Hvað er í deiglunni ?

Vaðlaheiðargöng er greinilega til annars nýt en að flýta fyrir ferðum manna inn í óörugga framtíð. 

Greint var frá því á RÚV í fyrir nokkrum dögum, að fornleifafræðingar væru í óða önn að finna mikinn járnframleiðslustað frá miðöldum, þar sem Vaðlaheiðargöngin eiga að byrja að austanverðu.

Þetta er stórmerkur fundur og ljótt til þess að vita að þarna vinni fornleifafræðingar í kappi við klukkuna, fyrir skít á priki, til að rumpa af rannsóknarvinnu við það sem virðist einn heillegasti járnframleiðslustaður sem fundist hefur á Íslandi, og jafnvel smiðjustarfsemi líka. Greinilegt er af frétt Sjónvarps, að fornleifafræðingurinn heldur á deiglu. Kannski var þarna járnblástur og smiðja í tengslum við hann. Í fljótu bragði sýnist mér allt benda til þess að þarna sé verið að grafa upp stóra smiðju og það sem henni tengdist.

Fornleifur skorar á framkvæmdavaldið að gera þessari rannsókn hátt undir höfði og veita ríflegt fé í hana, svo heimildir fari ekki forgörðum. Þarna verður að ljúka rannsóknum að fullu.

Þarna við gangnamunnann bætist vonandi við vitneskja, t.d. við þá merku rannsókn á stórtækum rauðblæstri sem dr. Ragnar Eðvarðsson stýrði fyrir nokkrum árum síðan á Hrísheimum í Mývatnsheiði. Þar fundust einnig miklar leifar eftir járnvinnslu frá 10. og 11. öld. Sjá hér.

Athugasemdir

[Þorvaldur S (IP-tala skráð) 21.6.2012 kl. 23:46]

Hvar er efri myndin tekin?  Ég spyr vegna þess að væri hún frá svæðinu við vestari gangamunnann hlýtur hún að vera tekin til norðurs.  Ætti þá ekki að sjá til sjávar? Eitt megineinkenni Eyjafjarðar er að hann er fjörður.  Og því finnst mér vanta sjóinn á þessa mynd.

[FORNLEIFUR, 23.6.2012 kl. 20:40]

Myndin er kroppuð af RúV og ég held að ég hafi farið áttavillt. Auðvitað er þetta við eystri endann á göngum framtíðarinnar. Þakka þér fyrir þetta, Þorvaldur S.