Veni Vidi Vici

Alltaf finnst eitthvað skemmtilegt í jörðinni.

Vorið 2009 fannst forláta gullhringur vestan við Þingvallakirkju. Þetta kom í fréttum og sumarið 2009 var gripurinn kosinn gripur mánaðarins á vefsíðu Þjóðminjasafns Íslands. Þar, eins og í frétt Morgunblaðsins, var því haldið fram að þetta væri innsiglishringur og að á honum stæði F og I, og að þar væri jafnvel hægt að sjá kórónu og skjöld.

Ég var spurður um álit mitt á þessum grip. Ég var sammála því að hringurinn væri úr gulli og að steinninn væri blóðsteinn (heliotrop). Ég taldi af myndum að dæma, að gullkarat hans væri mjög lágt.

Ég er hins vegar ekki sammála sérfræðingi Seðlabankans um áletrun þá sem skorin er í stein hringsins. Sérfræðingurinn er oft fenginn til að tjá um sig um áletranir og myntir.

Í stein hringsins er skorið  A ω og I sem ekki þýðir neitt annað en Alfa, Omega Ω (með litlum staf) og Iesous, skrifað upp á grísku. Skammstöfun fyrir Jesús, Upphafið og Endinn.

Til að kóróna þetta, er það sem sérfræðingur Seðlabankans taldi vera kórónu, þrjú V, V V V, sem samkvæmt þessum fornleifafræðingi er skammstöfun fyrir Veni, Vidi, Vici. Þessi fleygu orð Cæsars hafa oft verið tengd Jesús, sem kom sá og sigraði.

Þjóðminjasafn Íslands sættir sig örugglega ekki við þessa túlkun, enda í engu greint frá henni á vefsíðu safnsins. Ekki óskað eftir störfum mínum og skoðunum framvegis árið 1996. Það gildir væntanlega fyrir niðurstöður mínar og álit líka.

Innsiglishringur, er gripur mánaðarins í júlí 2009 kannski ekki, og ekki hringur Jesús. En næsta líklegt tel ég að hann sé frá 18. eða 19. öld. og gæti jafnvel verið frímúrara- eða regluhringur.

Leyfi ég mér að minna á önnur innsigli sem ég hef skrifað um. Sjá t.d. hér.

Færsla þessi birtist áður hér þann 26.11.2009

ω

Athugasemdir

[FORNLEIFUR, 27.9.2011 kl. 06:25]

Þessa athugasemdir birtust árið 2009

1

Athyglisvert. Og sýnist mér kenning þín ganga upp í flestu.

En, hvað styður nákæmlega aldursgreininguna?

Guðmundur Brynjólfsson (IP-tala skráð) 26.11.2009 kl. 14:19

2

Langar aðeins að fá meira frá þér varðandi frímúraraflötinn.  Sjálfur er ég frímúrari og hefði áhuga á að vita meira um kenningu þína um að þetta sé frímúrarahringur.

Kveðja, Haraldur

Haraldur (IP-tala skráð) 26.11.2009 kl. 14:39

3

Guðmundur, á heimasíðu þinni segist þú vera 19. aldar maður. Þá ættir þú að þekkja hringi frá þeim tíma. Sem miðaldasérfræðingur, man ég ekki eftir hring af þessari gerð frá miðöldum eða endurreisnartíma. Í Bandaríkjunum og á Bretlandseyjum verða skjaldalagaðir signethringar vinsælir í lok 18. aldar. Ég hef séð ýmsa líka þessum í Victoria and Albert Museum i London. 

Svo er víst stimplað inn í hringinn að hann sé 12 karöt. Svo segir Margrét Hallmundsdóttir, hinn ágæti fornleifafræðingur, sem fann hringinn á Þingvöllum. Mig minnir að gullsmiðir hafi seint farið að stimpla með karatstimpli. En gerð stimpilsins ætti líklega að geta sagt töluvert um uppruna og aldur hringsins.

Eitthvað, tilfinning, segir mér að hringurinn sem fannst á Þingvöllum eigi ættir sínar að rekja til Bretlandseyja.

Haraldur frímúrari, þetta er ekki kenning heldur tilgáta. Þar á er munur. Frímúrarar hafa notað Alfa og Omega.

Vilhjálmur Örn Vilhjálmsson, 26.11.2009 kl. 18:41

4

Svo tek ég eftir einu. Mér sýnist að skjöldurinn (steinninn) sé ekki greyptur inn í hringinn, heldur sé hann "límdur"? eða festur á annan hátt. Það bendir nú frekar til 19. aldar. Hann er kannski jafnaldri þinn Guðmundur Brynjólfsson?

Vilhjálmur Örn Vilhjálmsson, 26.11.2009 kl. 19:11

5

Takk fyrir svörin.

Ekki er þetta hreinræktaður signet hringur. Ég hefi líka séð hringi svipuðum þessum, bæði á söfnum og á sveita uppboðum í UK. En ég viðurkenni að ekki var ég með útlit í samhengi við ártöl á hreinu þegar ég las þessa færslu þína. Þrátt fyrir að vera 19. aldar maður  Það er víst mjög mismunandi eftir löndum hvenær og hvernig málmar voru merktir.

En góð þykir mér tilgáta þín um að hann tilheyri jafnvel einhverri reglu. Og Bretlandseyjar finnast mér líka sennilegar.

Guðmundur Brynjólfsson (IP-tala skráð) 26.11.2009 kl. 19:37

6

Okkur vantar að sjá innan á framhlið hringsins. Hvernig er blóðsteinninn festur. Er gullplatan heil að baki steinsins? Hvernig er hann áfelldur?

Mér þykir ekki ósennilegt að - ekki sé ég bara á sama aldri og hringurinn - heldur eigi ég hann! Hafi týnt honum forðum.

Guðmundur Brynjólfsson (IP-tala skráð) 26.11.2009 kl. 19:46

7

Já, reyndu að sannfæra Þjóðminjasafnið um það síðasta. Þeir spyrja hvort þú sért F I og sért búinn að týna sjálfum þér. En líklegra þykir mér að ´teingrímu J sé búinn að taka hann upp í gullforða Breta og Hollendinga  í Seðlabankanum og hafi gefið Jóhönnu eftir blóð(t)-steininn, þar sem hún er Jóhanna Alfa og Omega, 3xV, VOSP og vinkona Gordons marhnúts.

Vilhjálmur Örn Vilhjálmsson, 26.11.2009 kl. 22:10

8

Frábær túlkun hjá þér! Skýringar þínar eru algerlega trúverðugar.

Kristinn Pétursson, 27.11.2009 kl. 11:47

9

Skemmtilegar pælingar Vilhjálmur og meira en líklega réttar. Ég veiti athygli að steinn hringsins og sætið hafa form skjaldarmerkis. Vegna trúarlegu táknanna, sem þú sérð í mynstrinu og ég fellst á, tel ég miklar líkur að þetta sé biskups-hringur, eða öllu heldur hringur biskupsstóls.

 

Á ensku er biskups-hringur nefndur Episcopal Ring og er “episcopal” komið úr Grikknesku, þar sem er að finna orðið “episkopos” (epi-skopeo = yfir-að líta/skoða?) og Episkopos merkir því eftirlitsmaður.

 

Meðfylgjandi er mynd af biskupshring og skjaldarmerki frá Arizona, sem bera líkt svipmót og Þingvalla-hringurinn, þótt langt sé á milli.

   

    

Loftur Altice Þorsteinsson, 27.11.2009 kl. 12:05

10

Loftur ég læt mér nægja staðreyndir. En mikið helvíti hefur "biskup þessa hrings" drukkið vel af messuvíninu ef hann hefur misst þetta af sér á leið úr kirkju.

Vilhjálmur Örn Vilhjálmsson, 27.11.2009 kl. 15:10

11

O, ætli það hafi ekki verið eitthvað sterkara en messuvín, hic!

Rafn Haraldur Sigurðsson, 27.11.2009 kl. 16:30

12

Rafn, það gæti verið tilfellið. Erlendum gestum og tignarfólki var oft boðið að gista í kirkjum og fóru þeir þá líklega úr öllu þegar þeir gengu til náða. Kannski hafa þeir drukkið koníak til að hita sér. Þá týna menn gjarnan hringjum.  Þannig gæti þetta hafa gerst.

Þessi franska mynd sýnir íslenskar yngismeyjar þvo ferðalangi hátt og lágt áður en hann lagði sig í kirkjunni. Mig minnir að myndin eigi að vera úr kirkjunni á Þingvöllum: Myndin hentaði vel við eina af mínum fyrri færslum um kynjafræði.

Vilhjálmur Örn Vilhjálmsson, 27.11.2009 kl. 16:52

13

Fyndnar umræður og fyndið svarið sem Lofur fékk eftir að hafa sýnt þér fallegar myndir frá Arisona.  

Hringirnir flottir.

Guð veri með þér

Kær kveðja/Rósa

Rósa Aðalsteinsdóttir, 28.11.2009 kl. 15:50

14

Sæll Vilhjámur

 Þetta er skemmtileg tilgáta og umræður ég vona að sem flestir komi með tilgátur um þennan fallega grip. Líklega er það bara sá sem týndi hringnum sem veit hvað hann stendur fyrir. En eins og réttilega var bennt á er mikið til að þessum signet  hringjum og með tímanum ættum við kanski að geta komist nær túlkun á honum. Allavega hefur þú með tilgátu þinni opnað fleiri möguleika sem spennandi er að kanna frekar. Vona að sem flestir af þínu fjölmörgu lesendum sem hafa skoðun á innsiglinu láti hana í ljós.

Hringurinn fannst í contexti (jarðlagi) sem var aðflutt og ólíkt hinu sem gæti þýtt  að hringurinn hafi týns annastaðar en fyrir framan kirkjuna.

Margrét

Margret Hronn (IP-tala skráð) 1.12.2009 kl. 08:18