Síðustu hreindýrin á Suðvesturlandi

Man einhver lesenda Fornleifs eftir því að hafa heyrt ættingja sína segja frá hreindýrum þeim sem kúrðu á Hengilssvæðinu fram til 1930? Kannski vill svo vel til að
einhver eigi í fórum sínum ljósmyndir af síðustu dýrunum, eða t.d. málverk.

Síðast hreindýrið Suðvestanlands var fangað skömmu fyrir 1930 á Bolavöllum sunnan við Húsmúlarétt, nærri Kolviðarhól.

Myndin, steinprentið, hér af ofan af hreindýrum sem urðu á leið leiðangursmanna Gaimards milli Reykjavíkur og Þingvalla er að finna í stór verki Paul Gaimards um Ísland frá 1838. Ég man ekki eftir því að nokkur hafi notað þessa mynd í bækur eða greinar um íslensk hreindýr. En þarna eru þau nú blessuð, svört á hvítu.

Hvar eru hreindýrin nákvæmlega stödd á myndinni í verki Gaimards? Kannast einhver við kennileiti á steinprenti Jolys og Bayots eftir teikningu meistara Auguste Mayers?

Athugasemdir

[FORNLEIFUR, 1.5.2018 kl. 08:16]

Hvað segja menn við Marardal? Hér leyfi ég ykkur að sjá tillögur sem hafa borist á FB Vilhjálms ritstjóra: Sjá hér https://www.facebook.com/vilhjalmurorn.vilhjalmsson/posts/1228458977288274?comment_id=1228892757244896&notif_id=1525162067899605&notif_t=feed_comment&ref=notif

Og gleðilega hátíð

[Sigurjón Páll Ísaksson (IP-tala skráð) 1.5.2018 kl. 12:27]

Sæll Vilhjálmur. Árið 1986 kom út bókin Íslandsmyndir Mayers 1836, í umsjón Ásgeirs S. Björnssonar. Á bls. 59 er þessi mynd með skýringu: "Hátt í hlíðum Hengils. Myndin hefur orðið til á barmi gljúfurs suðaustur af mynni Marardals nálægt upptökum Engidalskvíslar. Áin liðast fram um grundir, og í baksýn sér til Bláfjalla. Lengra til vinstri eru Vífilsfell, Sauðadalahnúkur og Blákollur. Hreindýr voru á Reykjanesskaga fram undir 1920, en sagnir eru um að einmitt á þessum slóðum hafi síðustu dýrunum verið eytt."

Bestu kveðjur, Sigurjón Páll Ísaksson

[Valdimar Samúelsson, 1.5.2018 kl. 21:02]

Einn félagi minn sagði í dag að faðir hans hefði tekið mynd/myndir af Hreindýri hér á suðurlandi.

Vinur minn hafði heyrt að bændur tóku þessum dýrum sem samkeppni á fjárbúskapinn og því útrýmt þeim.  

[Valdimar Samúelsson, 1.5.2018 kl. 21:04]

Botnsdalur.???

[FORNLEIFUR, 2.5.2018 kl. 12:28]

Sæll Sigurjón, það var eitt af þeim svæðum sem ég taldi til í umræðu á FB minni. Ég er ekki með útgáfuna frá 1986 í Danmörku, en á hana að vísu á Íslandi og gat því ekki athugað þetta. Þakka þér fyrir þessar upplýsingar, sem ég tel vitaskuld líklegastar, þar sem ég hafði einnig stungið upp á því. Sjá fésbókaumræðuna ofar við myndina af Marx í fyrstu athugasemd.

[FORNLEIFUR, 2.5.2018 kl. 12:34]

Sæll Valdimar. Stórmerkilegt er að heyra þessa frétt frá vini þínu. Heldurðu að hann eigi þessa mynd og geti miðlað henni hér á Leifi forna almenningi, grúskurum og fornaldarmönnum til gamans.

[Valdimar Samúelsson, 2.5.2018 kl. 15:13]

Ég skal athuga þetta.