tíma sem fyrst hjá hnetubrjótnum.

Myndir eftir Kormák eru heldur ekki nein upplifun. Víkingakvikmyndir eru flestar subbulegar og þeim fylgir sóðaskapur. Hrafn inn limaskorni skildi einnig eftir rusl í Drangshlíð þar sem forfeður mínir bjuggu á 18. öld, fyrir löngu þegar nafni hans fór á flug undir klettunum. Maður hafði þó lúmskt gaman af Krummamyndunum. Danska myndin Rauða skikkjan, sem að hluta til var tekin upp á Íslandi, var einnig óborganleg fyrir þá sem stúdera vildu rennilása á leikbúningum og víkinga með úr.

Á Íslandi bjuggu reyndar aldrei neinir víkingar að ráði, hvorki með eða án "þrælageymslu". Kvikmyndaheimurinn er búinn að búa til einhvern bjórdrukkinn, síðnauðgandi sadista með húðflúr, tíkarspennur eða fléttur í skegginu - sem höfðar til  nútímafólks, sem er ekki lengur með það á hreinu hvort það sé karl eða kona. Það er kallað gender-óöryggi.

Vonandi verður hægt að rústa þessu setti sem fyrst og að landeigandi fái ríflegar bætur fyrir misnotkun á velvilja hans. Ef ekki, er ljóst að þetta hrynur allt, og þá þarf að láta fornleifafræðinga grafa það upp - sem er fokdýr andskoti og setur fljótt skitin kvikmyndafyrirtæki í Hollywood og Sánkti Barbara á hausinn, ef þau eru þá ekki þegar farin á hausinn.

Nú verður El Balto að standa sig. It´s clean-up-time - Es hora de limpiar la mierda.

Annars lendir Kormack í þrælageymslunni úti á Horni fyrir verstu landspjöll sem unnin hafa verið síðan að víkingar komu til Íslands árið 801 og byggðu sér svo kallaða Stöð, til að geta flutt ósaltaðan og ófreðin fisk, (þ.e. er skreið), til landa sem fluttu út skreið. Svo iðkuðu þeir afbrigðilegt kynlíf með 79 stellingunni á Stöðinni. Ágæt kvikmynd var reyndar búin til um það á síðustu öld, og lék Pétur Gautur aðalhlutverkið.


mbl.is Víkingaþorpið staðið autt í níu ár
Tilkynna um óviðeigandi tengingu við frétt

« Síðasta færsla | Næsta færsla »

Athugasemdir

1 Smámynd: Valdimar Samúelsson

Einhver spurði endurfyrir löngu. 

Nú er ég algerlega gáttaður. Hvar er þessi kirkja eiginlega? Það er nú ekki langt síðan ég kom í Þjórsárdal en enga kirkju sá ég.

Baldur Hermannsson, 24.5.2009 kl. 11:37

 

Ég hef farið nokkuð mörg skipti á þennan stað en aldrei séð ummerki eftir kirkju. Fjósið er á sínum stað Getur þú frætt mig .?

Valdimar Samúelsson, 13.9.2018 kl. 14:12

2 Smámynd: FORNLEIFUR

Valdimar (og Baldur) Hún er vitaskuld neðanjarðar og er ekki til sýnis líkt og skálinn. Yfirborðið í dag er ekki það sama og  fyrir ca. 1000 árum síðan. Þannig er það oftast. En þessi færsla fjallar sem þú setur athugasemdina við er ekki um kirkjuna heldur sóðaskap kvikindagerðafólks. Góða helgi.

FORNLEIFUR, 14.9.2018 kl. 08:48

3 Smámynd: Valdimar Samúelsson

Þakka Vilhjálmur. Ég er búinn að finna staðsetninguna og er alveg viss um að lesendur hér setji ekki út á þessa spurningu mína. Sem er var aldrei grafið niður að kirkjunni. Hvar finn ég pappíra yfir það.  

Valdimar Samúelsson, 14.9.2018 kl. 09:32

4 Smámynd: FORNLEIFUR

Ég og mínir grafarar fundum kirkjuna. Árið 1939 var aftur á móti grafið niður að byggingunni með hálfgerðum skotgrafarskurðum og álitið að þarna væri "útihús". Kirkjan var grafin upp að mestu 1986, 1992 og ´93; Nærri tómar grafir fyrir framan hana voru rannsakaðar. Undir kirkjunni var eldri smiðja en sú sem er sýnilega. Einnig kom í ljós við rannsóknirnar að eldri bygging, skáli, lá undir smiðjunni.

Hér á síðunni neðst til vinstri, er ýmislegt efni um Stöng, þar sem þú getur fengið upplýsingar. Þessi grein á íslensku, sem birtist í Lesbók er fróðleg: https://fornleifur.blog.is/blog/fornleifur/entry/1243380/

Einnig er skýrsla (sjá hér) sem er full af fróðleik og lista yfir það sem ritað hefur verið um rannsóknir á Stöng á 9. og 10 áratug síðustu aldar. Taka ber fram að þetta voru litlar rannsóknir framkvæmdar fyrir hlægilega lítið fé miðað við það sem sett er í fornleifarannsóknir í dag.

Fornleifur mun á næstu mánuðum birta fáeinar greinar með efni um Stöng og rannsóknir þar.

Ef þú leitar á þessu bloggi (sjá neðarlega á hægri dálki), getur þú leitað að því sem ritað hefur verið um Stöng á Fornleifi. En leitarkerfið á Moggablogginu er því miður meingallað.

FORNLEIFUR, 15.9.2018 kl. 07:08

5 Smámynd: Vilhjálmur Örn Vilhjálmsson

Að lokum, Valdimar McStewart, athugasemd Baldurs Hermannssonar sem þú vitnar í var við grein á öðru bloggi mínu og hann gat greinilega ekki fundið furðulega endurgerð kirkjunnar sem menn hafa reist við Þjóðveldisbæinn. En hann er nærri Búrfellsvirkjun rétt hjá Skeljastöðum hinum fornum sem ekki sjást lengur. Líklega hefur Baldur talið að kirkjan væri kamar. Það var einmitt skrýtin þefur þar síðast er ég koma þar hjá.

Vilhjálmur Örn Vilhjálmsson, 15.9.2018 kl. 09:04

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband