Forvarsla með lími

Kaíró er nú aftur í heimsfréttunum. Nú er það ekki blóði drifið vor og bræðralag friðsamra manna sem angrar þá, heldur skeggið á Tút.

Skeggið fléttaða á helgrímu Tutankhamuns féll af við hreingerningar og var það límt á aftur. Í stað fínna aðferða forvarða á lokuðu verkstæði, sóttu menn bifvélavirkjann Abdalla sem er meistari í boddýmeiki. Forvörður safnsins var nýlega orðinn embættismaður og mátti ekki veraaðessu, því hún var að vinna að áætlun um að byggja yfir pýramídana. Bifvélavirkinn límdi skeggið á með epoxýlími. Dýrt var vitaskuld að fá iðnaðarmann til að redda þessu, en það heldur.

Svo vel vildi til að túrhestur, Jaqueline Rodriques að nafni, tók ljósmynd af þessari björgunaraðgerð á einum frægasta forngrip Egyptalands. Einnig má nú sjá merki um þessa forvörslu, því límslettur og rispur eru greinilegar.

Þessi aðgerð minnir mig á sögu af Listasafni Íslands, sem ratað hefur í annálana, en því miður eru ekki til myndir af þeim atburði:

Sigga gamla sá um hreingerningar á Listasafninu þegar það var á efstu hæð Þjóðminjasafnsins. Eitt sinn sveiflaði hún sópnum svo harkalega að hann slóst í typpið á styttu Ásmundar Sveinssonar sem kallast Nakinn Maður. Typpið brotnaði af. Sigga varð miður sín og nú voru góð ráð dýr. Sigga sótti túbu af UHUi og límdi typpið aftur á. Daginn eftir kom Kristján Eldjárn til starfa og sá sér til mikillar furðu, að eitthvað var snúið á styttunni sem stóð ekki langt frá dyrum að skrifstofu hans. Typpið var nú með reisn en hafði lafað þegar Ásmundur hjó það. Kristján og Selma listasafnsvörður kölluðu Siggu til sín á fund og spurðu hana, hvort hún kannaðist eitthvað við þetta. Hún viðurkenndi slysið og viðgerðina. Þá spurðu Eldjárn: "En Sigríður mín, af hverju límdir þú þetta svona?" Sigga svaraði: "Hvernig á það að vera öðruvísi en svona?Mörg typpi hef ég séð um ævina, og þannig voru þau öll".

Sigríður var sómakær kona, og það eru þessar nunnur líka:

Athugasemdir

[Vésteinn Valgarðsson, 23.1.2015 kl. 12:39]

Skondið, ég var að blogga um þetta sama "slys" og um mín eigin kynni af þessari grímu: http://vest-1.blogspot.dk/2015/01/tipp-ex-i-flateyjarbok-jominjasafn.html

[FORNLEIFUR, 24.1.2015 kl. 08:20]

Vésteinn, það er ekkert skondið við það. Við vorum að lesa fréttirnar á sama tíma. Ég hef þó ekki verið í Kaíró hjá bræðrum mínum . Velkominn á Fornleif, byltingakenndastastaststa blogg á Íslandi!

[Vésteinn Valgarðsson, 24.1.2015 kl. 09:30]

Takk fyrir það. Ekki vissi ég að þú ættir bræður í Kaíró.

[FORNLEIFUR, 24.1.2015 kl. 12:31]

Það er því munur að vera boðinn til píramídanna af Bræðralagi, eins og þér var einu sinni boðið. Það hefur líklega verið þá að þú kynntist Tút. Allir eru bræður mínir og jafningjar. Enginn betri en hinn eða allar systurnar, og ef eitthvað er, þá eru þær betir en bræðurnir.