Mótmæli fyrr og síðar

Bandaríski herinn er löngu farinn og þeir sem hötuðu BNA og NATO hafa heils hugar snúið hatri sín að Ísrael í hjáverkum við stuðning sinn við skátasamtökin Hamas á Gaza sem halda heilli þjóð í gíslingu trúarofstopa og ofbeldishyggju.

En heimurinn hefur breyst. Þó ekki meira en svo, að sum mótmælaskiltin sem notuð voru þegar BNA og NATO voru fjandinn væri enn hægt að nota í dag, væru þau enn til. En líklega væri ekki sama fólkið sem bæri þessi skilti í dag og sem gerði það þá, með nokkrum undantekningum þó. 

Skemmtilegt þykir mér að skoða gamlar ljósmyndir frá íslenskum mótmælum gegn  "heimsvaldastefnu NATO". Í Þjóðminjasafni er varðveitt töluvert safn ljósmynda Vilborgar Harðardóttur, sem börn hennar (þ.m.t. Mörður Árnason) gáfu safninu að henni látinni. Þótt skiltin og borðarnir hafi verið brennd á báli gleymskunnar, eru prýðisgóðar ljósmyndir Vilborgar heitinnar ágætur vitnisburður um þann tíma sem hún ljósmyndaði. Þar á meðal eru áhugaverðar myndir frá mótmælum vinstrimanna og herstöðvarandstæðinga á NATO-fundi í Reykjavík 24.6. 1968.

Eins og sjá má efst, var Grikkland mönnum hugleikið á þeim árum, þegar landið var í hers höndum. Fánanum væri einhver tilbúinn að veifa í dag í vanda Grikklands undir ESB-fasismanum. Meðal fyrrverandi sósíalista sem nú dýrka margir hverjir ESB væri þó líklega erfitt að finna marga sem telja prýði af þessum fána í ESB-glansklisjunni sem fests hefur á nethimnu þeirra. 

Fólk, sem til var í að færa ESB Ísland á silfurfati sem eins konar tryggingu í Icesave málinu, á víst mjög erfitt með að sýna Grikklandi stuðning í dag. Hefur þetta fólk svikið málstaðinn? Ja, sumt að því var reyndar ekki fætt, eða á bleyjualdrinum þegar þessi mynd var tekin. Hún sýnir göngumenn á leið til Hótel Sögu, þar sem NATO-fundurinn var haldinn.

Ísland fyrir Íslendinga. Þarna þekkjast ýmsir, m.a. Gísli Gunnarsson og Auðun H. Einarsson smíðakennari (sjá hér). Með þekkingu mína á þeim heiðursmönnum tel ég víst að þeir hafa meint annað með því en fólk gerir í dag enda Gísli kominn af fólki sem aðstoðaði gyðinga í nauð.

Skoðið skiltin: "ÍSLAND fyrir ÍSLENDINGA". Ekki þætti slíkt slagorð kórrétt í dag meðal þeirra sem mótmæltu NATO í júní 1968. Í dag myndu kannski framsóknarmenn bera slík skilti.  Maður getur líklega leyft sér að spyrja. Er tvískinnungur að leysa vinstrisinnaða Íslendinga upp? Mér sýnist það.

Gísli Gunnarsson prófessor emeritus, er einn helsti og heitasti stuðningsmaður byltingar Palestínumanna gegn Ísrael, þjóðríki gyðinga, og notar hann mestan tíma sinn nú orðið til að deila við og fræða menn um skoðanir sínar á því á fasbók sinni.  Gísli hafði sig mikið í frammi í mótmælunum gegn "Heimsvaldastefnu Bandaríkjanna", sem færðust frá Hótel Sögu til Háskóla Íslands, þar sem lögreglulið borgarinnar lét til skarar skríða gegn mótmælendum. Löggurnar tóku "þennan lýð" ekki neinum vettlingatökum eins og sjá má og, aumingja Gísli var færður í fangarútu með kverkartaki.

Komdu hérna væni. Gísli Gunnarsson sagnfræðingur og byltingarsinni fær að kenna á hrottaskap laganna varða.

Sjáið svo þessa mynd. Hún er frá mótmælum gegn NATO og tveimur skipum herafla bandalagsins í Sundahöfn árið 1979. Þar var fólk líka tekið með kverkartaki af sömu löggunum og höfðu sig frammi árið 1968,og fært í rútu löggunnar.

Fornleifur gamli telur sig þekkja vandræðagemlinginn á myndinni hér til hliðar, sem gerði sig líklegan til að kasta grjóti í herafla Atlantshafsbandalagsins tveimur mánuðum fyrir stúdentspróf sitt árið 1979. Útsendari CIA hjá Mogganum tók mynd af honum við söfnun steinanna. Þessi frumstæði ungi maður, sem var þó svo útsjónasamur að sleppa við að fara í rútuferð með löggunni, tilheyrði auðvitað rumpulýðnum í MH, þar sem hann eyddi tíma sínum þegar hann var ekki að plotta byltingar. Í Sundahöfn bar hann plastpoka með latínuglósum úr ræðum Ciceros í einni hendi og stein í hinni. Hann var upp frá þessum degi kallaður "Borgarskæruliðinn" (sjá frekar hér)

Menn telja að hann geymi enn vopn í skápum eða uppi á háalofti og sé brennuvargur í skrautgarði broddborgaranna. Menn spáðu því á sínum tíma, að hann gerðist meðlimur í Brigade Rossa. En sjá, allt tekur enda. Þessi hrokkinhærði æringi er nú hinn argasti stuðningsmaður Ísraelsríkis (sem hann var reyndar líka árið 1979 og fyrr) og skilur ekki þá sem kasta steinum gegn ofurafli en um leið styður hann vitaskuld ekki uppruna síns vegna hina skítlega möntru þjóðernissinna og sósíalista :"Ísland fyrir Íslendinga".  Hann telur að öll mótmæli séu holl. Þeir sem völdin hafa, hvar sem það er í þjóðfélaginu, verðskulda þau ekki alltaf. Ef ekki er hægt að bylta þeim, er þeim dauðilla við að það sé minnst á skítlegar aðferðir þeirra til að ná völdum eða komast í stöður. Slíkt verður að skrá og birta og leita réttar síns, en ekki bara berja á potta og pönnur, gaula og garga eins og menn tóku upp þegar brann við í bönkunum.

Fornleifur hefur ekkert á móti skoðunum þessa unga, villta manns, bara ef hann blandar sér ekki í fornleifamálin. Þar er nógu mörgum steinum safnað og kastað fyrir, svo ekki sé talað um tvískinnunginn, valdabaráttuna og keppnina um að komast í sjónvarpsfréttirnar með eins fjarstæðukenndar yfirlýsingar og mögulegt er.

Bendi ég áhugamönnum um fornleifafræði, byltingu og steina að bíða spennta eftir næstu færslu, sem fjallar um steina og fornleifafræði og verður greinin vitaskuld steinhörð og byltingarkennd ádeila.

Að lokum birti ég hér mynd af skælbrosandi andbyltingarmanni (lengst til hægri), sem mótmælti gegn þeim sem mótmæltu NATO árið 1968. Vilborg náði einnig mynd af honum. Þessi grallaralegi maður hefur svo um munar reynst vera áhugamaður um steina eins og fyrrnefndur menntskælingur í Sundahöfn, og tekið þátt í að búa til nýlegar fornleifar eins og frægt er orðið. Svo við ljúkum Alfa í sömu fánalitunum og Omega, þá er hann næstum því eins grískur og fáninn á efstu mynd. Kanelás hét hann, en kallar sig dags daglega Johnsen. Það vekur hins vegar meiri athygli mína, að mótmælin gegn NATO eru kölluð mótmæli í skrá Þjóðminjasafns sem birtist á Sarpi, en mótmæli Heimdellinga gegn mótmælum NATO deginum áður eru kölluð óeirðir og ólæti. Svona er nú margt skrítið í sarpinum.

Við lifum í pólitískum heimi

Athugasemdir

[Jóhann Elíasson, 13.7.2015 kl. 09:46]

Góður og þarfur pistill.  Hann sýnir hversu stöðnuð og í rauninni afturhaldssöm "vinstri hjörðin" er........

[Ragnhildur Kolka, 13.7.2015 kl. 13:25]

Góður pistill. Haltu uppgreftrinum áfram.

[FORNLEIFUR, 13.7.2015 kl. 15:00]

Ég reyndi nú að vera sanngjarn í þessu bloggi gangvart báðum hópum til vinstri sem hægri. Ég hef ekki neitt á móti mótmælum, að því einu undanskyldu að menn viti hverju þeir mótmæla. Mótmæli á Íslandi eru oft lýðskrumssamkomur. Ég til t.d. mótmæli Gísla árið 1968 eðlileg í ljós tíðarandans.

Þrátt fyrir tilraun mína til að vera örlítið írónískur, sem mér finnst gefa lífinu lit, er komin múslímakona íslensk að Vestan á FB Gísla Gunnarssonar sem skrifar:

Allhamdulillah Gísli Gunnarsson þú ert svo sannarlega virðingarverður maður, lol tel að vilhjálmur hafi skotið sig í fótinn með þessari aumkunarverðu tilraun til að gera lítið úr Gísla

 

Án þess að skilja arabísku og framandi mál eins og Allhamdulillah og lol svaraði ég blessaðri konunni byrstur eins og Imam sem ekki hlustar á kveifarlegar ásakanir og væl:

 

Ólæsi meðal múslímskra kvenna er því miður mikið enda kvenréttindi meðal múslíma ekki í hávegum höfð. Hefur þetta ólæsi nú náð til Íslands. Lærðu að lesa þér til gangs, Agnes, því þú hefur alls ekki skilið það sem ég skrifa. Þar sem, þú ert Íslendingur skil ég vel, Agnes, að þú skiljir ekki íróníu. Íslendingar eiga erfitt með hana vegna sjálfhátíðleika og rembu. En sá skilningu batnar ekki með því að gerast heitttrúaður múslími upp úr þurru. Megi Guð þinn vera með þér.

 

Ég vildi ekki fræða Agnesi um að Allhamdulillah
eru þakkarorð kristinnga araba og gyðinga í arabaheiminum, sem múslímar hafa aldrei skilið en nota í þýðingunni Guði sé þökk. Íslenski múslíminn Agnes kann greinilega ekki arabísku heldur.

 

[Sæmundur G. Halldórsson , 13.7.2015 kl. 23:05]

Pueri sunt pueri. Afskaplega sympatísk færsla.

[FORNLEIFUR, 14.7.2015 kl. 06:10]

Einhverju reiddust Guðirnir þó: því í nótt þegar Gísli Gunnarsson er virkur á FB sinni birti hann þessa yfirlýsingu:

Vinur okkar allra, og orðhákur allra tíma, Vilhjálmur Örn Vilhjálmsson, skrifaði sérdeilis svívirðileg ummæli um fasbókarvin minn og vin Palestínu, Agnesi Ósk. Einhver innan fasbókar okkur öllum þremur voldugri, tók ummæli Vilhjálms um Agnesi burt en tók ummæli hennar líka burt og það sem meira er, tók allt innleggið með þessum sóðalegu ummælum Vilhjálms á tímalínu minni ,burt, ásamt athugasemdum fjölda manns af öllum gerðum, almennt meinlaust efni. Þetta er kostnaðurinn, Vilhjálmur minn, við að þola þig svona vel. En það mun ég gera áfram en bið Vilhjálm fyrir alla muni að vanda betur orðalag sitt í framtíðinni.

Það sem menn sjá ekki orðalag mitt eftir að Gísli hefur fjarlægt orð mín, þá svaraði ég honum þegar ég var vaknaður til dáða og skoðaði FB hans:

Það var ekkert "sóðalegt" við athugasemd mín við Agnesi Ósk. Ég leyfði mér aðeins að kynna þetta blogg mitt http://fornleifur.blog.is/blog/fornleifur/entry/1853768/ um mótmæli fyrri tíma og meðal annars mótmæli, þar sem Gísli var handtekinn á hrottalegan hátt og birti ég mynd af því. Ég skrifaði líka um mótmæli 11 árum síðar, þar sem ég gerði það sama og ungir Palestínumenn gera í dag. Mér sýnist á öllu að Agnes Ósk hafi ekki skilið blogg mitt, líkt og hún skilur ekki arabískar kveðjur sem hún kastar á Gísla, og þú fjarlægir orð hennar hennar og mín, í stað þess að ræða hlutina, og kallar mig orðhák, vegna þess að ég gagnrýni. Athugasemdir Agnesar er hægt að lesa á í athugasemdum við blogg mitt.

Hver það er sem er voldugri Gísla á FB hans ætla ég ekki að ræða. Það hlýtur að hafa verið framliðinn ritskoðandi á Neues Deutschland eða Pravda.

[Agnes (IP-tala skráð) 14.7.2015 kl. 10:36]

Hahaha Vilhjálmur ég tala ekki reiprennandi arabísku það er rétt hjá þér en ég skil nóg til að vita að Allhamdulillah þýðir Guði sé lof, Praise  be to Allah, ég fer með þessa línu 17 sinnum á dag í mínum daglegu bænum, við múslimar notum þetta orð mikið, til að lýsa ánægju okkar með eitthvað eða til að svara kveðjum, ef við erum spurð hvernig hefuru það svörum við Allhamdulillah. Restin er ekki svarverð, góðar stundir Vilhjálmur, Guð blessi þig.

[FORNLEIFUR, 14.7.2015 kl. 11:35]

Agnes, þessi runa sem múslímar nota er mállíska úr arabísku með hebreskum rótum og þýðir upphaflega "Þökk sé guði". Það má m.a. lesa um hana á Wikipedia: https://en.wikipedia.org/wiki/Alhamdulillah.

Guði sé lof, Gu´skelov, Gott sei Dank, Gratia Dei. Allir trúaðir nota þetta, kannski ekki 17. sinnum á dag, en það er þitt val og kemur engum við. 

Í boðorðum gyðinga og kristinna segir: Þú skalt ekki nefna nafn Drottins Guðs við hégóma, [því að Drottinn mun ekki láta þeim óhengt, sem leggur nafn hans við hégóma].

Ég hef hins vegar séð múslíma syngja Allhamdulillah þegar þeir heyrðu af árásum á Tvíburaturnana í New York og við aðrar óskiljanlegar aðgerðir. Það þykir mér miður.

[FORNLEIFUR, 14.7.2015 kl. 11:45]

 Það var því ekkert sóðalegt í svari mínu til þin Agnes,líkt og Gísli hélt fram sl. nótt á FB sinni. Gísli þurfti að eins að fá "hálfbilleg" rök fyrir ritskoðun sinni. Ef hann fjarlægði svar mitt til þín (sem hann segir reyndar einhvern FB-Guð hafa gert), þá þurfti hann vitaskuld líka að fjarlægja það sem þú skrifaðir. Ég tek ekki FBókina eins alvarlega og Gísli. En við berum virðingu fyrir hvorum öðrum og mismunandi skoðunum hvors annars. Gísli hefur sinn skilning á málstað Palestínumanna og ég hef annan. Þannig er það. Engu verður breytt um það úr þessu.