Út skulu þeir...

Margumtöluð kynþáttahyggja/útlendingahræðsla Framsóknar-flokksins á sér dálitla sögu, þótt hún sé líkast til ekki samhangandi:

Í nóvember 1938 skrifaði ríkisstjórn Hermanns Jónassonar til sendifulltrúa Íslands í Kaupmannahöfn, Sveins Björnssonar, og ítrekaði fyrri yfirlýsingar sínar: "Ríkisstjórnin principielt mótfallin að veita þýzkum Gyðingum dvalarleyfi Íslandi."

Hermann Jónasson hafði áður, í nóvember 1937, skýrt þetta út fyrir sendifulltrúa í sendiráði Dana í Reykjavík, C.A.C. Brun: "Island har altid før været et rent og nordisk Land, frit for Jøder, og de der er kommet ind de sidste Aar skal ud igen". Þessi ljósmynd var tekin í sendiráðinu við Hverfisgötu sama kvöldið og Hermann Jónasson (Framsókn) lýsti þessu yfir.

Lesið meira í bók minni Medaljens Bagside. Á vefsíðu forlagsins Vandkunsten er pdf-skrá með kaflanum sem segir frá afrekum Hermanns Jónassonar

Athugasemdir

[Ómar Ragnarsson, 6.2.2015 kl. 00:16]

Í framhaldi af þessu fengu 30 norskir skógarhöggsmenn að flytjast til Íslands, svona rétt eins og mikill skortur væri á slíkum hér á landi. 

Á sama tíma þurfti Ísland víst ekki á vel menntuðum mönnum af óæðri kynþáttum að halda. 

Þess má geta að þetta rímaði algerlega við stefnu íslenskra Þjóðernissinna, sem vildu halda íslensku þjóðinni "hreinni" og töldu að ekki ætti að leyfa innflutning af öðrum kynþáttum en norrænum nema í algerum undantekningartilfellum þegar um væri að ræða menn með algerlega ómissandi sérþekkingu.

1939 neitaði íslenska ríkisstjórnin hinn bóginn beiðni þýskra yfirvalda um aðstöðu hér á landi fyrir fyrirhugað flug þýskra flugvéla yfir Atlantshaf, en Þjóðverjar áttu þá bæði langfleygustu landflugvélar og sjóflugvélar heims.

Þóttu Íslendingar bíræfnir að standa uppi í hárinu á Þjóðverjum, en Hermann og stjórn hans vissu, að 1939 var kreppan dýpst hér á landi og landið við dyr gjaldþrots, - sagt að Hambrosbanki ætti það í raun. 

Og mótvægi fólst í því að Agnar-Koefoed Hansen stundaði könnunarflug á þýskri flugvél til að finna heppileg flugvallarstæði og fór vorið 1939 til Þýskalands til að mennta sig hjá SS-sveitunum í Þýskalandi til embættis lögreglustjóra í Reykjavík. 

Íslendingar stigu vandasaman jafnvægisdans síðasta árið fyrir hernám Breta og þá varð að gera fleira en gott þótti. 

[FORNLEIFUR, 6.2.2015 kl. 10:00]

Ómar Ragnarsson, Íslendingar fylgdu óskum Dana varðandi flugleyfið. Utanríkismál voru í höndum Dana. Ef íslenskir sagnfræðingar hefðu legið í dönskum skjalasöfnum, hefðu þeir vitað það.

Hambro-banki átti ekki Ísland. Enn ein mýtan.