Næstum því forngripir

Það hefur aldrei þótt kurteisi á mínu heimili að tala um konur sem forngripi, nema að þær væru það. Hér geri ég undanþágu á 100 ára reglunni fyrir fornminjar og birti ljósmynd frá 1936, en hún er frá konungskomunni í júní það ár.

Á hafnarbakkann í Reykjavík var fallegu fólki smalað í skrúðgöngu, m.a. léttklæddum stúlkum á aldrinum 8-10 ára, sýnist mér, til að taka á móti Kristjáni X og fylgdarliði hans. Ég býst við því að þessar stúlkur hafi verið heldri manna börn, fæddar á síðari hluta 3. áratugar 20 aldar. Ef þessar stúlkur eru enn á lífi, væru  þær flestar komnar yfir áttrætt og þess vegna antík, ef aldursskilyrði skransala í Reykjavík fyrir því orði er tekið gilt. 

Hér eru nokkur andlit, en einnig hægt er að stækka myndina efst sem ég er með í fórum mínum með því að klikka á hana eða þessa mynd.

Mikið væri nú gaman ef einhver gæti gefið Fornleifi karlinum upplýsingar um stúlkurnar þarna á myndinni. Hvaða skóla gengu þær í, og hvaða glæsilega kona fór fyrir skrúðgöngunni? Kannski lesa einhverjar af þessum stúlkum blogg og gætu sagt okkur meira um þessa blómlegu skrúðgöngu sína fram hjá dátunum á Dannebrog í rigningunni 14. júní árið 1936.

Hermann Jónasson heilsar hér á Kristján kóng, en konungur horfir hins vegar greinilega á móður Steingríms sem er með stóran blómavönd. Hvernig fluttu menn inn blóm á þessum tíma? Eru þetta ekki afskornar rósir, eða kannski bara pappírsblóm?

Athugasemdir

[Kristján Sveinsson (IP-tala skráð) 8.11.2011 kl. 09:04]

Þetta er allt mjög merkilegt. Dýrshamurinn sem „the foxy lady“ rennur með á öxlum fyrir smástelpustrollunni er reyndar dálítið slyttingslegur og frekar eitthvað óhátíðlegur. Er þetta íslenskur fjallarefur eða silfrað búrdýr? Matrósahattur fraukunnar er greinilega merkisgripur. Úr búð eða birgðum flotans? Höfuðleður fallins matrósa kannski? Hvaða blómstur eru í vöndum stelpnanna? Sóleyjar, túnfíflar. fjólur og súrur tínd á túnblettum bæjarins? Eða framandi tegundir upp vaxnar í ylhúsi Hveradala-Højers?

[FORNLEIFUR, 8.11.2011 kl. 10:06]

Sæll Kristján og margvelkominn. Þar sem þú komst svo seint í heiminn norður á Skagaströnd, þar sem svona fínheit þekktust aldrei, þá er ekki nema von að þú vitir ekkert um það sem þú spyrð um, en allt eru þetta mjög þarfar spurningar.  

Mér þykir hattur konunnar með dratthalann um hálsinn vera nokkuð líkur hatti sem frú Dorrit sást með í Páfagarði og sem ritað var um nýlega á moggablogginu af einum mesta hattamanni þjóðarinnar. Rebbi virðist mér of dökkur til að geta verið silfurrefur, en svona dauðir dýratreflar voru gríðarlega mikið í tísku á 3. og 4. áratugnum. Refir tala enn um holocaust sitt á þessum tíma. Amma mín átti svona dýr og á ég til mynd af henni með það um hálsinn, og man ég eftir því hangandi í geymslu hennar, og mátti það muna sin fífil fegri. Mér þótti merkilegt þornað trýnið og gleraugu sem sett voru á haminn.

Mér datt helst í hug að blómin hefðu komið með skipi frá Kaupmannahöfn, líklega sama skipinu sem ferjaði fylgdarlið konungs til Íslandsála. Varla hafa menn farið að bjóða kóngi upp á jafn ómerkileg blóm og ranunculus acris, sem einnig vex á fjóshaugum og í skurðum í Danmörku.

[Carlos (IP-tala skráð) 8.11.2011 kl. 10:22]

Ætli rósirnar hafi ekki komið með sama skipi. Ég reikna með að þær hafi verið skornar óútsprungnar og geymdar í kaldri lest og myrkri til að þær þroskuðust ekki of hratt á leiðinni. Dálítið eins og bananar nú til dags.

[Vilhjálmur Örn Vilhjálmsson, 8.11.2011 kl. 10:47]

Sæll séra Carlos (ef þú ert hann), nú er myndin því miður ekki alveg í fókus, svo ég á erfitt með að átta mig á eðli blómanna sem móðir Steingríms Hermannssonar heldur á. En líklegast hefur þetta verið eins og þú segir, og eins og með bananananana.

En hvað með chiquiturnar á eftir "Foxy lady". Hvaðan eru þær?

[Kristján Sveinsson (IP-tala skráð) 8.11.2011 kl. 10:56]

Rétt er það Fornleifur karl að aldrei hefðu konur bernsku minnar úti við hinn ysta sæ látið sjá sig með skaufhala um hálsinn. Enda lít ég ævinlega undan þegar ég sé svoleiðis.

[Sæmundur Bjarnason, 16.11.2011 kl. 00:49]

Hvenær byrjaði Ingimar í Fagrahvammi að rækta rósir? Hann var byrjaður á því löngu fyrir mitt minni. Palli Mikk vann hjá honum og margir fleiri. Ég birti mynd því til sönnunar á blogginu mínu fyrir margt löngu. Ég gæti spurt Sigga að þessu með rósirnar. En strákar þið megið ekki vera alltof fornir í tali. Nútíminn skilur ykkur ekki. Það þótti einu sinni fínt og flott að hafa dauða refi um hálsinn. Þeir hættu nefnilega að vera hættulegir þegar þeir voru dauðir.

[FORNLEIFUR, 16.11.2011 kl. 10:33]

Þegar gamall refur eins og þú gaggar, Sæmundur, þá er maður auðvitað á varðbergi, en athugaðu þetta endilega með rósirnar. Mundu þó hvaða árstíma þetta var á. Þú manst ekkert eftir Foxy lady?

[Sæmundur Bjarnason, 16.11.2011 kl. 22:38]

Veit vel hvað fox eða foxy getur þýtt á ensku. Á sínum tíma stóð til að kalla heimilistölvu eina Commodore Fox en þótti fullgróft svo úr varð að kalla hana Commodore Vic, sem þjóðverjum þótti víst ekkert sniðugt.