Fyrsta skóflustungan

Þessa mynd af fyrstu skóflustungunni fyrir byggingu Kópavogskirkju árið 1958 fann ég nýlega á netflakki. Myndin er svo falleg að hún verður að teljast til fornminja. Mér sýnist að hún sé tekin í kvöldbirtu. Kórinn er samsettur af fallegu fólki í sínu fínasta pússi og maður heyrir hann næstum því syngja angurvært og ein konan syngur aðeins falskt. Myndina sér maður í lit þó hún sé svarthvít. Presturinn er virðulegur og stórglæsilegur þar sem hann heldur fyrirmannlega á gleraugunum og horfir íbygginn inn í framtíðina, sem varð líklega allt önnur en hann hafði hugsað sér hana.

Aldrei hef ég inn í Kópavogskirkju stigið. Mér þótti þetta musteri svo fallegt þegar ég var barn, og fallegast áður en það var málað. Síðar hef ég komið nær því og orðið fyrir vonbrigðum. Mér sýnist að kórinn og presturinn standi þarna á einhverri rúst, sem horfið hefur þegar kirkjan var byggð. Það voru örlög rústa á þessum tíma. Takið eftir landmælingastikunni til vinstri á myndinni. Hún er nærri því eins virðuleg og síra Gunnar.

Heimild: Ljósmynd Vikunnar/Ljósmyndasafn Reykjavíkur

Athugasemdir

[Ásthildur Cesil Þórðardóttir, 11.3.2014 kl. 13:13]

Sammála flott mynd, svo er hún líka svo skýr.

[FORNLEIFUR, 11.3.2014 kl. 14:16]

Myndin minnir mig á hollensk gullaldarmálverk, þótt bakgrunnurinn sé dagsljós, holt og hæðir og nokkrir strákar og hús.

[Ásthildur Cesil Þórðardóttir, 11.3.2014 kl. 15:00]

Já það er eitthvað við þessa mynd sem heillar.

[Helga Kristjánsdóttir, 11.3.2014 kl. 22:30]

Kom að heimsækja þig ná í hvíld frá pólitísku ati.Birtirðu þá ekki kirkjuna mína þar sem flest börnin mín eru fermd og ehv. skírð og gift. Þarna rétt fyrir neðan kirkjuna bjuggum við fjölskylda mín og börnin fóru í berjamó upp að kirkju. Ég var svo heppin að fá málverk af henni frá Eggert Laxdal,málað á krossvið,sem hann fékk á innréttinga verksstæði bónda míns og félaga hans. Séra Gunnar var mér ókunnur,sótti ekki kirkju þá,en bræður hans þeim mun frekar,lækninn Auðólf og bankastjórann Stefán.---Einhvern 1.april var gabbað ( í RÚV.að minnir) um að McDónalds,hefði höfðað mál vegna teikningar kirkjunnar sem væri eftirlíking hamborgarastaðarins fræga. En það var græskulaust gamanmál.Kirkjan er mér kær,presturinn sr Árni Pálsson,sá eini sem ekki falaðist eftir atkvæði okkar í komandi prestskosningum,þegar hann sóttist eftir brauðinu,ekki viljandi,en við eigum skemmtilega sögu um það. Hann er svo hress kallinn,og enn hitti ég hann á förnum vegi með konu sinni. Ræðum þá um Breiðablik,en ekkert um pólitík,skiljanlega. Þetta hristist bara fram úr “pennanum” mér varð bara orðmargt!!!! Bið forláts það var svo gaman að sjá þessa mynd,og hluta kórsins sem ég kannaðist við. Mb. Kv.

[FORNLEIFUR, 12.3.2014 kl. 07:50]

Þakka þér fyrir þessar góðu viðbótarupplýsingar, sem er gott að fá fyrir mann sem vart hefur komið í Kópavog. Ég var nefnilega hálfstálpaður áður en ég kom þar að ráði, fyrir utan Kópavogsbíó. En þangað fóru afi og amma með mig í bíó til að sjá danskar grínmyndir með Dirk Passer áður en ég gat lesið mér til gangs eða hvað þá skilið dönsku - og er þar líklega komin ástæðan fyrir því að ég flutti til Danmerkur.  Séra Árna, hvers sonur telur að himnaríki sé þar sem ég bý (og það þarf ekki að vera Sr. Árna að kenna), þekki ég líka af útliti. Ég sá stundum, eftir að ég "fullorðnaðist", hann og konu hans á flugvellinum, en Rósa kenndi mér einn vetur í barnaskóla. Hún var frábær kennari.

[FORNLEIFUR, 12.3.2014 kl. 08:00]

Er Auðólfur læknir (og mikill vinur öfgamanna á Gaza) ekki Gunnarsson, og því sonur séra Gunnars?

[Helga Kristjánsdóttir, 17.3.2014 kl. 01:02]

Jú,sæll vertu Fornleifur góður, ég ætlaði að koma hér fyrr,hann Auðólfur er Gunnarsson og einnig Stefán,sem var Alþýðubankastjóri. Það er svo langt síðan að ég hef rifjað þetta upp,hugðist spyrja þá sem þekktu þá betur,en hef ekki hitt þá.Mb.Kveðju.