Ísland í töfralampanum: 7. hluti

Brúarárfossar voru líkt og í dag mjög vinsælt myndefni fyrir fyrstu ljósmyndarana á Íslandi. Útlendingar heilluðust einnig snemma af fossunum, einnig fyrir öld ljósmyndarinnar. Þeir voru því tilvaldir í landkynningarefni eins og skuggamyndir. Svo mikið hefur mönnum þótt koma til fegurðar fossanna, að tvær myndir af þeim, annars vegar af fossunum og hins vegar af brúnni, eru með í syrpu Riley Bræðra England to Iceland, sem Fornleifur keypti nýlega nokkrar myndir úr á Cornwall.

Vafalaust er, að Sigfús Eymundsson er höfundur efri myndarinnar sem bar númer 26 í syrpu Riley Bræðra og kallast á ensku Bruera Rapids. Myndin er til í tveimur þurrnegatífu á Þjóðminjasafni Íslands (sjá hér og hér). Hin myndin sem er númer 27 og ber heitið Bruera and Bridge er mjög líklega einnig eftir hann.

Brúarárfossum voru þegar árið 1834 gerð skil af Frederik Theodor Kloss (sjá hér). Mynd Kloss kom seinna út prentuð sem litógrafía. Einnig er vel þekkt koparstunga Auguste Meyers frá 1838 í stórverki Gaimards: Voyage en Islande et au Groënland.

Meira er víst ekki hægt að teygja lopann um fossana og brýr á Brúará.

Mynd Auguste Meyers af Brúarárfossum.

Fyrri kaflar í sögunni um fyrstu skuggamyndirnar frá Íslandi:

Ísland í töfralampanum 1. hluti

Ísland í töfralampanum 2. hluti

Ísland í töfralampanum 3. hluti

Ísland í töfralampanum 4. hluti

Ísland í töfralampanum 5. hluti

Ísland í töfralampanum 6. hluti

Athugasemdir

[Halldór Egill Guðnason, 1.6.2016 kl. 22:41]

Lengi má lopann teygja, Fornleifur. Tuðarinn var alveg við það að fullyrða, að myndirnar gætu ekki verið teknar í sömu ferðinni, þar sem hann kom ekki auga á neina brú á efri myndinni. Við nánari skoðun kom hann þó auga á hana. Þar sem varðan er, hægra megin á myndinni(Brekkuskógarmegin), sem líkist konu í upphlut, er núverandi brú þarna yfir, sem byggð var fyrir konungskomu Kristjáns karlsins, hér um árið. Hún stendur enn, altso brúin, enda konungsvegurinn forni, mjög vinsæl göngu og reiðleið, enn þann dag í dag. 

Góðar stundir, með kveðju að sunnan.

[FORNLEIFUR, 2.6.2016 kl. 05:22]

Sæll Halldór. Á efstu myndinni er hross við brúna og konan á klettinum er í einhverri Viktoríukápu. Það er ekkert þjóðlegt við hana.

[FORNLEIFUR, 2.6.2016 kl. 05:37]

Enn fremur Halldór: Ég held nú örugglega að brúin þarna á myndinni sé ekki til lengur en þar nærri er brú sem var byggð á 7. áratug 20. aldar, sjá hér . Brúin sem byggð var fyrir konung var að ég held önnur brú yfir Brúará, og það var fyrir komu Friðriks 8. árið 1907. Brúin á myndinni efst er trébrú. Á neðri myndinni hefur ljósmyndunin heppnast svo illa að einhver hefur retúsherað brúna á myndina.

[FORNLEIFUR, 2.6.2016 kl. 05:44]

Sumir halda að Brúará dragi nafn sitt af gömlu manngerðum brúum, en hún dregur nafn sitt af náttúrulegum steinboga sem lá yfir hana.  Sögusagnir segja svo að vinnumaður einn í Skálholti hafi brotið bogann niður svo umrenningar ættu ekki eins auðvelda leið að höfuðbólinu til að betla hjá kirkjunnar mönnum og höfðingjum. Viljugir drengir með skemmdarfýsn hafa alltaf verið til í þjónustu þeirra sem sátu á auðnum.

[FORNLEIFUR, 2.6.2016 kl. 05:52]

hér er líka ágæt grein eftir Gísla heitinn Sigurðsson ritstjóra Lesbókar Morgunblaðsins.